HOSEHA 5 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Mwami Nyasaye avoolanga, “Munyi vasalisi, hulishitsi! Munyi Vaisraeli, muhulile! Munyi vandu vi inzu yu vwami, muhulishitsi! Shichila munyi navo vamutsitsanga khukhalachilwa: mwali khuli mureeko mu litaala lia Mizipa, khuli ineti khu Shikulu shia Tabori.

² Mwayeeva vwina vukhuvakumila mu litaala li Minyenye; navutswa niitsa khumusalilitsa munyi voosi.

³ Namanya Vaefurahimu, khali Vaisraeli vashili khuviswa khwinzi; nikhali khu lwenulu, Vaefurahimu vakholanga vulaaya, Vaisraeli vayononyinywa.

Hoseha Yachelihitsa Vandu Khulekhana ni Misambwa

⁴ “Vikholwa viavo viavikalila khukalukha khu Nyasaye wavo, shichila vali nu mwoyo ku khutsililila khukhola vulaaya; khandi vavula shindu shia vamanya khwinzi Mwami Nyasaye.

⁵ Vwiloli vwa Vaisraeli vwamanyikhana havulavu; Vaefurahimu valiitsa khwisikarila mu vwoni vwavo, khali vandu va Yuda valiitsa khwisikarila navo.

⁶ Valiitsa khutsia khukhava inzi Mwami Nyasaye, nivali ni viayo via makondi kavo nende tsing'ombe tsiavo, navutswa valiitsa khuvula khunyola; shichila ndi ihale wene khurula khuvo.

⁷ Valekha khuva vasuuvilwa khwinzi Mwami Nyasaye; shichila vayivula vaana ilwanyi. Khulwa yako, khulitukhu liu Mulukha ku Khwilavushitsa khu Mweli, viraakwa vienyu viliitsa khwononyinywa.

Liihe Hakari ha Yuda nende Israeli

⁸ “Khuvi shisiliva mu litaala lia Gibeha, shisiliva mu litaala lia Raama. Laanjilitsili muhumu kwi liihe mu litaala lia Betsi-aveni; Munyi vandu vuluhia lwa Benyamini, mutsiku wenyu ali inyuma wenyu.

⁹ Vandu vuluhia lwa Efurahimu valativitswa khukwa khuli shiangalangwi khulitukhu liu khusalilitswa; Ni kilikali, kambolanga havulavu mu Vaisraeli, nako kaliitsa khwikholekha!”

¹⁰ Mwami Nyasaye avoolanga, “Vimilili va Yuda vakwa khuli yavo vasuundanga lwakho; nivalolele vurima vwanje khuli michelelo chia matsi.

¹¹ Efurahimu atambitswangwa, aminikhanga mulikhalachilwa katoto, shichila ali ni shinani shiu khusaala khu misambwa.

¹² Khulwa yako, ndi vutswa khuli injetso khu Efurahimu, khuli vukuundu vumakanu khu vandu va Yuda.

¹³ “Lwa Vaefurahimu valola khuli valwalanga, khandi vandu va Yuda nivalola makuule kavo, nalwo lwa vandu va Efurahimu vasimukha nivatsia Ashuria nivarumwa khu Mwami wi tsingulu wa Ashuria. Navutswa yakhaywa khuvakhonya inoho khuvahonyinya makuule kavo.

¹⁴ Niitsa khukwa khuli isimba khu Vaefurahimu, khuli mwana wi isimba khu vandu va Yuda. Khali inzi mwene niitsa khuvavulanyinya mu vitonye nu khurulaho. Inzi mwene neye uliitsa khuvachinga valirulaho, khali valivula khuva nu mundu unyala khuvakhonya.

¹⁵ “Niitsa khukalukha khandi havundu hanje hamenyanga, khutukha lwa valiitsa khwiyama vakhola vwoni nu khukhava inzi, nivali mu matiinyu kavo valikalukha khwinzi, nivavoola.”