HOSEHA 6 - IBIBILIA INDAKATIFU MU LUTIRICHI LWITAKHO NENDE LWISUKHA

¹ “Hambi, chendi khukalushi khu Mwami Nyasaye; shichila neye wakhusalilitsa, nikhali aliitsa khukhuhonyinya; wakhurumula tsinguma, navutswa aliitsa khukhuvoha makuule keru.

² Nikamali khuvira matukhu kavili, aliitsa khukhuha vulamu khandi; khulitukhu lia khavaka aliitsa khukhwisimushitsa, khutsililile khuva mwoyo naye.

³ Hambi khumumanye, chendi khuchelitsi khumanya Mwami Nyasaye; aliitsa khulolekha khuli liuva lilolekhanga mu mavwevwe. Aliitsa khukhwitsila khuli imbula, khuli imbula yi shimiyu inyililanga nishiinditsa malova.”

⁴ Navutswa Mwami Nyasaye avoolanga, “Munyi Vaefurahimu, nyala khumukhola shina? Munyi vandu va Yuda, nyala khumukhola shina? Vuyaanzi vwenyu vuli khuli malesi mu mavwevwe, khuli liime likhamulukhanga liuva nilishili khwakha.

⁵ Nashio shivune shiachila nimwinjilila ni likhuva lia vaprofeti vamuvoolela, mali khuvativitsa ni likhuva lia inzi mwene nalomoloma, khandi likhalaka lianje lilolekhanga havulavu khuli vulavu.

⁶ Nzikombanga vuyaanzi vwatoto khuvira misango chienyu, mumanye vucheli khulondokhana khu Nyasaye khuvira vihanwa viu khusambwa.

⁷ “Navutswa mwameneka lilakano lianje mu litaala lia Adamu; mu litaala mwenomo namwo mwa mwambakhana khuva vasuuvilwa khwinzi.

⁸ Shia mundu wosi mu litaala lia Gileadi ni mutamanu; wamuliela musahi.

⁹ Khuli vanuuli vakonekhanga mundu khu muhaanda, nindio khandi vasalisi vavo vivunjelitsanga halala khukhola; viiranga vandu khu muhaanda kutsitsanga Shekemu, ni kilikali, vakholanga vindu vitamanu vinyishi khuvira shichelo!

¹⁰ Ndoli shindu shitamanu shiene shiu khurishitsa mu Vaisraeli; Vaefurahimu vakholelayo vulaaya, ni kilikali, Vaisraeli vayononyinywa.

¹¹ “Khali munyi vandu va Yuda, mali khuviritsa litukhu liamusalilitsa khandi, shichila vindu via mukholanga. Isaa yosi ya nyenyanga khuhonyinya Vaisraeli vaanje nu khuvakhola khuhindahala..”