3 YOHANA 1 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Ninzi musakhulu. Mbandichilanga muyaanze wanje Gayo, wa nayaanza toto muno.

² Mulina wanje wa nayaanza, khwikombelanga ndi shia shindu shiosi shikhwanguhili khandi uve mulamu; manyi nindio kali mu mwoyo kwokwo.

³ Nali nu vuyaanzi vunyishi muno, lwa valala khu vasuuvili vitsa hanu, nivambolela katoto khulondokhana khu limenya liolio, khuli toto wumenyanga khulondokhana khu katoto.

⁴ Shindu shivulakhuho shinyala khukhola khuva nu vuyaanzi vunyishi, khuvira khuhulila ndi munyi lwa muli khuli vaana vaanje mumenyanga khulondokhana khu katoto.

Gayo Yitsominywa

⁵ Mulina wanje wa nayaanza, uli musuuvilwa mu muhinzilu kwa wu kholelanga vasuuvili voshio, khushila muno vandu vacheni va wakhamanyakhu tawe;

⁶ vamali khuvoolela vandu vi Likanisa makhuva khulondokhana khu vuyaanzi vwovwo. Nuyaanza wu vakhonye vatsililile nu luchendo lwavo munjila inyala khuyaanzitsa Nyasaye.

⁷ Vraanji luchendo lwavo mu muhinzilu ku khurumishila Kristo, vuchila khuhuchililakhu vukhonyi vwosi khurula khu vandu vatamanu vakorwa Nyasaye.

⁸ Khulwa yako, khwenyekhanga khukhonye vandu khuli venavo, khu khuve khusanganga mu muhinzilu kwavo mu katoto.

Vwavukhani Hakari ha Dioturefe nende Demeturio

⁹ Mali khuhandikakhu shindu khu likanisa; navutswa Dioturefe, wayaanza khuva mwimilili, wambakhane khumbulishitsakhu.

¹⁰ Khulwa yako, niiva nyala khwitsa, niitsa khumuvoolela havulavu shia shindu shiosi shia kholanga, vindu vitamanu via alomolomanga khulondokhana khu khutsi khandi vuvehi vwa avoolanga! Navutswa khali khumeeta khu kenako, wakaya shianyala khwinjilitsakhu munzu mwemwe vasuuvili tawe. Khali yikalilanga vandu vali ni lienya liu khuvinjilitsa nu khuvakhunga khurula mu likanisa!

¹¹ Mulina wanje wa nayaanza, lekha khulonda mwiima mutamanu; navutswa ulonde mwiima mulahi. Mundu wu kholanga kali malahi, neye wa Nyasaye; Mundu wu kholanga vindu vitamanu, ashili khulolakhu Nyasaye.

¹² Shia mundu wosi yitsominyanga Demeturio. Khali katoto kene kahaananga vushiahidi khulondokhana khuye. Khali khutsi khumeetakhu vushiahidi vweru, khandi mwamanya ndi ka khuvoolanga ni katoto.

Milembe Chiukhumalilikha

¹³ Mbele na makhuva manyishi ku khumuhandichila, navutswa shinyala khukahandika tawe.

¹⁴ Nganakananga khumulolakhu vwangu yuvu; khandi inzi mwene nomolome moni namoni na munyi.

¹⁵ Nyola milembe. Valina vovo voosi, vakhuheele milembe. Uhaane milembe chieru khu shia mulina weru wosi khutukha lwa voosi vanyola.