AYUBU 1 - IBIBILIA INDAKATIFU MU LUTIRICHI LWITAKHO NENDE LWISUKHA

Shetani Yachela Ayubu

¹ Khwaliho khale nu mundu mu shivala shia Uzi walaangwangwa Ayubu. Mundu mwenoyo mu limenya lielie yali mundu wi likhola liu vulunji vuchila imbala yosi. Ayubu mwenoyo yali waha Nyasaye luyali, khandi yali waria khukhola vwoni.

² Ayubu yali wayivula vaana vi shiyayi saba nende vi shikhana vavaka.

³ Yali wavaaya makondi tsiheelefu saba ni tsingamia tsiheelefu tsivaka. Yali ni shiayo shi tsing'ombe iheelefu indala nende tsipunda tsimia tsiranu. Yali na varumishi vanyishi. Neye wali mundu muhinda muno khuvira vandu voosi vamenyanga khuluveka luli ivukwi.

⁴ Vaana veve vi shiyayi vali vamenya nivanala khukhola mulukha kwi lilia lia halala mu shia inzu yu mwana wewe khulitukhu lielie liaviritswa; khandi valaanganga vambotso vavo vavaka khwitsa khulia nu khung'wa navo.

⁵ Lwa litukhu lienelo liali niliakhatukha, Ayubu yalaanganga halala vaana veve khuvakhola khuva vanihu. Ayubu yavukhanga mu tsindolo nu kushili mu mavwevwe khukhola musango kwi shihanwa shiu khusambwa; nakanakananga, “Haundi vaana vaanje vanyala khuva vakholi vwoni nu khunyeka Nyasaye mu mioyo chiavo.” Ayubu yali wanala khukhola shikholwa shienesho shia khase khosi mu limenya lielie.

⁶ Litukhu lindi, tsinjelosi tsitsa khwimanyinya tsiene imbeli wu Mwami Nyasaye; khali Shetani yitsa natsio.

⁷ Mwami Nyasaye yareeva Shetani, “Ni hena ha urula?” Shetani yachipa Mwami Nyasaye, “Ndula khuhuya huya shia havundu hosi khulilova, nu khuchenda chenda shia havundu hosi.”

⁸ Mwami Nyasaye yareeva Shetani, “Ni kilikali, wamanya murumishi wanje Ayubu. Mundu avulakhuho khulilova khunu khuli ye; nu mundu wi likhola liu vulunji vuchila imbala yosi. Aheetsanga inzi Nyasaye luyali, khandi waria khukhola vwoni.”

⁹ Shetani yachipa Mwami Nyasaye, “Usuuvilanga Ayubu asaalanga khu Nyasaye mu shikhaya?

¹⁰ Nivi wamenya numulindanga shia khase khosi halala na vandu vi inzu yeye nende vindu viosi viali navio. Ukasitsanga shia shindu shiosi shia kholanga; khandi wachila ali ni miandu minyishi mu shivala.

¹¹ Navutswa chelitsakhu vutswa nunundi khumunuula vindu viosi viali navio, nalwo lwa aliitsa khukhwambakhana havulavu!”

¹² Mwami Nyasaye yavoolela Shetani, “Nu vulahi, unyala khumukhola ka mwene wenyanga khulondokhana khu miandu chiechie chiali nachio; navutswa lekha khumusalilitsa?” Nalwo lwa Shetani yarula imbeli wu Mwami Nyasaye.

Vaana va Ayubu Vativitswa ni Miandu Chiavo

¹³ Litukhu lindi, lwa vaana va Ayubu vi shiyayi nende vi shikhana vali nivaliitsanga shiukhulia nu khung'wa mu inzu ya amwavo wavo mukhulundu;

¹⁴ mundu yarumwa khu Ayubu, maniyitsa niyeselanga miuya navoola, “Khuvele nu khulimanga ni tsihili mu mulimi, na tsipunda tsivele ni tsiayaanga vunyasi himbi hawenaho.

¹⁵ Nonoho Vasabea vakhuseeri nivakhunuula miruku chiosi. Viiri varumishi vovo vaveleho voosi. Ninzi wonyene wihonolokha khwitsa khukhuvoolela makhuva kenako.”

¹⁶ Lwa yali nashilomolomanga, murumwa wundi yitsa; navoola, “Likulu liahilikana khurula mwikulu, nililaliitsa makondi nende varumishi. Ninzi wonyene wihonolokha khwitsa khukhuvoolela makhuva kenako!”

¹⁷ Lwa yali nashilomolomanga, murumwa wundi yitsa; navoola, “Mikaanda chivaka chia vasikali va Vakalidayo vakhuseera, nivavukula tsingamia, nu khwiira varumishi vovo voosi. Ninzi wonyene wihonolokha khwitsa khukhuvoolela makhuva kenako!”

¹⁸ Lwa yali nashilomolomanga, murumwa wundi yitsa; navoola, “Vaana vovo vi shiyayi nende vi shikhana vavele nivaliitsanga shiukhulia, khandi nivang'wetsanga idivai mu inzu yu mwana wavo mukhulundu,

¹⁹ nonoho lwa imbuutsa inditoho yahuutsa khurula mu shiangalangwi, nikwishitsa inzu. Inzu yakwa khuvo, nivakhutsa. Ninzi wonyene wihonolokha khwitsa khukhuvoolela makhuva kenako!”

²⁰ Nalwo lwa Ayubu yasinjila narandula tsinguvu tsietsie, manaveka liswi lielie khu murwi. Yakona hasi mahunama naraanga khusaala khu Nyasaye.

²¹ Yavoola, “Nivulwa nindi shekenye, niitsa khukalukhayo nindi shekenye. Mwami Nyasaye neye wahaana, khandi neye umali khuvukula. Lira liu Mwami Nyasaye litsominywi.”

²² Khali niiva vindu vienevo viosi viakholekha, Ayubu yalekhana nu vwoni inoho khulolakhu shindu shitamanu khulondokhana khu Nyasaye tawe.