2 SAMWELI 9 - IBIBILIA INDAKATIFU MU LUTIRICHI LWITAKHO NENDE LWISUKHA

Daudi nende Mefiboshetsi

¹ Litukhu lindi, Daudi yareeva, “Mundu anyala khuva alikhuho, warikala nashili mwoyo mu vandu vi inzu ya Saulu? Niiva mulala alikhuho warikalakhu nashili mwoyo, nakhayaanzi khumukholela malahi shichila Yonatsani.”

² Khwaliho nu mulala khu varumishi va vandu vi inzu ya Saulu walaangwangwa Ziba. Yavoolelwa atsi khulola Mwami Daudi, ma Mwami Daudi namureeva, “Nivi Ziba?” Yamuchipa, “Mwami, ninzi murumishi wowo.”

³ Mwami Daudi yamureeva, “Mundu anyala khuva warikalakhu nashili mwoyo mu vandu vi inzu ya Saulu, wanyala khukholela malahi ka Nyasaye yenyanga khole?” Ziba yachipa Mwami Daudi, “Khwarikala nu mwana wa Yonatsani; navutswa wafwokoya vilenje viosi.”

⁴ Mwami Daudi yamureeva, “Ali hena?” Ziba yamuchipa, “Wamenya mu litaala lia Lodebari, hango wu mwana wa Amiheli ulaangwangwa Makiri.”

⁵ Mwami Daudi yaruma mundu, khutsia khulaanga mwana wi shiyayi mwenoyo mu litaala lia Lodebari, khurula hango ha Makiri mwana wa Amiheli.

⁶ Lwa Mefiboshetsi mwana wa Yonatsani, mukuuka Saulu yitsa khulola Mwami Daudi, yamwinamila khumuha luyali. Mwami Daudi yamulaanga, “Mefiboshetsi!” Yahuchilila navoola, “Ninzi murumishi wowo.”

⁷ Mwami Daudi yamuvoolela, “Ukharia tawe. Niitsa khukhukholela malahi, shichila tata wowo Yonatsani. Niitsa khukhukalushitsila shivala shiali shia kuuka wowo Saulu. Khuliitsa khuliitsanga shia khase khosi nivi shiukhulia.”

⁸ Mefiboshetsi yamwinamila navoola, “Mbulakhu vukhonyi vwosi, khali khuvira isiimbwa yakhutsa. Shichila shina wu kholelanga malahi?”

⁹ Nalwo lwa Mwami Daudi yalaanga Ziba, wali murumishi wa Saulu, namuvoolela, “Mali khuha Meshibosheti, nali kuuka wu muruchi wali wowo, vindu viosi viali via Saulu nende vandu vi inzu yeye.

¹⁰ Yivi, vaana vovo vi shiyayi, nende varumishi vovo valiitsa khulimila muruchi wowo, uli mulala khu vandu vi inzu ya Saulu, khandi valere viraakwa via vachesi, khu vave ni shiukhulia shia valia. Navutswa khulaliitsanga halala shiukhulia na Mefiboshetsi.” (Ziba yali na vaana vi shiyayi likhomi na varanu nende varumishi makhomi kavili.)

¹¹ Ziba yavoolela Mwami Daudi, “Niitsa khukhola shia shindu shiosi, shia yivi mwami umbolela khole.” Mefiboshetsi yalia halala shiukhulia nu Mwami Daudi, khuli mulala khu vaana vu Mwami Daudi.

¹² Mefiboshetsi yali nu mwana wi shiyayi muvukha walaangwangwa Mika; vandu vi inzu ya Ziba, vamanya nivava varumishi va Mefiboshetsi.

¹³ Mefiboshetsi, wali niyafwokoya vilenje viosi vivili, yali wamenya Yerusalemi; khandi yaliitsanga halala shiukhulia nu Mwami Daudi.