AMOSI 5 - IBIBILIA INDAKATIFU MU LUTIRICHI LWITAKHO NENDE LWISUKHA

Khwenya Vandu Vikanile

¹ Munyi Vaisraeli, muhulishitsi, muhulishitsi lwimbo lu khwikhula lwa nzimbanga,

² Munyi Vaisraeli mumali khukwa muvula khuli muliitsa khusinjila! Mwarikwa vonyene vutswa mu shivala shienyu; khali muvula mundu unyala khumusinjilitsa.

³ Mwami Nyasaye avoolanga, “Vandu iheelefu indala valiitsa khutsia khukwana nikhali ni isavu ya vandu imia indala vonyene valiitsa khukalukha; valiitsa khutsia imia indala nikhali valiitsa khukalukha likhomi vonyene.”

⁴ Mwami Nyasaye avoolelanga Vaisraeli, “Mukhave inzi khu mutsililile khuva mwoyo;

⁵ navutswa muvuli khukhava Betseli inoho khutsia Gilugali inoho khwambukha khutsia Beresheba; shichila ni kilikali, vandu vi litaala lia Gilugali valahilwa mu vuhaambe, vi litaala lia Betseli valiitsa khutivilayo.”

⁶ Mukhave Mwami Nyasaye khu mutsililile khuva mwoyo! Niiva mulambakhana, aliitsa khuyelitsa nu mulilu vandu vi inzu ya Yosefu, nu khumulula vandu vi litaala lia Betseli, khali mundu avulakhuho uliitsa khukutsiminya!

⁷ Munyi vandu vatamanu! Munyi vamukoyanyinyanga katoto, nu mukakhola khuva khuli lunyasi lululu khu vamanani khumiila; khandi mulolanga likhola liu vulunji khuli ni shindu tawe.

⁸ Woyo walomba Kilimia nende Orioni, ukalukhanyinyanga shisuundi khukwa mbasu, mbasu khukwa shisuundi. Neye uleranga halala matsi khurula mu inyanza, nakhuvitsa imbula khulilova. Lira lielie nu Mwami Nyasaye!

⁹ Neye utivitsanga vi tsingulu, nu khusambulanyinya tsimbinga tsiavo.

¹⁰ Munyi mwambakhananga mundu wenyanga ku vulunji khurweshitswa mushiina, khali woyo ulomolomanga katoto.

¹¹ Munyi mutambitsanga vamanani, numuvavoolela varunji mirungu chi inganu khuvira shicheelo, munyi mwayumbakha tsinzu khu machina kakhongwa, navutswa mwambakhananga khumenya mutsio; mwaraaka mu milimi misabibu milahi, navutswa muliitsa khuvula khung'wakhu idivai khurula khuchio;

¹² shichila namanya muli nu vutamanu vunyishi, khandi vwoni vwenyu nu vunyishi muno -- munyi vamunyashitsanga vandu vi likhola liu vulunji, vamuheelwa asooya, nu khwikalila vamanani khukholelwa vwatoto mushiina.

¹³ Khulwa yako, mundu wacheliha aliitsa khuhonjela mumatukhu kenako, shichila inyinga yeneyo iliitsa khuva indamanu.

¹⁴ Mukhave khukhola malahi, navutswa mulekhane nu vutamanu, nikanyalikha mutsililile khuva mwoyo; nalwo lwa Mwami Nyasaye, uli Nyasaye wi Mikaanda Chiliihe, aliitsa khuva na munyi khuli vene muvooli.

¹⁵ Mulekhane ni likhola liu vutamanu, muyaanze malahi; rweshitsi vwatoto mushiina; haundi, Mwami Nyasaye, uli Nyasaye wi Mikaanda Chiliihe, aliitsa khuvela tsimbavasi vandu varikala vi inzu ya Yosefu.

¹⁶ Khulwa yako, Mwami Nyasaye, uli Nyasaye wi Mikaanda Chiliihe, ni kilikali, Mwami Nyasaye avoolanga, “Vandu valiitsa khulila tsikhwili shia havundu hosi mu litaala likali; nivavoola mu tsinjila tsiosi tsi litaala likali, ‘Wooyi! Khuli khu vutiinyu! Khuli khu vutiinyu!’ Valimi valiitsa khulaangwa khwitsa khulila tsikhwili, vandu vechela khwikhula khwitsa khwikhula.

¹⁷ Vandu valiitsa khuhulilikhana nivalililanga mu milimi chiosi chi misabibu; shichila niitsa khukhalakanyila hakari henyu khumusalilitsa. Inzi Mwami Nyasaye mali khuvoola.”

Litukhu liu Mwami Nyasaye

¹⁸ Wooyi! Muli khu vutiinyu munyi vamulindililanga khulola nu mwoyo kwosi litukhu liu Mwami Nyasaye! Shichila shina mwenyanga litukhu liu Mwami Nyasaye lienelo? Liliitsa khuva li shisuundi, vuchila khuva nu vulavu;

¹⁹ liliitsa khuva khuli mundu wilukhanga isimba, navutswa khwakana ni likunyuli! Inoho khuli mundu winjilanga mu inzu yeye atiilanga mukhono kwekwe khu lisisi, inzukha imuluma!

²⁰ Ni kilikali, litukhu liu Mwami Nyasaye lilava li shisuundi, vuchila vulavu, lia vandu khutuunya, vuchila vuyaanzi vwosi.

²¹ Mwami Nyasaye avoolanga, “Nayambakhana, nachaya milukha chienyu shichila idini; shinyala khuyaanzilila vikhaalo vienyu tawe.

²² Khali niiva mumbetsanga vihanwa vienyu viu khusambwa nende vihanwa vi imu, mbulakhu khuli nyala khuvihuchilila; khandi vihanwa vienyu viu khulera milembe vi miruku chienyu mikhomeelu shinyala khuvihuchilila tawe.

²³ Muvuli khunzimbilakhu tsinyimbo tsienyu tsi liyooko; khali shimbulishitsa vukhana vwenyu tawe.

²⁴ Navutswa leshi katoto kalangamishwi khuli matsi ku muchela ni kakholomokhanga; likhola liu vulunji khuli muchela kuvulanga khukhaama.

²⁵ “Munyi Vaisraeli, mumatukhu ka mwamenyanga mu shiangalangwi khumihika makhomi kane, munyala khuva mwanderelakhu khali hati hene vihanwa vi misango nende vihanwa?

²⁶ Navutswa mumatukhu kenako, mwavukula shimanyilu shia Sakutsi, uli khuli mukali wa vanyasaye venyu; khandi shimanyilu shia Kayiwani, uli nyasaye wenyu wi inyining'ini, nivili vimanyilu via vene mwilombela.

²⁷ Khulwa yako, niitsa khumuhila mu vuhaambe, mu shivala khuluveka luli ivukwi wi litaala lia Damasika. Inzi Mwami Nyasaye mali khuvoola. Lira lianje ni Nyasaye wi Mikaanda Chiliihe.”