2 VAMI 7 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Elisha yachipa, “Hulishitsi ku Mwami Nyasaye avoolanga! Mukamba isaa khuli yinu mutsitsanga khukuulila inganu tsikilo tsivaka shitonye shilala shi ifetsa, khandi ishayiri tsikilo sita shitonye shilala shi ifetsa mu litaala lia Samaria.”

² Mwimilili wa vasikali wu Mwami wa Israeli yali niyitiili khu mukhono kwekwe yavoolela Elisha, “Khali niiva Mwami Nyasaye aliitsa khulera imu inyishi khunjilila khuli imbula khurula mwikulu, yaka kanyala khwikholekha?” Elisha yamuchipa, “Uliitsa khulola mwene ni tsimoni tsiotsio nikakholekhanga, navutswa uliitsa khuvula khuliakhu, khali indala khutsio!”

Vasikali va Siria Vilukha

³ Litukhu lindi, khwaliho na vasatsa vane, vali nivalwala vuchele mu vwinjililu vwi shilivwa shi litaala lia Samaria. Vareevana vene khuvene, “Shichila shina khutsililile khwikhala hanu khutukha lwa khukhutsa?

⁴ Niiva khuliitsa khuvoola, ‘Lekha khwinjile mu litaala’ inzala ilimu, khandi nalwo lwa khuliitsa khukhutsilamu. Niiva khunyala khwikhala hanu, khuliitsa khukhutsa khandi. Khulwa yako, chendi khutsi mu mukaanda kwa vasikali va Vasiria, nu khuchinji mwikulu makhono keru khwihaana khuvo. Niiva valiitsa khuvula khukhwiira, khulatsililila khuva mwoyo; niiva valiitsa khukhwiira, ni kilikali khulakhutsa.”

⁵ Lwa shivala shiali ni shiakharaanga khumwama, vasimukha nivatsia mu maheemo ka vasikali va Vasiria vamenyamu; navutswa lwa vatukhaho, mundu avulakhuho wa vanyolaho.

⁶ Mwami Nyasaye yali ukholi vasikali va Vasiria, khuhulila liyooko khuli lia vasikali nivaroonjele, nivitsanga khuvakwana wa vali ni vali, ni tsifarasi nende makaare kiliihe; Vasiria nivakanakana ndi Mwami wa Israeli, usamulitsi vami va Vaahitse nende Vamisri nende vasikali vavo, khwitsa khuvakwana.

⁷ Vasikali va Vasiria vali nivilushi, shichila vulamu vwavo khulukolovo khwenokho, nivalekha maheemo kavo, tsifarasi, nende tsipunda tsiavo; khandi nivalekha maheemo ka vamenyamu khuli kavetsanga vutswa.

⁸ Vandu vali nivalwala vuchele, vatukha khundulu khwa maheemo ka vamenyamu, nivinjila mu lilala khuko. Valia nivang'wa, nivarulitsaho ifetsa, itsahabu nende tsinguvu, khandi nivatsia khuvivisa. Vakalukha nivinjila mu liheemo lindi, nivarulitsamu vindu vindi khandi nivavisa.

⁹ Navutswa lwa vavoolelana vene khuvene, “Ka khukholi shikali malahi tawe! Khuli na makhuva malahi nunundi, ka khunyala khuvula khuhonjela nako. Niiva khunyala khutsililila khulinda khutukha mu mavwevwe, ni kilikali khuliitsa khusalilitswa. Kholi vwangu khutsi khuvoolela vandu vi inzu yu Mwami Israeli!”

¹⁰ Vasimukha nivatsia khulaanga valindi vi shilivwa shi litaala, nivavoola, “Khwinjila mu maheemo ka vasikali va Vasiria vamenyamu, navutswa mundu avulakhuho wa khwalolakhu, inoho khwahulilakhu nalomolomanga. Khwalola vutswa tsifarasi nende tsipunda nitsiavohwa, maheemo ku khumenyamu, nikashili vutswa khuli Vasiria vakalekha.”

¹¹ Valindi vi vilivwa valanditsa makhuva kenako, nikavoolwa khu vandu vi inzu yu vwami.

¹² Mwami wa Israeli yavukha mu tsindolo mu vutukhu, navoolela varumishi veve, “Niitsa khumuvoolela ka vasikali va Vasiria virecheshe khukhola. Vamanyi ndi inzala ili hanu. Varuli mu maheemo ka vamenyamu khutsia khwivisa mumbulimu, nivakanakananga, ‘Ni kikali, valiitsa khurulamu, khandi khuvakumile nivashili mwoyo, khwinjile mu litaala lienelo.’ ”

¹³ Mulala khu varumishi veve yavoola, “Voolela vandu valala vavukuli tsifarasi tsiranu tsirikale mu litaala. Liiva liatsio liliitsa khuva khuli lia Vaisraeli voosi valekhwa hanu -- ni kilikali, tsiliitsa khuva vutswa khuli Vaisraeli yava voosi vamululwa. Khulwa yako, leshi khuvarumi khukhumanye kikholekha.”

¹⁴ Varovola vandu valala, Mwami wa Israeli navaruma mu makaare kavili kiliihe na mivaalo ku khutsia khurunishitsa kali nikakholeshe khu vasikali va Vasiria.

¹⁵ Vandu venavo vasimukha nivatsia, khali khutukha khu Muchela kwa Yorodani; khandi nivalola shia havundu hosi khu muhaanda tsinguvu nende vindu vindi, via vasikali va Vasiria vali nivaleshi lwa vilukhanga. Nalwo lwa vakalukha, nivavoolelakhu Mwami wa Israeli.

¹⁶ Vandu vi litaala lia Samaria vilukhaka nivatsia khuyaaya vindu mu maheemo, kali ka vasikali va Vasiria vamenyamu. Khulwa yako, inganu indahi tsikilo tsivaka yakuulitswa shitonye shilala shi ifetsa, khandi ishayiri tsikilo sita nikuulitswa shitonye shilala shi ifetsa.

¹⁷ Mwami wa Israeli yali narovole mwimilili wa vasikali wayitiilakhu mukhono kwekwe khusinjilila shilivwa, ma vandu nivamutuuvachila mu shilivwa, nakhutsa, khuli Elisha yali niyavoola khale, lwa Mwami wa Israeli yasimukha natsia khumulola.

¹⁸ Kakholekha khuli lwa Elisha yali niyavoolela Mwami wa Israeli, “Mukamba isaa khuli yinu mutsitsanga khukuulila inganu tsikilo tsivaka shitonye shilala shi ifetsa; khandi ishayiri tsikilo sita shitonye shilala shi ifetsa mu litaala lia Samaria.”

¹⁹ Mwimilili wa vasikali yali uvoolele Elisha, “Khali niiva Mwami Nyasaye, aliitsa khulera imu inyishi, khuli imbula khurula mwikulu, yaka kanyala khwikholekha?” Elisha yali namuchipi, “Uliitsa khulola ni tsimoni tsiotsio mwene ni kakholekhanga, navutswa uliitsa khuvula khuliakhu khali indala khutsio!”

²⁰ Nako kikholekha khuye vutswa, shichila vandu vamutuuvachila mu vwinjililu vwi shilivwa, nakhutsa.