2 VAMI 23 - IBIBILIA INDAKATIFU MU LUTIRICHI LWITAKHO NENDE LWISUKHA

Yosia Yakalushila Khukhola Lilakano

¹ Mwami Yosia yalaanga halala vimilili voosi va Yuda nende Yerusalemi,

² natsia navo mu Litempeli liu Mwami Nyasaye. Yali halala na vasalisi, vaprofeti nende vandu vandi voosi, nivali vahinda nende vamanani. Mwami Yosia yasoma nu mwoyo mukali imbeli wavo voosi shitabu shiosi shi lilakano shia vali nivanyoli mu Litempeli.

³ Yasinjila himbi ha irilu nakhola lilakano nu Mwami Nyasaye khu atsililile khumulonda, khutsililila khurweshitsa lilako nende malako keke nu mwoyo kwekwe kwosi nende tsingulu; khandi khukhola ka lilakano lienyanga kakholwi, khuli kahandikwa mu shitabu. Vandu voosi viyunga mu likhola lilakano lienelo.

⁴ Nalwo lwa Yosia yavoolela Mukali wa vasalisi voosi Hilikia, vasalisi vamukhonyanga, nende valindi vakholanga muhinzilu mu vwinjililu vwi Litempeli varulitse mu Litempeli shia shindu shiosi, shia vali nivarumishila khusaala khu musambwa kwa Baali, shi shifwanani shia Ashera nende shi shifwanani shi tsinyining'ini. Mwami Yosia yasamba nu mulilu vindu vienevo viosi ihale wene, khurula Yerusalemi himbi mu Luhoongo lwa Kiduroni; nahaana lilako likooshe lihilwi mu litaala lia Betseli.

⁵ Yarulitsa vasalisi voosi, va vami va Yuda vali nivatakasa khusamba vubani khu vwaali vwi misambwa mu lusoomo lwa Yuda khandi havundu handi himbi Yerusalemi -- vasalisi voosi vakholanga misango khu Baali, liuva, mweli, tsiplaneti, nende tsinyining'ini.

⁶ Yarulitsa shimanyilu shiu musambwa kwa Ashera mu Litempeli liu Mwami Nyasaye, nakuhila ihale wene khurula mu litaala likali, khukusambila mu Luhoongo lwa Kiduroni. Yakusionola nu kukwa lukuushi, nasalanyinya lukuushi lwenolo havundu ha vayeveelanga mivili chia vandu vakhutsa.

⁷ Yasambulanyinya havundu ha malaaya ki litempeli kamenyanga mu Litempeli (Naho havundu ha vakhali vanavilanga tsinguvu tsiu khurumishila khusaala khu musambwa kwa Ashera.)

⁸ Yosia yalera mu Yerusalemi vasalisi vali nivamenya mu mataala ka Yuda, khandi niyononyinya vwaali vwa vali nivakholelakhu misango shia havundu hosi mu shivala shienesho. Yapomolonyinya vwaali vwali nuvwakholwa vutakatifu khu imbuli ya matimoni, himbi ha shilivwa shia Yosia yali nali gavana wi litaala likali niyumbakha. Shilivwa shienesho shiali khuluveka luli khu mukhono mukhali kwi shilivwa shikali lwa mundu yinjilanga mu litaala likali.

⁹ Vasalisi venavo vali vakaywa khurumikha mu Litempeli; navutswa vali vaheelwa vunyali vukhulia mikati chiali ni chialombwa vuchila mamela, chia vasalisi veshie va vaheetsanga.

¹⁰ Mwami Yosia yononyinya khandi havundu halaangwangwa Tofetsi, nali havundu ha vandu vasaalanga khu misambwa, vasaalilanga mu Luhoongo lwa Hinomu, khwikalila mundu khukhola mwana wewe wi shiyayi inoho wi shikhana khuli shihanwa shiu khusambwa khu musambwa kwa Moleki.

¹¹ Yosia yarulitsa mu vwinjililu vwi Litempeli liu Mwami Nyasaye tsifarasi tsia vami va Yuda vali nivakhola khuva tsindakatifu khulu khusaala khu liuva, khandi nasamba nu mulilu makaare kiliihe ka varumishilanga khusaala. (Vindu vienevo viali viavikhwa mu lwanyi lwi Litempeli, himbi ha shilivwa; navutswa shiali ihale wene, khurula havundu ha mwimilili mukali walaangwangwa Natsani-meleki yamenyanga tawe.)

