2 VAMI 9 - IBIBILIA INDAKATIFU MU LUTIRICHI LWITAKHO NENDE LWISUKHA

Yehu Yavekhwa makura Khuva Mwami wa Israeli

¹ Mumatukhu kenako, Muprofeti Elisha yalaanga muprofeti mulala khurula mu mukaanda kwa vaprofeti, namuvoolela, “Khola vwangu wirecheshe khutsia mu litaala lia Ramotsi, lili mu lusomo lwa Gileadi. Vukula ijaka ya makura ku musayituni iyi utsi nayo,

² khandi luva numali khutukhayo wenyekhanga ukhave mundu ulaangwangwa Yehu mwana wa Yehoshafati, khandi nali shisoni shia Nimushi. Ulamuhila munzu haluveka muvwivisi khurula mu valina veve.

³ Numali khukhola kenako, nalwo lwa utsukha khu murwi kwekwe makura ku musayituni yaka, nuvoola Mwami Nyasaye avoolanga, ‘Khuveshi makura, khukhwamihitsa khuva Mwami wa Israeli.’ Numali khukhola kenako, uliitsa khwikula muliango ulirulaho vwangu maliviri. Uvuli khucheleva!”

⁴ Muprofeti muvukha mwenoyo yasimukha, natsia mu litaala lia Ramotsi, lili mu lusomo lwa Gileadi.

⁵ Lwa yali niyakhatukhaho, yanyola vimilili va vasikali nivali mu shikhaalo. Muprofeti muvukha mwenoyo yavoola, “Yivi mwimilili wa vasikali, ndi ni likhuva lia nyenyanga khuvoolele.” Yehu yareeva, “Ni viina khu khutsi, wa wenyanga khuvoolela?” Muprofeti mwenoyo yachipa, “Yivi mwimilili wa vasikali, nivi wa nyenyanga khuvoolela.”

⁶ Mwami Yehu yasinjila, niyinjila munzu. Muprofeti muvukha mwenoyo yatsukha makura khu murwi kwa Yehu, navoola, “Mwami Nyasaye, uli Nyasaye wa Israeli avoolanga, ‘Khuvekhanga makura, khukhwamihitsa khuva Mwami wa vandu vu Mwami Nyasaye, nivali Israeli.

⁷ Uliitsa khumulula vandu vi inzu yu muruchi wowo Ahabu, khandi niitsa khuvanzila shisahi shia Yezebeli yasuundula shia varumishi vaanje, nivali vaprofeti khandi shia varumishi vaanje vandi voosi.

⁸ Vandu vi inzu ya Ahabu voosi nende vitsukhulu vavo, valiitsa khwiirwa. Niitsa khumulula shia mundu musatsa wosi urulanga munzu yeye, ave murukwa inoho muvoholole.

⁹ Niitsa khukhola vandu vi inzu ya Ahabu khuli nakhola vandu vi inzu ya Yerobohamu mwana wa Nebati, khandi khuli nakhola vandu vi inzu ya Bahasha mwana wa Ahiya.

¹⁰ Tsisiimbwa tsiliitsa khulia mmbili kwa Yezebeli mu lusomo lwa Yezireli; khandi mundu avulakhuho, uliitsa khuyeveela mmbili kwekwe mu shilindwa.’ ” Nalwo lwa yikula muliango, niyilukha.

¹¹ Lwa Yehu yasimukha, natsia ilwanyi khu varumishi veshie, mulala khuvo yamureeva, “Vindu viosi vinyala khuva ni vilahi? Shichila shina mundu mulalu woyo, niyitsa khukhulola?” Yehu yavachipa, “Umanyi vulahi mundu mwenoyo, khandi khuli alomolomanga.”

¹² Vamuvoolela, “Shikali katoto tawe! Khuvoolele shia mundu mwenoyo avooli.” Yehu avooli, “Mwami Nyasaye avoolanga, ‘Khuveshi makura khukhwamihitsa khuva Mwami wa Israeli.’ ”

¹³ Vilukhaka vwangu, nivavukula tsinguvu tsiavo khandi nivaala hasi khu viko via Yehu yali naseenikhu. Vakhuva shisiliva nivalaanjilila, nivavoola, “Yehu neye Mwami!”

