ISAYA 28 - IBIBILIA INDAKATIFU MU LUTIRICHI LWITAKHO NENDE LWISUKHA

Likhuva khu Samaria

¹ Wooyi! Muli khu vutiinyu munyi vandu vilola khandi vatandi varulanga mu lusomo lwa Efurahimu, vukhumi vwenyu vukoranga khuli liwua linialanga! Ni kilikali, vukhumi vulandanga mu luhoongo luli ni lilova linuulu, lia vatandi vatanditswa idivai.

² Loli, Mwami Nyasaye wayirovolela mundu uli nu vunyali nende tsingulu; neye uli khuli imbula ingali ya machina nende yu vushindu vulitoho, khuli imbuutsa inditoho, khuli michelelo chia matsi chikholomokhanga; aliitsa khuvisiuva ni tsingulu tsietsie khulilova.

³ Vwiloli vwa vatandi va Efurahimu vuliitsa khutuuvachilwa hasi;

⁴ khali vukhumi vwavo vuliitsa khuvungulukha khuli liwua linialanga; vukhumi vwalanda mu luhoongo luli ni lilova lilahi vuliitsa khuva khuli matunda ku khuraanga khucheswa mumatukhu ki shimiyu; mundu nakaloli, akatuulanga nu khukalia vwangu.

⁵ Khulitukhu lienelo, Mwami Nyasaye wi Mikaanda Chiliihe aliitsa khuva khuli itaachi yu vukhumi, khuli shilemba shilahi shiene khu vandu veve valiitsa khuva nivarikala mwoyo.

⁶ Aliitsa khwimilila vakhalachi veve khukhola katoto, nu khuha valindi vi litaala likali tsingulu.

Isaya nende Vaprofeti Vatandi va Yuda

⁷ Navutswa valala vali muvo vatandanga idivai, khandi vavoya voyanga shichila malwa; khali musalisi nende muprofeti vatanda shichila malwa; vakoyanyinywa shichila idivai; vavoya voyanga shichila malwa; vavoolanga vuvehi shichila malolo kavo; visikarilanga lwa vaviritsanga viyaalo mushiina.

⁸ Tsimesa tsiosi tsia yitsula masali; khandi havundu havulakhuho ha vunihu vuli.

⁹ Vakholelanga shihenye henye nivavoola, “Ni viina wayechitsa vucheli, ni viina wayivaalila likhuva? Anyala khwechitsa yavo vonyene valeshitswa khununa maveele, yavo varulitswa khu vakhali vanunyinyanga!

¹⁰ Akhwechitsanga khuli vaana vati, lilako nililonda lilako lindi, luvaaso nu luvaaso, khali yili na yelo!”

¹¹ Ni kilikali, niiva muliitsa khwambakhana khumbulishitsa, Mwami Nyasaye aliitsa khulomoloma khu vandu veve yava khuvirila mu vandu vi tsinomolomo tsindi, valomolomanga tsinomolomo tsinjeni.

¹² Khali ndio, niiva yali wavalaaka, “Niitsa khumumanyinya havundu ha munyala khuhulishila, Munyi vamwachioka, niitsa khumukhola muhulushi; hanu naho ha muliitsa khuhulushila.” Navutswa vambakhana khumbulishitsa.

¹³ Khulwa yako, navo valiitsa khwechitswa likhuva liu Mwami Nyasaye, lilako nililonda lilako lindi; indukuta ni indukuta, luvaaso nu luvaaso, khandi liechitso ni liechitso. Muliitsa khwisikarila mu shia shindu shiosi shia mukholanga. Muliitsa khusalilitswa, mulikumilwa nu mureeko, nu khuvohwa mucheela.

Milembe chiu Vuvehi Chisalilitsanga

¹⁴ Khulwa yako, munyi va muchayanga vandi, muhulishitsi ku Mwami Nyasaye avoolanga, munyi va mwamihanga vandu mu Yerusalemi!

¹⁵ Munyi mwichinjililanga numuvoola, “Khwakhola lilakano ni likhutsa, khandi khwahulishitsana ni shihatisi; muvoolanga ndi lwa matiinyu kakwa shikanyala khumukwila tawe; shichila mwakhola vuvehi khuva khuli shilushilu shienyu, vukaati khuva khuli shiniikha shiu khwikamamu.”

