ISAYA 2 - IBIBILIA INDAKATIFU MU LUTIRICHI LWITAKHO NENDE LWISUKHA

Milembe chi Mihika ni Mihika

¹ Yili nalio likhuva lia Isaya mwana wa Amozi yalola khu lusomo lwa Yuda nende litaala likali lia Yerusalemi.

² Mumatukhu kaliitsa khuvaho, shikulu shi Litempeli liu Mwami Nyasaye liumbakhwakhu shiliitsa khuraambiha khuvira vikulu vindi viosi, shiliitsa khuva shiraambi khuvira rukulu riosi. Vandu vi vivala vindi valiitsa khwitsa khushilola.

³ Vandu vanyishi valiitsa khwitsa nivavoola, “Hambi khutikulushi khu Shikulu shiu Mwami Nyasaye, khwinjila mu Litempeli liu Mwami Nyasaye wa Yakobo; nikanyalikha khukhwechitsa injila yeye, nu khukhola ka yenyanga; shichila malako kaliitsa khurula Sayoni, likhuva liu Mwami Nyasaye khurula mu Yerusalemi.”

⁴ Aliitsa khukhalachila vandu vi tsimbia tsiosi, khandi aliitsa khurweshitsila vandu vanyishi katoto; valiitsa khwiraanya marimu kavo khukwa machembe ku khulimila, khandi vivavi viavo khukwa tsikhoni tsiu khuchesela vivala viliitsa khukwanakana, vuchila khumanyakhu shindu shiosi khu liihe.

⁵ Munyi vitsukhulu va Yakobo, hambi, chendeli mu vulavu vu Mwami Nyasaye!

Vwiloli Vuliitsa Khutivitswa

⁶ Yivi Nyasaye, wayivilila vandu vovo vi inzu ya Yakobo. Ni kilikali, vakhumu khuluveka luli ivukwi vayitsula mu munyi khandi valoochi khurula mu shivala shia Vafilisti, shichila valondanga miima chia vandu vi tsimbia tsindi tsinjeni.

⁷ Shivala shiavo shiayitsula ifetsa nende itsahabu; khandi muli ni livishilu mu vunyishi. Shivala shiavo shili ni tsifarasi tsinyishi; makaare kiliihe kavo kanyala khuvula khuvalitswa.

⁸ Shivala shiavo shiayitsula misambwa; khandi musikamilanga vindu via vene mwalomba na makhoni kenyu.

⁹ Vandu valiitsa khwichehitsa, nu khukholwa tsisoni -- Mwami Nyasaye, lekha khuvasemeha!

¹⁰ Valiitsa khwinjila mu lwanda nu khwivisa mu malova, khwilukha khu vurima vu Mwami Nyasaye, khurula khu tsingulu tsietsie nende vukhumi!

¹¹ Litukhu lili himbi khutukha lwa mundu wi shileche aliitsa khulekha shileche; khandi vandu vichinjililanga valiitsa khuchehitswa, ma Mwami Nyasaye wonyene aliheelwa vukhumi.

¹² Khulitukhu lienelo, Mwami Nyasaye wi Mikaanda Chiliihe aliitsa khuchehitsa shia mundu wosi uli ni tsingulu, shia mundu wosi mwiloli khandi mwichinjilili.

¹³ Aliitsa khutivitsa misala chiosi chia ceda chia Lebanoni nende miseno chiosi chia Bashani.

¹⁴ Aliitsa khutandasa vikulu viraambi nende rukulu rwosi,

¹⁵ shia munaara kwosi muraambi, nende masisi koosi ki tsimbinga.

¹⁶ Aliitsa khwinikha mu matsi khali tsimeli tsingali tsiosi tsia Tarishishi khandi tsiasiaywa vulahi vwene.

¹⁷ Shileche shiu mundu shiliitsa khuchehitswa, vwichinjililu vwa vandu vukholelwi tsisoni. Ni Mwami Nyasaye wonyene uliitsa khuheelwa vukhumi khulitukhu lienelo.

¹⁸ Misambwa chiliitsa khutivitswa.

¹⁹ Vandu valiitsa khwivisa mu luhoongo luli mu lwanda khandi mu vwina vuli hasi mulilova khuchelitsa khwilukha khu Mwami Nyasaye avuli khuvalolela vurima khandi khwivisa tsingulu tsietsie nende vukhumi vwevwe, lwa aliitsa khulolekha khutechelitsa shivala.

²⁰ Khulitukhu lienelo, vandu valiitsa khusiuvila machiungu nende manyinya misambwa chia valomba khu itsahabu nende ifetsa, khusaala khuchio.

²¹ Valiitsa khwilukha nivatsia mu luhoongo mu lwanda, khandi mu vwina vwalama khuchelitsa khwilukha Mwami Nyasaye avuli khuvavukulila vurima khandi khwilukha tsingulu tsietsie nende vukhumi vwevwe.

²² Lekhani nu mundu wenyekhanga khukhutsa, weselananga miuya mu muulu keke, nu vukhala shina vwa vali navwo khwinzi?