2 VAMI 18 - IBIBILIA INDAKATIFU MU LUTIRICHI LWITAKHO NENDE LWISUKHA

Mwami Hezekia wa Yuda

¹ Khumuhika kwa khavaka, lwa Mwami Hosheha wa Israeli mwana wa Ela yali niyamihanga, Hezekia mwana wa Ahazi yaraanga khwamiha Yuda.

² Yamiha nali ni mihika makhomi kavili na chiranu. Yamiha mu Yerusalemi khumihika makhomi kavili na tisa. Mama wewe yalaangwangwa Abiya, mwana wi shikhana wa Zakaria.

³ Hezekia yakhola likhola liu vulunji imbeli wu Mwami Nyasaye, khuli kuuka wewe Daudi yakholanga.

⁴ Yasambulanyinya havundu ha vandu vakhasuuvilanga mu Nyasaye vasaalilanga, natong'olanyinya machina matakatifu. Yareemakanyinya vifwanani viu musambwa Ashera. Yatong'olanyinya mu vitonye khandi inzukha yali niyalombwa khu mukasa ya Musa yali niyaloomba, yalaangwangwa Nehushitani. Mumatukhu kenako, Vaisraeli vasambanga vubani khuha inzukha yeneyo luyali.

⁵ Hezekia yasuuvila mu Mwami Nyasaye, uli Nyasaye wa Israeli; vandu va Yuda shivanyolakhu mwami wundi khuli ye, kave nashiamihanga inoho niyakhakhutsa tawe.

⁶ Hezekia yali musuuvilwa khu Mwami Nyasaye, khandi shiyalekhakhu khulonda malako keke tawe; navutswa yali mucheli khulonda malako koosi, ku Mwami Nyasaye yali niyaha Musa.

⁷ Mwami Nyasaye yali halala naye; manakuura mu shia shindu shiosi shia yakholanga. Yahinganyinya Mwami wa Ashuria niyambakhana khumurumishila.

⁸ Yakuura Vafilisti, khali khutukha mu litaala lia Gaza halala nu lusomo luli khulio himbi, khuraanjila khu munaara ku khusinjilakhu khutukha khu litaala likali li imbinga.

⁹ Khumuhika kwa khane kwa Mwami Hezekia yamihanga -- nu kuli muhika kwa saba, lwa Mwami Hosheha wa Israeli yamihanga, Mwami Shalamaneseri wa Ashuria yakwana Israeli manavotokhana litaala lia Samaria.

¹⁰ Lwa mihika chivaka chiali nichiakhavwa, Vashuria vavukula litaala lienelo. Vashuria vavukula ni tsingulu litaala lia Samaria khumuhika kwa sita, lwa Hezekia yali niyamihanga, nu kuli muhika kwa tisa, lwa Mwami Hosheha wa Israeli yali niyamihanga.

¹¹ Mwami wa Ashuria yahila Vaisraeli, khutsia khuva vavohe mu shivala shia Ashuria, navoolela valala khuvo vamenye mu litaala lia Hala, vandi mu lusomo lwa Gozani luli himbi khu Muchela kwa Habori, khandi vandi mu mataala kali mu lusomo lwa Media.

¹² Litaala lia Samaria liavukulwa ni tsingulu, shichila Vaisraeli vambakhana khulonda malako ku Mwami Nyasaye, uli Nyasaye wavo; navutswa vameneka lilakano lia yali niyakhola navo. Vambakhana khulonda malako koosi ka Musa, nali murumishi wu Mwami Nyasaye yali niyavaha. Khali vayambakhana khuhulishitsakhu malako kenako, inoho khukhola shia kavoolanga.

Vasikali va Ashuria Vasiomela Yerusalemi

¹³ Khumuhika kwi likhomi na khane, kwa Mwami Hezekia yamihanga, Mwami Senakeribu wa Ashuria, yakwana mataala ki tsimbinga kali Yuda manakavukula ni tsingulu.

¹⁴ Mwami Hezekia wa Yuda yaruma likhuva yili khu Mwami wa Ashuria, wali nali mu litaala lia Lakishi, “Mali khukhola shindu shitamanu. Nuyaanza uvuli khukhukwana. Nzitsanga khukhurunga shia shindu shiosi, shia wenyanga khuhe.” Mwami wa Ashuria yanyola ifetsa tsikilo iheelefu indala nende khurula khu Mwami Hezekia itsahabu tsikilo iheelefu indala.

¹⁵ Hezekia yamurumila ifetsa yosi yali nili mu Litempeli khandi mu livishilu lilala mu inzu yu vwami.

¹⁶ Yahanulula khandi itsahabu yali niyavekhwa khu miliango chi Litempeli khandi itsahabu ya ye mwene yali niyavikha khu tsifulemu tsi miliango, manarumila Mwami Senakeribu.

¹⁷ Mwami wa Ashuria yaruma vasikali vanyishi khurula mu litaala lia Lakishi khutsia khukwana Hezekia wali nali Yerusalemi. Vimilili veve vavaka navo vimililanga vasikali venavo. Lwa vali nivakhatukha Yerusalemi, vasinjila khu muhaanda kwa valombi vi tsinguvu vahinzililanga, himbi khu vwina vwa matsi kavirilamu khurula mulitavalia khuluveka luli ivuluka.

¹⁸ Valaanga Mwami Hezekia; ma varumishi veve vavaka nivasimukha nivatsia khuvakanila; mulala khuvo yali Eliakimu mwana wa Hilikia, wasinjililanga inzu yu vwami; Shebuna, mukarani wi shiina; nende Yoha, mwana wa Asafu, wasinjililanga vitabu.

¹⁹ Mulala khu vimilili va vasikali va Vasiria yavavoolela ndi Mwami wa Ashuria yenyanga amanye shindu, shichilanga Mwami Hezekia nava ni tsingulu.

