ISAYA 15 - IBIBILIA INDAKATIFU MU LUTIRICHI LWITAKHO NENDE LWISUKHA

Likhuva khu Moabu

¹ Yili nalio likhuva lia Nyasaye khu shivala shia Moabu. Lwa litaala lia Aru limali khutivitswa mu vutukhu, luvwelele shivala shia Moabu. Lwa litaala lia Kiru limali khutivitswa mu vutukhu, luvwelele shivala shia Moabu.

² Vandu vi litaala lia Diboni vatikulushi hikulu hene mu litempeli khutsia khulila; Vamoabu vikhulanga shichila mataala ka Nebo nende Medeba. Vandu voosi vaveeka luhaale mateelu kavo koosi kaveekwa.

³ Vandu voosi khu tsinjila vayifwala tsinguvu tsia makunia; khali khwikulu khwi tsinzu nende mu vikuri vandu voosi vikhuvanga nivaroonya miliika.

⁴ Vandu va mataala ka Heshiboni nende Elehale valilanga, tsikhwili tsiavo tsimali khutukha havundu halaangwangwa Yahazi. Khali vasikali va Moabu valilanga ikulu; vaheendanga mwoyo nivatechela.

⁵ Mwoyo kwanje kwavelela shichila shivala shia Moabu; vandu vayilukhayo vatsia mu litaala lia Zohari vatukha havundu halaangwangwa Egulatsi Shelishiya. Vatikulukhanga nivatsia Luhitsu nivalila, nivali khu muhaanda kutsitsanga Horonahimu vikhulanga shichila vativitswa.

⁶ Muchela kwa Nimurimu kwakhaama matsi, vunyasi vwaniala, vulimu vwosi vwayuma. Shindu shiosi shiviisi shivulakhuho shimeelamu.

⁷ Vandu vambukhanga Mushinoko shi Liise, vitiukhanga miandu chiavo chia vanyola chiosi, halala na mavishilu kavo koosi.

⁸ Khulila khwavo khuhulilikhananga shia havundu hosi mu shivala shia Moabu. Tsikhwili tsiavo tsimali khutukha mu litaala lia Egulahimu, tsikhwili tsienetso tsimali khutukha Beherelimu.

⁹ Muchela kwa Diboni kwayitsula masahi; nikhali Nyasaye alameeta matiiinyu kandi khu vandu vi litaala lia Diboni. Isimba iliitsa khurumwa khwiira vandu valiitsa khuva nivarikala mwoyo, nivachelitsanga khwilukha khurula Moabu.