¹⁶ Mwami Nyasaye avoolanga, “Loli, mbikhanga musinji mu Sayoni, kuliitsa khuva khuli lichina, lichina liachelitswa, lichina liu vukuuli vululu liu mumbeka, lichina liu musinji kwatoto; lichina liahandikwakhu makhuva yaka, ‘Mundu uli ni lisuuvila woyo aliitsa khutsililila khwikhutsila.’

¹⁷ Niitsa khurumishila katoto khuva khuli ikavilo yu khupimila, niitsa khurumishila likhola liu vulunji khuli shindu shiu khupimila; imbula ya machina iliitsa khweya shia vuvehi vwosi vwa musuuvililanga, khandi michelelo chia matsi chiliitsa khwononyinya havundu ha mwilushilanga.”

¹⁸ Nalwo lwa lilakano lienyu ni likhutsa liliitsa khukalukhanyinywa, khandi ka mwahulishitsana ni shihatisi kalirulitswaho. Lwa matiinyu kenako kaliitsa khwikholekha, muliitsa khutivitswa.

¹⁹ Shia matiinyu koosi kaliitsa khumukwila, kaliitsa khumukuura; shia mu mavwevwe koosi muliitsa khuvirilamu, khali shia mbasu nu vutukhu; muliitsa khutechela lwa muliitsa khuva numuhulilanga likhuva;

²⁰ shichila munyi muliitsa khuva khuli mundu uchelitsanga khukona mu shitali shimbiha khuye, khali shianyala khukololokha, inoho khwivimba mulinjeti munyelele kukhanyala khumuvimba tawe;

²¹ shichila Mwami Nyasaye aliitsa khukwana khuli yakhola khu Shikulu shia Perazimu, khandi nave nu vurima vululu khuli yavetsanga mu Luhoongo lwa Gibioni; khukhola shikholwa shieshie -- shikholwa shieshie ni shiu khuchenyinya! Nu khurweshitsa muhinzilu kwekwe, muhinzilu kwekwe nu kukhuhuka.

²² Khulwa yako, muleshe khuchaya vandi! Niiva mulakhola ndio, matiinyu kaliitsa khumukwila makali muno khuvira ka muvirilamu nunundi; shichila mali khuhulila ndi Mwami Nyasaye wi Mikaanda Chiliihe umali khuviritsa khuli atsitsanga khumulula shia shindu shiosi khulilova.

²³ Reechi maroyi kenyu muhulile kambolanga; hulishitsi vulahi vwene kanomolomanga.

²⁴ Kanyala khuva katoto mundu ulimanga mulimi ku khuraakamu viraakwa atsilililanga khulima? Ni kilikali atsilililanga khukupomola nu khukwirecheshitsa?

²⁵ Lwa avetsanga namali khukuuvusa, araakamu vukuutsa vwi tsinyasi khuli vukuutsa vwi tsipila pili nende Kumimu. Araakamu inganu nende ishayiri mu tsimbaso khandi araakamu imu yindi khu tsindulu tsiu mulimi kwenoko;

²⁶ shichila yivaalilwa vulahi vwene; Nyasaye wewe neye wamwechitsa.

²⁷ Vukuutsa vwi tsipila pili shiuvunyala khuhulakwa ni shikong'o, inoho likaare khuchenditswa ikulu wa kumini tawe; navutswa vukuutsa vwi tsipila pili vuhulakwangwa ni shisala, khandi shikong'o nashio shihulanga Kumini.

²⁸ Imu isielelwangwa khulomba shiukhulia, navutswa mundu shiachihulaakanga mihika ni mihika tawe; Mundu achenditsanga likaare nende tsifarasi khuchendela khuyo, navutswa shianyala khuchisionola tawe.

²⁹ Vucheli vu khuchenyinya yuvu vurulanga khandi khu Mwami Nyasaye wi Mikaanda Chiliihe; inganakani yeye ni yu khuchenyinya, vusitsa vwevwe nu vwatoto.