AYUBU 34 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Nalwo lwa Elihu yavoola,

² “Munyi vandu vu vusitsa, hulili makhuva kaanje; munyi vamuli ni limanya, mumbulishitsi.

³ Maroyi kahulilanga makhuva kavoolwangwa khuli lulimi lutsanzamanga shiukhulia.

⁴ Leshi khurovole likhola liu vulunji; leshi khweke vene kali malahi.

⁵ Ayubu avoolanga, ‘Mbula vutamanu vwosi vwa nakhola, Nyasaye wanzambakhanila katoto;

⁶ khali niiva mbula vutamanu vwosi, navutswa vambukulanga khuli mundu muvehi; likuule lianje livula lunyasi, khali niiva mbula vwoni vwa nakhola.’

⁷ Ni viina unyala khusasanyinywa khu Ayubu, wambakhananga khuha Nyasaye luyali.

⁸ Usanganga ni shituma shia vandu vatamanu nu khuchenda na vandu vooni.

⁹ Yavoola, ‘Mundu avulakhu vukhonyi vwa nyolanga lwa achelitsanga khuyaanzitsa Nyasaye.’

¹⁰ “Khulwa yako, munyi vandu vi limanya, mumbulishitsi! Nyasaye shianyala khukhola shindu shitamanu tawe; khandi Nyasaye Uli Ikulu khu Viosi avulakhu vutamanu vwosi.

¹¹ Arunganga mundu khurulana khu vikholwa vievie; shindu shiavetsanga nakholi khuvakhola khuli kenyekhanga vakholwi.

¹² Nyasaye shia kholanga vutamanu tawe; akholelanga shia mundu wosi likhola liu vulunji.

¹³ Nyasaye ashili khureevakhu mundu tsingulu tsiu khwamiha khulilova; mundu avulakhuho wamuha vunyali vu khusinjilila vindu viosi mu shivala.

¹⁴ Niiva Nyasaye yakhavukuli khandi miuya chihaananga vulamu,

¹⁵ khu shia mundu wosi ushili mwoyo yakhavele niyakhutsa, khukalukhana khukwa khandi malova.

¹⁶ “Niiva uli ni limanya, hulili yaka; uhulishitsi makhuva kambolanga.

¹⁷ Unyala khuva ukhalachilanga Nyasaye wi likhola liu vulunji? Ukanakananga wayambakhana katoto?

¹⁸ Nyasaye akhalachilanga vami nende vamihi nivali vandu vi shikhaya inoho nivali vatamanu.

¹⁹ Shiayaanzanga vamihi inoho vahinda khu vamanani tawe, shichila neye waloonga shia mundu wosi.

²⁰ Mundu akhutsanga khali nakhamanyikhu. Nyasaye ashutanga vandu shivoko nu khuvativitsa; yiiranga vali nu vunyali vuchila khukhonywa.

²¹ “Aheenzanga shia shindu shiosi shia vandu vakholanga, khandi wamanya ka vakholanga.

²² Shisuundii shivulakhuho shimwamu tititi shiu mundu mwoni anyala khwivisamu khu Nyasaye avuli khumulola.

²³ Nyasaye avulakhu shivune shiu khuviritsa litukhu lia vandu valiitsa khwitsa khuye khukhalachilwa.

²⁴ Ativitsanga vami vali ni tsingulu vuchila khurunishitswa, nu khwamihitsa vandi mu vwiyangu vwavo.

²⁵ Lwa yamanya ka vakholanga; avativitsanga nivarula khu vunyali vwavo nu khuvamulula mu vutukhu.

²⁶ Asalilitsanga vandu shichila vutamanu vwavo, ha vandu voosi vanyala khuvalolela,

²⁷ shichila vamala khumulekha vayambakhana khumulonda, khandi valechelitsanga malako keke koosi.

²⁸ Vanika vamanani khulila tsikhwili khu Nyasaye, khandi nahulila khuli valilanga nivenya khukhonywa.

²⁹ Navutswa niiva Nyasaye anyala khuhonjela, ni viina unyala khumukhalachila? Naleshi khukholakhu shindu, ni viina unyala khuvoola akholanga shindu shitamanu? Niiva anyala khwivisa, ni viina unyala khumulola? Nikhali neye ulindanga shivala nende vandu voosi,

³⁰ khwikalila mundu mutamanu wakorwa Nyasaye khwamiha khuvula khureeka vandu mireeko chiu khukwamu.

³¹ “Ayubu, wiyame vwoni vwovwo khu Nyasaye, nu khuhaana lilaaka liu khuvula khukholakhu vwoni khandi.

³² Unyala khuva wareevakhu Nyasaye khukhumanyinya vutamanu vwovwo, nu khuhuchilila khulekha khukhola vindu vitamanu?

³³ Lwa wambakhananga khulonda ka Nyasaye yenyanga ukanakananga aliitsa khukhukholela ka wenyanga? Yivi mwene umali khuviritsa ku khukhola, navutswa inzi tawe; khulwa yako, khuvoolele makhuva ka ukanakananga.

³⁴ Ni kilikali, mundu wi limanya anyala khumbolela; mundu uli nu vusitsa aliitsa khumbulila nu khuvoola

³⁵ ndi Ayubu alomolamanga vuchila khurumishila vwoongo, makhuva ka avoolanga koosi kavula vucheli.

³⁶ Khutukha Ayubu arunishitswi mu ka mwene avoolanga shichila alomolomanga khuli mundu mutamanu.

³⁷ Ameetanga mahingani khu vwoni vwevwe; akholelanga Nyasaye shihenye henye imbeli weru voosi.”