ISAYA 26 - IBIBILIA INDAKATIFU MU LUTIRICHI LWITAKHO NENDE LWISUKHA

Lwimbo lu Khwitsominya Mwami Nyasaye

¹ Khulitukhu lienelo, lwimbo yulu nalwo lwa vandu valiitsa khwimba mu shivala shia Yuda: Khuli ni litaala li tsingulu; Nyasaye neye ukhulindanga na masisi nende tsimbinga!

² Mwalaminye vilivwa vi litaala likali, vandu vuluhia lwi likhola liu vulunji, lumenyanga shichila lisuuvila luvirile mushio.

³ Nyasaye, nivi uchilanga vandu vaseletse nivamenya mu milembe; mu milembe shichila vasuuvililanga mu yivi.

⁴ Musuuvilile mu Mwami Nyasaye mihika ni mihika, shichila neye uli lwanda lwi mihika ni mihika;

⁵ shichila wachehitsa vandu vu vwiloli; wapomolanyinya mataala ki tsingulu ka vamenyamu, wayongovelitsa masisi kenako, kakwa khuli malova.

⁶ Vandu vakatuuvachilanga hasi nunundi, vandu vatambitswangwa nende vamanani vakaseenelanga hasi.

⁷ Ka vandu vi likhola liu vulunji vakholanga ni maangu; Nyasaye wi likhola lilahi, nivi ukasitsanga ka vakholanga.

⁸ Yivi Mwami Nyasaye, khwayaanza khulonda malako koko; Khwikombanga mu mioyo chieru khuhaana vukhumi khu lira liolio.

⁹ Inzi mwene khwikombanga nu mwoyo kwosi mu vutukhu, Liiva lianje liosi likhukhavanga; shichila lwa uliitsa khuva nukhalachilanga vandu khulilova, nalwo lwa vandu vu mu shivala veekanga likhola liu vulunji.

¹⁰ Khali niiva vandu vatamanu valakholelwa malahi, vakhaywa khweka likhola liu vulunji; khali vakholanga vindu vitamanu mu shivala shia vandu valahi vamenyamu khandi valechelitsa vunyali vu Mwami Nyasaye.

¹¹ Yivi Mwami Nyasaye, wirecheshe khuvasalilitsa, navutswa vayikalwa tsimoni khulola. Lekha valole khuli wayaanza vandu vovo vanyole tsisoni. Lekha mulilu kwenyekhanga khulaalitsa vatsiku vovo kuvalaalitsi.

¹² Yivi Mwami Nyasaye, wachila khumenyanga mu milembe, toto, ka khwakhola koosi, nivi wakhukholela.

¹³ Yivi Mwami Nyasaye, uli Nyasaye weru, vami vandi khumeeta khu yivi va khwamihakhu, navutswa khuheetsanga lira liolio lionyene luyali.

¹⁴ Vandu venavo vakhutsa, valiitsa khuvula khuva mwoyo; vakwa vinanyenzo, valiitsa khuvula khwisimukha; shichila nivi wa vasalilitsa khandi nuvativitsa; mundu avulakhuho uliitsa khuvitsushitsa khandi.

¹⁵ Navutswa Mwami Nyasaye, nivi wa vambalalitsa shivala shieru; kilikali, nivi wa vambalalitsa shivala shieru; nivi wa vaheetsanga vukhumi; nivi wa vambalalitsa mipaka chi shivala shieru.

¹⁶ Yivi Mwami Nyasaye, nivali mulinyakhana, nalwo lwa vakhukhava, vareeva vukhonyi khurula khu yivi lwa wa vasalilitsanga.

¹⁷ Khwahulila isalila khuli mukhali waheelitsa nanyakhananga nalila niyenyanga khwivula mwana; Yivi Mwami Nyasaye, nindio khandi khwali shichila yivi.

¹⁸ Khwahulia isalila yu khwivula mwana, navutswa shindu shivulakhuho shia khwivula! Khushili khunyola likuura shichila shivala shieru; khali shindu shivulakhuho shia khwarweshitsa.

¹⁹ Navutswa vandu vovo vakhutsa valiitsa khutsililila khuva mwoyo, mivili chiavo chiliitsa khwisimukha. Munyi va mwayeveelwa mu shilindwa, vushi muraanje khwimba tsinyimbo nu vuyaanzi! Nyasaye aliitsa khuchila liime lielie liu vulamu lishinditse lilova, khali lilova lilirulitsa vandu vali nivakhutsa khale.

²⁰ Munyi vandu vaanje, hambi, mwinjile mu tsinzu tsienyu, mwiyikalile mutsio; mukhole numwivisa hati vutswa khutukha lwa vurima vwa Nyasaye vuvwa;

²¹ shichila Mwami Nyasaye arulanga havundu hehe, khwitsa khusalilitsa vandu mu shivala shichila vwoni vwavo; khali lilova liliitsa khulavushitsa havulavu vandu vasuundulanga shisahi shia vandi; vuchila khuvisa vandu viirwa khulio.