Yehu Yiira Mwami Yoramu wa Israeli

¹⁴ Yehu mwana wa Yehoshafati, mwana wa Nimushi, yakhava khuli anyala khwiira Mwami Yoramu. (Khulitukhu lienelo, Yoramu nende Vaisraeli voosi vali nivashinji litaala lia Ramotsi, lili mu lusomo lwa Gileadi, khwikalila Mwami Hazaheli wa Siria avuli khulikwana;

¹⁵ nikhali Mwami Yoramu yali ukalushi khurula mu litaala lia Yezireli wa yali niyatsia khushilikhwa, lwa vasikali va Vasiria vamusalilitsa vululu muno, lwa yakwana Mwami Hazaheli wa Siria.) Nalwo lwa Yehu yavoola, “Niiva nindio mukanakananga, muvuli khulekhakhu mundu wosi khurula mu litaala, nu khutsia khuvoolela vandu makhuva yaka mu litaala lia Yezireli.”

¹⁶ Yanina mu likaare lielie liliihe, natsia mu litaala lia Yezireli, shichila Mwami Yoramu yali nashili khuhona, khandi Mwami Ahazia yali ukholomoshe khutsiayo khumulola.

¹⁷ Mulindi wali nali khu muhinzilu kwa shia khase khosi khu munaara kuli mu litaala lia Yezireli, yalola Yehu nende vasikali veve nivitsanga. Yalaanga, navoola, “Ndoli mukaanda kwa vasikali nivitsanga!” Yoramu yachipa, “Ruma muhili wi ifarasi atsi khurunishitsa, niiva ni valina inoho vatsiku.”

¹⁸ Muhili wi ifarasi mwenoyo, yasimukha natsia khwakanila Mwami Yehu, navoola, “Mwami Yoramu yenyanga khumanya, niiva witsanga khuli mulina wewe.” Yehu yamuchipa, “Kali nu vukhonyi shina khu yivi! Komokha wiyunji ninzi.” Mulindi mwenoyo yavoola, “Mundu wa waruma yatukha khuvo, navutswa wayambakhana khukalukha.”

¹⁹ Nalwo lwa Mwami Yoramu yaruma khandi muhili wa khavili wi ifarasi, wareeva Yehu lireevo lilala lienelo. Yehu yamuchipa khandi, “Kali nu vukhonyi shina khu yivi! Unonde inyuma wanje.”

²⁰ Mulindi mwenoyo yavoola khandi ndi mundu warumwa yatukha khuvo, navutswa wayambakhana khukalukha. Nalwo lwa yavoola khandi, “Mwimilili wi shituma shienesho, ahilanga likaare lielie liliihe khuli Yehu mwana wa Nimushi. Ahilanga khuli mundu walalukha.”

²¹ Mwami Yoramu yavoola, “Nzirecheshitsili likaare lianje liliihe.” Vakhola ndio, ye mwene nende Mwami Ahazia nivahila makaare, shia mulala nanina khu likaare lielie, khutsia khwakanila Yehu. Vakana naye mu mulimi, kwali kwa Nabotsi wi litaala lia Yezireli.

Mwami Yehoramu Yiirwa

²² Lwa Yoramu yalola Yehu yareeva, “Kanyala khuva witsanga khulera milembe?” Yehu yachipa, “Milembe chinyala khunyolekha munjila shina, niiva khushiliho ni liloko nende misambwa chia mama wowo Yezebeli yaraanjitsa?”

²³ Mwami Yoramu yakomokha niyilukha, nalaanjilila khu Ahazia, navoola, “Ahazia, ni shikholwa shitamanu khu vwamihi vwi shivala shieru!”

²⁴ Yehu yasomola vura vwevwe nalesa Yoramu mu shiliru, hakari ha maveeka keke. Muvanu kwalivira mu mwoyo kwekwe, nakhutsila mu likaare lielie liliihe.