¹² Mwami Yosia yapomolonyinya vwaali vwa vami va Yuda, vali nivumbakha khu shisechese shi inzu yu vwami yu Mwami Ahazi yamenyamu, halala nu vwaali vwa Mwami Manaase yali niyumbakha mu lwanyi hali khavili lwi Litempeli. Yasionolanyinya vwaali mu vitonye, navisiuva mu Luhoongo lwa Kiduroni.

¹³ Mwami Yosia yononyinya vwaali vu Mwami Solomoni yali niyumbakha khuluveka ivukwi wa Yerusalemi, khuluveka luli ikuvanda wi Shikulu shia Misayituni , vwarumishilwa khusaala khu misambwa chi shifwavi -- Ashitarotsi wa Sidoni, musambwa kwa Chemoshi kwa Moabu nende Moleki, nuli musambwa kwa Amoni.

¹⁴ Mwami Yosia yatong'olanyinya mu vitonye machina matakatifu, nareemakanyinya vimanyilu viu musambwa kwi shikhali kwa Ashera. Yasasalanyinya vikuumba via vandu havundu ha kali nikavelenje.

¹⁵ Yosia yasambulanyinya khandi havundu ha vasaalanga khu misambwa mu litaala lia Betseli, wu Mwami Yerobohamu mwana wa Nebati, wachila Israeli nivakhola vwoni yali niyumbakha. Yosia yasambula vwaali, natong'olanyinya machina kavwo mu vitonye, khandi nasionolanyinya mu lukuushi. Yasamba nu mulilu khandi shimanyilu shia Ashera.

¹⁶ Nalwo lwa Yosia yaheenza shia havundu hosi nalola vilindwa vilala nivili khu shikulu. Yahaana lilako vikuumba virulitswi muvio, visambilwi khu vwaali. Nindi Yosia yononyinya vwaali, lwa yakhola ka Muprofeti yali niyaprofeta matukhu ku mulukha nikashili khutukha, lwa Mwami Yerobohamu yali nasinjile himbi ha vwaali. Mwami Yosia yaheenza shia havundu hosi nalola shilindwa shiu muprofeti wali niyaprofeta makhuva kenako.

¹⁷ Yareeva, “Shilindwa yeshio ni shia viina?” Vandu vi litaala lia Betseli vachipa, “Nashio shilindwa shiu muprofeti warula Yuda, naprofeta vindu via uloli ni vikholekhanga nunundi khu vwaali yuvu.”

¹⁸ Yosia yahaana lilako, “Leshi vive vutswa. Muvuli khurulitsakhu vikuumba vievie.” Nalwo lwa valekha khurulitsa vikuumba vievie, nende viu muprofeti wali niyarula Samaria.

¹⁹ Mwami Yosia yasambulanyinya shia havundu hosi mu shia litaala likali ha vandu vasaalanga khu misambwa, ha vami va Israeli, vachila Mwami Nyasaye navalolela vurima vali nivumbakha. Yakhola khu vwaali vwenovo vwosi malala mele ka yali nakholi mu litaala lia Betseli.

²⁰ Yiira vasalisi voosi va vandu vasaalanga khu misambwa khu vwaali havundu ha varumikhanga; khandi nasamba vikuumba via vandu khu shia vwaali. Manakalukha Yerusalemi.

Yosia Yikhoyela Pasaka

²¹ Mwami Yosia yavoolela vandu voosi, “Yikhoyeli Mulukha kwa Pasaka khuha Mwami Nyasaye, uli Nyasaye wenyu luyali, khuli kahandikwa mu shitabu shi lilakano.”

²² Khali mulukha kwosi ku Mulukha kwa Pasaka khuli mulukha kwenoko, kwali nu kushili khwikhoyelwakhu nu mwami wosi khu vami va Israeli inoho va Yuda, inoho khurula mumatukhu ka vakhalachi vamihanga shivala shienesho.

²³ Navutswa khumuhika kwi likhomi na munane mu vwamihi vwa Yosia, Mulukha kwa Pasaka kwenoko kwakholwa khuha Mwami Nyasaye luyali mu Yerusalemi.

