2 TIMOTEO 4 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Khusayanga nuyaanza imbeli wa Nyasaye, khandi imbeli wa Yesu Kristo, uliitsa khukhalachila vandu vashili mwoyo nende vakhutsa, khandi shichila aliitsa khukalukha khwamiha mu vwami vwevwe,

² wilwatse likhuva, utsililile khwilwatsa (khali kave mumatukhu kenyekhanga inoho mumatukhu kakhenyekhanga tawe), khuvoolela vandu vakhole kenyekhanga, khukondekha nu khutinyilitsa, lwa uliitsa khuva nu wechitsanga mulikhutsila liosi.

³ Matukhu kaliitsa khutukha, lwa vandu valiitsa khwambakhana khuhulishitsa mechitso kilikali; navutswa valiitsa khulonda likomba liavo vene nu khwikhavila vene veechitsi vanyishi, valiitsa khuvavoolela makhuva ka vikombanga khuhulila.

⁴ Valiitsa khwambakhana khuhulishitsa katoto, mavalonde tsinganu tsia khale tsivula vwatoto.

⁵ Navutswa yivi mwene wilinde vulahi mu liiva lia uliitsa khuvirilamu liosi; wikhutsile mulinyakhana, ukhole muhinzilu ku khwilwatsa Ivanjeli, khandi ukhole muhinzilu kwokwo kwosi khuli murumishi wa Nyasaye.

⁶ Khulondokhana khwinzi, ndi himbi khuhaanwa khuli musango; isaa yu khukhutsa ili himbi khutukha.

⁷ Namala khukwana munjila indahi. Namala maliviri, khandi natsililila khulinda lisuuvila.

⁸ Khali ndio, navishilwa itaachi yi likhola liu vulunji, yu Mwami, uli Mukhalachi wi likhola liu vulunji aliitsa khumba Khulitukhu lienelo -- khandi shikanala khwikholekha kario khwinzi wonyene tawe, navutswa khali khu yavo voosi valindililanga nu mwoyo kwosi khukalukha khwekhwe.

Makhuva ka Paulu Kukhukhonya Timoteo

⁹ Chelitsa khuli unyala khunyala khwitsa khunjendelela vwangu yuvu.

¹⁰ Dema wayaanzilila vindu viu mu shivala shia matukhu kanu, khandi wanzilukha watsia mu litaala lia Tesalonike. Kiresike yasimukha natsia mu litaala lia Galatia. Tito watsia mu litaala lia Dalimatia.

¹¹ Luka wonyene neye wa khuli naye. Vukula Mariko khandi witsi naye, shichila anyala khukhonya mu muhinzilu kwanje.

¹² Namala khuruma Tukika khutsia mu litaala lia Efeso.

¹³ Lwa witsa, underele likoti lianje lia naleshela Karipa mu litaala lia Turoha; underele khandi vitabu vianje. Khushila muno, yevo vialombwa khu maseelo.

¹⁴ Alekisanda, uli mwiraanyi wi vivia, yakholela vindu vitamanu vinyishi. Mwami aliitsa khumurunga khu ka yakhola.

¹⁵ Khali yivi mwene uve mucheli khuye, shichila yahinganyinya muno likhuva lia khwilwatsa.

¹⁶ Lwa nasinjila, nindanga khuvoola makhuva kaanje ku khwishinga, mundu avulakhuho wakhonyakhu. Vandu voosi vanzilukha. Nyasaye avavele tsimbavasi!

¹⁷ Navutswa Mwami yali ninzi, manamba tsingulu, nimba nu vunyali vu khwilwatsa likhuva liatoto, khwenya vandu vi tsimbia tsindi khulihulila; nimbonyinywa khuvula khukhalachilwa likhutsa.

¹⁸ Mwami aliitsa khumbonyinya khurula mu vindu vitamanu viosi, khandi aliitsa khunzimilila munjila indahi khutukha mu vwami vwevwe mwikulu. Vukhumi vuve khuye mihika ni mihika! Amina.

Milembe Chiukhumalilikha

¹⁹ Uhaane milembe khu Prisila nende Akwila, khandi khu vandu vi inzu ya Onesifora.

²⁰ Erasito yarikala mu litaala lia Korinzo; nalekha Trofima mu litaala lia Mileta, shichila yali nalwalanga.

²¹ Uchelitsi khwitsa mumatukhu ku vushindu, nikashili khutukha. Ebula, Pudenzi, Lina nende Kilaudia, vamuheele milembe chiavo; khali vasuuvili voosi, vamuheele milembe chiavo.

²² Mwami ave na munyi. Tsimbavasi tsia Nyasaye tsive na munyi voosi.