²⁵ Yehu yavoolela Bidukari, wamukhonya khuhila likaare lielie liliihe, “Vukula mmbili kwekwe, ukusiuvi mu mulimi kwali kwa Nabotsi wi litaala lia Yezireli. Yitsushitsakhu khuli yivi ninzi, khwahilanga makaare keru kiliihe inyuma wa Ahabu nali tata wewe, lwa Mwami Nyasaye yavoola vuprofeti yuvu khulondokhana khuye:

²⁶ ‘Mukolovo kuvele nakhalola Nabotsi nende vaana veve vi shiyayi, niviirwangwa. Khulaakanga ndi niitsa khukhusalilitsila hanu mu mulimi mulala yuku.’ ” Nalwo lwa Yehu yavoolela mundu wamukhonyanga khuhila likaare lielie liliihe, “Vukula mmbili kwa Yoramu, ukusiuvi mu mulimi kwali kwa Nabotsi, khulu khurweshitsa lilaaka liu Mwami Nyasaye yali niyahaana.”

Mwami Ahazia wa Yuda Yiirwa

²⁷ Lwa Mwami Ahazia wa Yuda yalola kali nikakholeshe, yilukha natsia khu muhaanda kutsitsanga mu litaala lia Betsi-hagani. Yehu yamwilukhanyinya, nalaanjilila, “Mwiiri khali ye!” Vamusalilitsila mu likaare lielie liliihe, nali khu luchendo lwelwe lu khutikulukha khutsia havundu halaangwangwa Guri, himbi mu litaala lia Ibulehamu, navutswa yilukha natsia mu litaala lia Megido, nakhutsilayo.

²⁸ Varumishi veve vavukula mmbili kwekwe, nivakuvikha mu likaare lielie liliihe, nivakalushitsa Yerusalemi; vamuyeveela mu vilindwa via vami mu litaala likali lia Daudi.

²⁹ Ahazia yamiha Yuda khumuhika kwi likhomi nu mulala, nu kuli muhika kwa Yoramu mwana wa Ahabu, yali nali Mwami wa Israeli.

Yezebeli Yiirwa

³⁰ Lwa Yehu yatukha mu litaala lia Yezireli, Yezebeli yahulila makhuva kenako. Yavekha tsimoni tsietsie, nalomba liswi lielie khulolekha vulahi, khandi naheenzela ilwanyi khuvirila mu litirisha.

³¹ Lwa Yehu yali niyinjilanga mu shilivwa, yalaanjilila, “Yivi Zimuri! Nivi mulumindi wiira muruchi wowo! Shichila shina uli hanu?”

³² Yehu yaheenza ikulu mu litirisha navoola, “Ni viina uli khuluveka lwanje? Ni viina?” Vitsili vivili inoho vivaka, vamuheenza khuvirila mu litirisha.

³³ Yehu yavoola, “Musiuvi hasi!” Nalwo lwa vamusiuva hasi, masahi keke nikasalana khu lisisi nende khu tsifarasi, lwa tsia mutuuvachila hasi.

³⁴ Yehu yinjilamu nalia khandi nang'wa. Yavoola, “Mulinde vulahi mukhali walaamwa uyu, khandi nu muyeveele mmbili kwekwe mu shilindwa, shichila yali mwana wi shikhana wu mwami.”

³⁵ Navutswa lwa vasimukha nivatsia khumuyeveela mu shilindwa, shindu shivulakhuho shia vanyola, nikakhali vanyola shihanga shieshie, vilenje vievie nende makhono keke.

³⁶ Lwa vakalukha, nivatsia khuvoolelakhu Yehu makhuva kenako, yavoola, “Nako ku Mwami Nyasaye yavoola kaliitsa khwikholekha, lwa yalomoloma khuvirila khu murumishi wewe Eliya, navoola, ‘Tsisiimbwa tsiliitsa khulia mmbili kwa Yezebeli mu lusomo lwa Yezireli.

³⁷ Vivelo viu mmbili kwa Yezebeli viliitsa khusalana khuli masiingo, mundu alivula khumanyakhu ndi navio viali vivelo via Yezebeli.’ ”