AYUBU 31 - IBIBILIA INDAKATIFU MU LUTIRICHI LWITAKHO NENDE LWISUKHA

¹ “Inzi mwene mali khukhola lilakano ni tsimoni tsianje; nyala ndina khuheenza khu mwana wi shikhana muchima, nu khumwikomba.

² Ni shina shia Nyasaye anyala khukhola inzi, Ni shina shiu Mwami Nyasaye Uli Ikulu khu Viosi yambishila?

³ Matiinyu kanyala khuvula khukwila vandu vatamanu, vutiinyu vandu vakholanga vindu vitamanu?

⁴ Nyasaye wamanya tsinjila tsianje, khali alolanga shia shindu shiosi shia inzi mwene kholanga.

⁵ “Nikava nyala khuva navehelakhu mundu, inoho khukaatakhu vandu,

⁶ leshi Nyasaye ampimile khu tsilaatili tsiatoto, alole khuli mbula vutamanu.

⁷ Niiva narula khu injila inunji, nikhola vindu vitamanu, khali ninzononyinywa nu vwoni,

⁸ nu vulahi vandi khulia vindu via inzi mwene naraka, khali nzikombanga viraakwa vianje mu mulimi khurinyuulwa.

⁹ “Niiva nyala khuva nayikombakhu mukhali wu mundu wundi, inoho khukonekha ha muliango ku mureende wanje,

¹⁰ khali nzikombanga mukhali wanje asiele musatsa wundi, khali vasatsa vandi vakone neye.

¹¹ Shikholwa shirio shiakhaleri tsisoni, vwoni vu khukhalachilwa nu mukhalachi.

¹² Kakhavele khuli mulilu kulaalitsanga nu kutivitsa; khutivitsa shia shindu shiosi shiandi nashio.

¹³ “Niiva nayambakhana khukholela katoto mulala khu varumishi vaanje vasatsa nende vakhali, nivali ni likhuva livanyashitsanga shichila inzi,

¹⁴ ni shina shianyala khukhola lwa Nyasaye aliitsa khukhalachila? Lwa aliitsa khuva narunishitsanga, ni shina shianyala khumuchipa?

¹⁵ Nyasaye mulala mwele waloonga inzi neye waloonga khandi varumishi vaanje.

¹⁶ “Niiva nayambakhana khukhonya vandu vamanani, khukhola vakhutsakhali khuvula khuva ni lisuuvilitswa,

¹⁷ inoho khulia shiukhulia shianje wonyene, mu visandu khutsililila khuva ni inzala;

¹⁸ navutswa khurula mu vuvukha vwanje namulindanga khuli tata wewe, khurula nishili mwana nimililanga vakhutsakhali.

¹⁹ Nikava nalolakhu mundu nakhutsanga shichila avula tsinguvu, inoho mumanani vuchila tsinguvu tsiu khwifwala,

²⁰ Nakhamuheele inguvu yalombwa khu vwoya vwi likondi lianje, khunzitsominya mu mwoyo kwekwe.

²¹ Niiva nyala khuva nasiomeelakhu khusalilitsa muvisandu, nimanyi ndi nakhonywa khukuura mushiina,

²² khali nzikombanga makhono kaanje khumenekwa; khutong'olwa muvunganyilu vwa maveeka kaanje.

²³ Lwa naria litivitswa khurula khu Nyasaye, khandi naria vunyali vwevwe, shinali nakhola kenako tawe.

²⁴ “Niiva nyala khuva nasuuvilila itsahabu, inoho khura lisuuvilitsa mu itsahabu inyukhu yonyene;

²⁵ Niiva nyala khuva nayikhoyelakhu mu miandu chianje minyishi, inoho khwilola lwa ndi navio mu vunyishi;

²⁶ Niiva nyala khuva nalola khuli liuva liang'ang'anga, inoho khuli mweli kwisuundanga mu vulahi vwakwo,

²⁷ shili khukaatilitswakhu khuviha luyali lwa vitsunzunanga khusaala khuvio;

²⁸ khali kenako kakhavele vwoni vu khukhalachilwa nu mukhalachi, shichila nakhavele mundu muvehi imbeli wa Nyasaye uli mwikulu.

²⁹ “Nyala khuva nayaanzililakhu khulola mutsiku wanje nativitswangwa, inoho khuyaanzitswa lwa matiinyu kamukwilanga?

³⁰ Shili khulomolomakhu likhuva liu vwoni, khumwenyela likhutsa khuvirila khu shilaamo.

³¹ Varumishi vaanje vavoolanga havulavu, shia mundu mucheni yinjilitswangwa mu inzu yanje.

³² Khali mundu mucheni avulakhuho wakonakhu mu tsinjila tsi litaala, Inzu yanje yayikulilwa vandu vali khu luchendo.

³³ Nyala khuva navisakhu vutamanu vwanje khuli vandi vakholanga? Nyala khuva nayambakhanakhu khuvoola havulavu vwoni vwanje?

³⁴ Shinali nariakhu khusinjila imbeli wi shituma shia vandu, inoho khuhonjelakhu vutswa inoho khwiyikalilakhu munzu tawe, shichila nali naria khuchaywa.

³⁵ Nakhikombi mbe nindi nu mundu wosi unyala khumbulishitsakhu! Khutuuya muhuuli kwanje khu shia shindu shiosi shiamboli. Nakhavoolele Nyasaye Uli Ikulu khu Viosi anjipe! Nakhikombi vindu vichilanga mutsiku wanje nanzaala khuhandikwa!

³⁶ Vwakhavele vulahi ninzifwali khu maveeka kaanje, inoho khuvira khu murwi kwanje khuli itaachi.

³⁷ Nakhavoolele Nyasaye shia shindu shiosi shia nakhola, khwisuunda khuye imbeli wewe khuli mwana wu mwami.

³⁸ “Nikava nahuuva mulimi kwa ndakamu viraakwa nu khunuula vene mulimi kwenoko,

³⁹ nikava naliakhu viraakwa viachesamu vuchila khurunga, khali khuchila vene kwo nivakhutsa;

⁴⁰ nu vulahi mavwa khumeelamu havukono hi inganu, khali mavaanze havukono ha ishayiri.” Ayubu yamalila makhuva keke.