Biblia Todo Logo
Bìoball air-loidhne

- Sanasan -

HAGAI 2 - IBIBILIA INDAKATIFU MU LUTIRICHI LWITAKHO NENDE LWISUKHA


Vukhumi vwi Litempeli Liyia

1 Khulitukhu lia makhomi kavili ni lilala liu mweli kwa saba, khumuhika kwa khavili, lwa Mwami Dario yamihanga, Mwami Nyasaye yalomoloma khandi nu Muprofeti Hagai.

2 Yavoolela Muprofeti Hagai atsi khulomoloma na Zerubabeli mwana wa Shalitieli, wali nali gavana wa Yuda, Mukali wa vasalisi voosi Yoshwa mwana wa Yehozadaka, khandi khu vandu vali nivakalukha nivarula mu vuhaambe; avavoolele,

3 “Ni viina warikalakhu mu munyi unyala khwitsushitsakhu khuli Litempeli yili liali niliaheelwa vukhumi? Mulolanga ndina Litempeli yili nunundi? Lilolekhanga khuli ni shindu shikhaya imbeli wenyu!

4 Khali ndio, yivi Zerubabeli, uve ni ikholo. Khali yivi Mukali wa vasalisi voosi Yoshwa mwana wa Yehozadaka, uve ni ikholo. Khali munyi vandu voosi vamenyanga mu shivala shinu, muve ni ikholo. Ranji muhinzilu, shichila inzi Mwami Nyasaye wi Mikaanda Chiliihe ndi na munyi.

5 Lwa mwarula mu shivala shia Misri, nalaaka ndi niitsa khuvetsanga na munyi shia khase khosi. Khali ndio, shili na munyi; muvuli khuria.”

6 Mwami Nyasaye wi Mikaanda Chiliihe avoolanga, “Niitsa khutechelitsa vwangu yuvu likulu nende lilova, khali inyanza nende shivala.

7 Niitsa khutechelitsa vandu vi tsimbia tsiosi, khu miandu chiavo chiosi chililerwa munu, khandi nilitsulitsa Litempeli lianje ni miandu. Inzi Mwami Nyasaye wi Mikaanda Chiliihe mali khuvoola.

8 Ifetsa nende itsahabu ni vianje.

9 Vukhumi vwi Litempeli liyia yili vuliitsa khuvira vwi Litempeli lialiho liu khuraanga; khandi niitsa khuchila vandu vaanje valinyola vuhinda nivali havundu hanu. Inzi Mwami Nyasaye wi Mikaanda Chiliihe mali khuvoola.”


Muprofeti Yareeveshitsa Inganakani khu Vasalisi

10 Khulitukhu lia makhomi kavili na kane liu mweli wa tisa, khumuhika kwa khavili, lwa Dario yali niyamihanga, Mwami Nyasaye wi Mikaanda Chiliihe yalomoloma nu Muprofeti Hagai.

11 Mwami Nyasaye wi Mikaanda Chiliihe yamuvoolela, “Reeva vasalisi vakhukhonye inganakani khuchipa lireevo yili:

12 Niiva mundu aliitsa khuchinjila inyama yatakaswa mu lupindo lwi inguvu yeye, ma lupindo lwelwe lutiili khu mukati, inoho inyungu, inoho idivai, inoho makura, inoho shiukhulia shiosi lukanu, shinyala khukwa shitakatifu?” Vasalisi vamuchipa, “Shishinyala khukwa shitakatifu tawe.”

13 Nalwo lwa Muprofeti Hagai yareeva, “Niiva mundu aliitsa khuva woneshe natiili khu mmbili ku mukhutsu, natiila khali khu shiukhulia shiosi shili hanu, shiukhulia shienesho shinyala khuva shioneshe?” Vasalisi vamuchipa, “Ni kilikali, shiliitsa khuva shioneshe.”

14 Nalwo lwa Muprofeti Hagai yavoola, “Mwami Nyasaye avoolanga ndi makhuva malala mele, nako kali khu vandu vuluhia yulu khandi nako kali khu shia shindu shiosi shia varaakanga mu milimi. Shia musango kwosi kwa vahaananga khu vwaali kwonoshe.”


Mwami Nyasaye Yalaaka Aliitsa Khuvakasitsa

15 Mwami Nyasaye avoolanga, “Shiumunyala khulolakhu makhuva kamukwila tawe? Khali numushili khuraanga khumbakha vuyia Litempeli lianje,

16 mwali vandu vi liiva shina? Mwasimukha numutsia khu shivoho shi virwi vi imu, numukanakananga muliitsa khunyolakhu imu tsikilo 200, navutswa mwanyolakhu tsikilo 100. Mwasimukha numutsia khuteeha idivai tsilita 100 khurula havundu ha valombelanga, navutswa mwanyola vutswa tsilita 40.

17 Ninzi wachila imbuutsa yi shimiyu nende imbula ya machina khwononyinya shia shiraakwa shiosi, shia mwachelitsanga khuraaka; navutswa khali ndio, mwambakhana khukalukha khwinzi Mwami Nyasaye.

18 Yili nalio litukhu lia makhomi kavili na kane liu mweli wa tisa, litukhu liu musinji kwi Litempeli kwamalwa khwalwa. Lindilili mulole katsitsanga khwikholekha khuraanjila nunundi.

19 Imu inyala khuva yarikalakhu mu shiachi? Musala ku musabibu, mukhuyu, pomenguraneti nende musayituni kunyala khuva kushimeelanga khuvula khwama matunda? Niitsa khumukasitsa khuraanjila khulitukhu linu.”


Khuli Mwami Nyasaye Yalaaka Zerubabeli

20 Khulitukhu lilala lienelo, khulitukhu lia makhomi kavili na kane, Mwami Nyasaye yalomoloma lwa khavili nu Muprofeti Hagai.

21 Yamuvoolela, “Simukha utsi khuvoolela Zerubabeli, uli gavana wa Yuda, ‘Ndi himbi khutechelitsa likulu nende lilova,

22 khandi khutivitsa visoko vu vwami vi vivala. Ndi himbi khumulula tsingulu tsia vami vamihanga vandu vi tsimbia tsiosi, nu khutivitsa makaare kiliihe nende vandu vakahilanga. Tsifarasi tsiavo tsiliitsa khukhutsa, khali vandu vatsihilanga valiitsa khwiirana vene khuvene.

23 Khulitukhu lienelo, niitsa khukhuvukula yivi murumishi wanje Zerubabeli mwana wa Shalitieli. Niitsa khukhukhola wamihe khuvirila mu lira lianje, shichila nivi wa narovola. Inzi Mwami Nyasaye wi Mikaanda Chiliihe mali khuvoola.’ ”

© The Bible Society of Kenya, 2013

Bible Society of Kenya
Lean sinn:



Sanasan