AYUBU 29 - IBIBILIA INDAKATIFU MU LUTIRICHI LWITAKHO NENDE LWISUKHA

Ayubu Yamalila Makhuva Keke

¹ Ayubu yatsililila khulomoloma khandi, navoola,

² “Nzikombanga liiva lianje live khuli mieli chiali chia khale, mumatukhu ka Nyasaye yanindanga;

³ mumatukhu ki itaaha ya Nyasaye yanzashilanga, ninjenda mu shisuundi shichila vulavu vwevwe.

⁴ Nako matukhu ka nali ni tsingulu, mumatukhu ka Nyasaye yalindanga hango hanje;

⁵ lwa Nyasaye Uli Ikulu khu Viosi yali nashili ninzi; lwa vaana vaanje vali nivashili ninzi.

⁶ Mumatukhu kenako, tsing'ombe tsianje nende tsimbuli tsiarulanga maveele manyishi; khandi misala chianje chi misayituni nichimeela mu tsinyanda.

⁷ Isaa yosi ya nakananga na vasakhulu vi litaala khuvukula shisoko shianje mu shikhaalo shiavo,

⁸ vayayi vavukha visuundanga haluveka nivandoli mumoni, khali vasakhulu vasinjilila khumba luyali.

⁹ Lwa vimilili va vandu vandolanga valekhanga khulomoloma, nivahonjela.

¹⁰ Khali vimilili vamanyikhana muno vahonjelanga, nivavula shia vavoola.

¹¹ Lwa vandu vahulila makhuva kaanje, va nzitsominyanga, lwa vandola ni tsimoni tsiavo, valomoloma vindu vilahi khwinzi;

¹² shichila nakhonya vamanani ni venyi khukhonywa; khandi vavisandu vali nivavula mukhonyi.

¹³ Mundu wali nakhutsanga yanzitsominya; nachila vakhutsakhali khuva nu vuyaanzi mu mioyo chiavo.

¹⁴ Nifwala likhola liu vulunji, nikava khuli inguvu yanje; katoto ni kava khuli ikaanzu yanje nende shilemba.

¹⁵ Nali khuli tsimoni khu vandu vavekhula, khandi khuli vilenje khu vandu valema.

¹⁶ Nali khuli tata khu vamanani; khali nikhonya vacheni mu vutiinyu vwavo.

¹⁷ Nativitsa tsingulu tsia vandu vatamanu khali nimbonyinya vandu va vali nivatambitsanga.

¹⁸ Nalwo lwa nakanakani, nimbola, ‘Nakhutsila mu inzu yanje, khandi nzililile khuhindila khumihika chinyala khuvula khuvalitswa khuli muyeeshe;

¹⁹ shichila ndi khuli musala kwi miili chitukhanga khu matsi, ni liime khu tsiasia tsiakwo mu vutukhu vwosi.

²⁰ Shia mundu wosi yanzitsominyanga shia litukhu; ninzilila khuva ni tsingulu khumatukhu koosi.’

²¹ “Vandu vambulishitsa, nivalindilila; khuhonjela khuhulila inganakani yu khukhonywa.

²² Nimali khulomoloma, vakhaywa khulomoloma; makhuva kaanje kavinjila muvo.

²³ Vanindilila nomolome khuli valindililanga imbula; valindilila nu mwoyo kwosi, khuli valimi valindililanga imbula mumatukhu ku khuraaka.

²⁴ Lwa vali nivavula lisuuvilitsa nali nu vuyaanzi mumoni, vuyaanzi vwanje vwa navamanyinya vwa vatinyilitsa.

²⁵ Navavoolela shia vakhola, nimba khuli mwimilili wavo; namenyanga mu vandu venavo khuli mwami mu mukaanda kwa vasikali veve; Nali vutswa khuli mundu uleminyanga mwoyo kwa vandu vikhulanga.”