Vindu Vindi via Yosia yakhola

²⁴ Mwami Yosia yarulitsa mu Yerusalemi, khandi havundu handi hosi mu lusomo lwa Yuda valoochi nende vakhumu voosi, nende misambwa chiosi chiu mu tsinzu, misambwa, nende vindu vindi viosi via vandu vasaalanga khu misambwa vasaalakhu, khurweshitsa malako kali ni kahandikwa mu shitabu, shiu Mukali wa vasalisi voosi Hilikia yali niyanyola mu Litempeli liu Mwami Nyasaye.

²⁵ Khushili khuvakhuho nu mwami khuli ye mumatukhu kavira, warumishila Mwami Nyasaye nu mwoyo kwosi, tsinganakani, nende tsingulu, nalondanga Malako ka Musa koosi; inoho khali khuvulakhuho mwami wali khuli ye khuraanjila lwenolo.

²⁶ Navutswa Mwami Nyasaye yalolela vandu va Yuda vurima vululu khurulana khu vindu viu Mwami Manaase yali niyakhola; khali nunundi vushili khuvwa.

²⁷ Nalwo lwa Mwami Nyasaye yavoola, “Niitsa khukhola Yuda kamali khukhola Israeli: Niitsa khukhunganyinya vandu va Yuda imbeli wanje, khandi nzambakhane Yerusalemi, nilili litaala likali lia narovola, nende Litempeli, ni hali havundu ha navoola have naho ha vasaala khwinzi.”

Vwamihi Vukhumalilikha vwa Yosia

²⁸ Shia shindu shindi shiosi, shia Yosia yakhola viahandikwa mu Shitabu shi Tsinyanga shia Vami va Yuda.

²⁹ Lwa Yosia yali nali mwami, Mwami Neko wa Misri yimilila mukaanda kwa vasikali, khutsia khu Muchela kwa Efurate khukhonya Mwami wa Ashuria. Mwami Yosia yachelitsa khukwana vasikali va Misri mu litaala lia Megido; nivamwiira mu liihe.

³⁰ Varumishi va Yosia vavikha mmbili kwekwe mu likaare lielie liliihe, ni vakalushitsa Yerusalemi, ha kwayeveelwa mu vilindwa via Vami vayeveelwamu. Vandu va Yuda varovola mwana wa Yosia walaangwangwa Yehohazi, nivamuvekha makura khuva mwami.

Mwami Yehohazi wa Yuda

³¹ Yehohazi yali nali ni mihika makhomi kavili na chivaka, lwa yakwa mwami wa Yuda. Yamiha mu Yerusalemi khumihika chivaka. Mama wewe yalaangwangwa Hamutali, mwana wi shikhana wa Yeremia khurula mu litaala lia Libuna.

³² Yakhola vindu vitamanu imbeli wu Mwami Nyasaye, khuli vakuuka veve vakhola.

³³ Mwami Neko wa Misri yamuvoha mucheela, mu litaala lia Ribuna, mu lusomo lwa Hamaatsi, khumwikalila khwamiha mu Yerusalemi. Yanika vandu va Yuda khurunga vushuru vwi ifetsa tsikilo tsiheelefu tsivaka ni tsimia tsine nende itsahabu tsikilo makhomi kavaka na tsine.

³⁴ Mwami Neko yamihitsa Eliakimu mwana wa Yosia khuva Mwami wa Yuda havukono ha tata wewe Yosia; namukulikha lira lindi Yehoyakimu. Mwami Neko yavukula Yehohazi, namuhila mu shivala shia Misri, wa yakhutsila.

Mwami Yehoyakimu wa Yuda

³⁵ Mwami Yehoyakimu yasolola vushuru khu vandu khurulana khu miandu chiavo, khutsia khurunga vushuru vu Mwami Neko wa Misri yenyanga.

³⁶ Yehoyakimu yali nali ni mihika makhomi kavili na chiranu, lwa yakwa Mwami wa Yuda. Yamiha mu Yerusalemi khumihika likhomi nu mulala. Mama wewe yalaangwangwa Zebida, mwana wi shikhana wa Pedaya wi litaala lia Ruma.

³⁷ Yehoyakimu yakhola vindu vitamanu imbeli wu Mwami Nyasaye, khuli vakuuka veve vali nivakhola.