HOSEHA 4 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Munyi Vaisraeli, hulishitsi likhuva liu Mwami Nyasaye, shichila Mwami Nyasaye ali ni likhuva limunyashitsanga shichila munyi vamuli vene shivala; mwalekha khuva vasuuvilwa, muvula vulahi mu shivala shinu, khandi mundu avulakhuho wamanya shindu khulondokhana khu Nyasaye mu shivala shinu.

² Vandu vamenya nivaliitsanga nivisuuhitsana, vashila vuvehi, ni valumindi, vihuuvi khandi vaheeyi; khali vikholwa viu khusalilitsa vandi viayitsula muvo, khandi shisahi shiamenya ni shiasuundulwa.

³ Khulwa yako, vandu vikhulanga mu shivala, khandi voosi vamenyanga mushio vativanga; khali tsinyama tsiumbulimu, manyonyi, nende tsisutsi vitivitswangwa.

Nyasaye Yayaala Vasalisi

⁴ Mwami Nyasaye avoolanga, “Munyi vasalisi, leshi khuhuchililakhu mundu khwililila inoho khwituula; shichila ninzi wilililanga shichila munyi.

⁵ Muliitsa khwisikarila mbasu, khali vaprofeti valiitsa khwisikarila na munyi mu vutukhu; nilitivitsa mama wenyu Israeli.

⁶ Vandu vaanje vativitswangwa shichila vavula vucheli; lwa mwambakhana khuchelihitswa, inzi mali khumwambakhana khuva vasalisi vaanje. Lwa mwambakhana khulonda malako kaanje inzi Nyasaye wenyu, niitsa khwivilila khandi vaana venyu.

⁷ “Khali lwa vasalisi vivulana mu vunyishi, nalwo lwa vatsililila khukhola vwoni imbeli wanje; niitsa khukalukhanyinya vukhumi vwavo khuva tsisoni.

⁸ Vanyolanga miandu chiavo khurula khu vwoni vwa vandu vaanje vakholanga, vali nu vuha vu khutsililila khulola ni vatsilililanga khumeeta khukhola vwoni.

⁹ Navutswa Khuli lwa vandu valiitsa khusalilitswa, nindio khandi niitsa khusalilitsa vasalisi; niitsa khuvasalilitsa shichila mwiima kwavo, nu khuvanzila vikholwa viavo vitamanu.

¹⁰ Valiitsa khulia, navutswa valiitsa khuvula khwikura; valiitsa khukhola vulaaya, navutswa valiitsa khuvula khwivulana mu vunyishi, shichila vayambakhana Inzi Mwami Nyasaye, vatsililile khukhola vulaaya.”

Nyasaye Wayambakhana Misambwa

¹¹ Mwami Nyasaye avoolanga, “Idivai, ive ikhulu inoho impia ikoyanyinyanga vandu vavula khuva ni limanya.

¹² Vandu vaanje vareevanga inganakani yu khukhonywa khu misala; shikong'o shiu vukhumu shivavoolelanga ka venyi khumanya. Valekhana ninzi Nyasaye wavo; khuli mukhali wu kholanga vulaaya, nindio vatsilililanga khusaala khu vanyasaye vandi.

¹³ Vakholelanga misango khu vutoonje vwi vikulu, khandi vahaana vihanwa khuvio, hasi hi misala chi miseno, mikomari, nende mireembe, khuvela ni havundu hi shiniikha shili shilahi; khulwa yako, vaana vi shikhana venyu vakholanga vulaaya, khandi viiha venyu vaheeyanga.

¹⁴ Navutswa shinyala khusalilitsa vaana venyu vi shikhana lwa vava nivakholanga vulaaya, inoho vakukhu venyu vi shikhana lwa valiitsa khuva ni vaheeyanga tawe; shichila khali munyi vene muheeyanga na vakhali vakholanga vulaaya vu mu litempeli, nu mukhola navo misango mu milukha chiu khuheeya. Vandu venavo valiitsa khutiva lwa vavula limanya!

¹⁵ “Munyi Vaisraeli, khali niiva mukholanga vulaaya, vandu va Yuda vavuli khunyolekha mu vutamanu! Muvuli khwinjilakhu mu litaala lia Gilugali, inoho khutikulukha Betsi-aveni! Muvuli khwisuuhakhu, numuvoola, ‘Khwisuuhanga khu Nyasaye uli mwoyo!’

¹⁶ Vaisraeli ni vahaaka khuli imosi imbalave. Nyala khuvaliishitsa ndina khuli mwayi yayitsanga makondi mushikuri?

¹⁷ Vaefurahimu vasikamilanga misambwa; lekhani navo!

¹⁸ Khali nivamali khutanda, vayaanzilila miima chiu khukhola vulaaya; vayaanza khuheelwa tsisoni khuvira khuheelwa vukhumi.

¹⁹ Khulwa yako, shihungutsi shiliitsa khuvahilana, misango chiavo chiliitsa khuvaha tsisoni.”