²⁰ Yenyanga khumanya, “Ukanakananga ndi makhuva ka ulomolomanga vutswa kanyala khurumikha havukono ha vucheli nende vunyali vu khutsia khukwana mu liihe? Ni viina ulolanga anyala khukhonya yivi, khuhinganyinya Ashuria?

²¹ Ulindililanga shivala shia Misri vakhukhonye, navutswa kaliitsa khuva vutswa, khuli wurumishilanga shitundu khuli ni indovoshi yu khuchendela -- shilitsa khusiavukha mu visia, khukhurootsa mu mukhono kwokwo. Nindio khandi khuli Mwami wa Misri ali, lwa mundu wosi alindililanga amukhonye.”

²² Murumishi wa Siria mwenoyo yatsililila khuvoola, “Inoho shiulambolela inzi ndi ulindililanga Mwami Nyasaye, uli Nyasaye wenyu akhukhonye? Shiali ni havundu ha vasaalilanga nende vwaali vu Mwami Nyasaye, vwa Hezekia yasambulanyinya, lwa yavoolela vandu va Yuda nende Yerusalemi vatsi khusaala khu vwaali vuli Yerusalemi vwonyene.

²³ Niitsa khukhola lilakano nivi, khuvirila mu lira liu Mwami wa Ashuria. Niitsa khukhuha tsifarasi tsiheelefu tsivili nikava unyala khunyola vandu vanyala khutsihila!

²⁴ Khali uliitsa khukhaywa khukhunga mwimilili wa hasi wa vasikali va Ashuria; nikhali khali ndio, ulindililanga Vamisri vakhurumile makaare nende vandu vu khuhila tsifarasi!

²⁵ Ukanakananga nyala khukwana shivala shioshio nu khushitivitsa vuchila Mwami Nyasaye khukhonya? Mwami Nyasaye mwene, neye wambolela shikwane nu khushitivitsa.”

²⁶ Nalwo lwa Eliakimu, Shebuna, nende Yoha vavoolela murumishi mwenoyo, “Nuyaanza lomoloma khu khutsi varumishi vovo Muluaramaiki, shichila khwalumanya. Uvuli khulomolomela Muluhebrania; vandu voosi vaviswa na masisi vahulishitsanga.”

²⁷ Navutswa yavachipa, “Mukanakananga munyi nende Mwami Hezekia, navo vonyene vutswa vu Mwami wa Ashuria yandumakhu khwitsa khumuvoolela vindu yivi viosi? Shikali kario tawe; nomolomanga khandi khu vandu vikhale khu lisisi, vatsitsanga khulia maavi kavo khandi vang'wi minyali kavo vene, khuli munyi mutsitsanga khukhola.”

²⁸ Nalwo lwa murumishi mwenoyo, yasinjila nalomoloma Muluhebrania, navoola, “Muhulishitsi makhuva ku Mwami wa Ashuria avoolelanga munyi!

²⁹ Amuchelihitsanga, muvuli khukaatwa nu Mwami Hezekia. Hezekia aliitsa khukhaywa khuhonyinya munyi.

³⁰ Muvuli khulekha amukaate khusuuvila mu Mwami Nyasaye. Ni kilikali, Mwami Nyasaye aliitsa khuvula khumuhonyinya, khandi ndi aliitsa khwikalila vasikali va Ashuria khuvula khuvukula ni tsingulu litaala lienyu.

³¹ Muvuli khuhulishitsakhu Mwami Hezekia. Mwami wa Ashuria umali khuhaana lilako ndi muruli mu litaala lienyu mutsi khukwa mu makhono keke. Munyi voosi muliitsa khuhuchililwa khulia matunda ki misabibu khurula khu misabibu chienyu, khandi makhuyu khurula khu misala chienyu. Muliitsa khung'wa khandi matsi khurula mu visima vienyu --

³² khutukha lwa Mwami wa Ashuria mwenoyo aliitsa khumuha shivala shia mumenyamu vene, shisasanga khuli shienyu, wa misala chi misabibu chiu khuhaana idivai chili nende imu yu khulomba mukati ili; ni shivala shilimu na matunda ki misabibu, makura ku musayituni, nende vushi. Niiva muliitsa khukhola ka yenyanga, muliitsa khuvula khukhutsa, navutswa muliitsa khutsililila khuva mwoyo. Muvuli khuhuchililakhu Hezekia, khumukhola khuva vandu vayiingwa, lwa avoolanga ndi Mwami Nyasaye aliitsa khuhonyinya munyi.

³³ Misambwa chia vandu vi tsimbia tsindi chinyala khuva chiahonyinyakhu vivala viachio khurula khu Mwami wa Ashuria?

³⁴ Ni hena ha misambwa chia mataala ka Hamaatsi nende Arupada chili? Ni hena ha misambwa chia mataala ka Sefarivahimu, Hena, nende Iva chili? Mundu alikhuho wahonyinyamu litaala lia Samaria?

³⁵ Ni litukhu shina liu musambwa mulala khu misambwa yichi, kwahonyinya shivala shiakwo khurula khu Mwami wa Ashuria? Ni shina shia mukholanga numukanakana ndi Mwami Nyasaye, aliitsa khuhonyinya Yerusalemi?”

³⁶ Vandu vahonjela vutswa, khuli Mwami Hezekia yali navavoolele vakhole. Vavula likhuva liu khumuchipa.

³⁷ Nalwo lwa Eliakimu, Shebuna, nende Yoha varandula tsinguvu tsiavo nu vuveleli mu mwoyo. Vasimukha nivatsia khuvoolelakhu Mwami Hezekia, makhuva ku murumishi wa Ashuria yali navavoolele.