2 SAMWELI 3 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Liihe liali hakari hi mikanda chia vasikali vakhonyanga vandu vi inzu ya Saulu nende yechio chiakhonyanga Daudi liavukula luhono. Lwa Daudi yatsililila khunyola tsingulu tsinyishi muno, nalwo lwa vandu vi inzu ya Saulu vatsililila khuteteshela.

Vaana vi Shiyayi va Daudi

² Yava navo vaana va Daudi yivula khu vakhali veve, namenyanga mu litaala lia Heburoni. Mwana wi shiyayi mukhulundu yalaangwangwa Amunoni, wa yali niyivula khu Ahinohamu wi litaala lia Yezireli;

³ mwana wa khavili yali Kileabu, wa yivula khu Abigaili, wali nali mukhutsakhali wa Nabali, wi litaala lia Karameli; mwana wa khavaka yalaangwangwa Abisolomu, wa yali niyivula khu mukhali walaangwangwa Maaka, wali nali mwana wi shikhana wu Mwami Talamahi wa Geshuri;

⁴ mwana wi shiyayi wa khane yali Adoniya, wa yivula khu mukhali walaangwangwa Hagitsi. Mwana wa kharanu yalaangwangwa Shefatia, wa yali niyivula khu Abitali.

⁵ Mwana muyayi wa sita yalaangwangwa Iturehamu, wa yivula khu Egula. Daudi yivula vaana venavo voosi lwa yali namenyanga mu litaala lia Heburoni.

Abuneri Yiyunga na Daudi

⁶ Lwa liihe liatsililila khuva hakari ha vandu vi inzu ya Daudi nende vandu vi inzu ya Saulu, Abuneri yatsililila khuva ni tsingulu tsinyishi mu vandu vi inzu ya Saulu.

⁷ Litukhu lindi, Saulu yali nu mukhali mumenyinywa walaangwangwa Resipa, wali mwana wi shikhana wa Ahiya. Ishibosheti yavoolela Abuneri, “Shichila shina nukona nu mukhali mumenyinywa wa tata wanje?”

⁸ Abuneri yalolela Ishibosheti vurima, khulondokhana khu makhuva ka yali navooli. Nalwo lwa yamureeva, “Usuuvilanga kholelanga vandu vuluhia lwa Yuda muhinzilu? Khali khutukha nunundi shitsilililanga khulonda malako ka tata wowo Saulu, vandu vi inzu yeye nende valina veve. Ninzi wakhuhonyinya nuvula khukuurwa na Daudi; nikhali nunundi ulomolome vitamanu khulondokhana khwinzi, shichila mundu mukhali!

⁹ Nyasaye asalilitse vululu muno, niiva niitsa khuvula khurweshitsila Daudi, ku Mwami Nyasaye yali niyamulaaka aliitsa khumukholela,

¹⁰ khandi khurulitsa vwami mu vandu vi inzu ya Saulu, nu khwamihitsa Daudi khuva Mwami wa Israeli nende Yuda, khuraanjila mu mataala ka Dani khutsia khutukha mu litaala lia Betsisheba.”

¹¹ Ishibosheti yakhaywa khuvoolela Abuneri shindu shiosi, shichila yali wamuria.

¹² Nalwo lwa Abuneri yaruma vandu khu Daudi, wali nali mu litaala lia Heburoni khutsia khumuvoolela, “Ni viina utsitsanga khwamiha shivala shinu? Chenda khukhole lilakano nivi, ninzi niitsa khukhukhonya khuvukula lusomo lwa Israeli, khwitsa khuluveka lwolwo.”

¹³ Daudi yamuvoolela, “Nu vulahi. Nzitsanga khukhola lilakano nivi, niiva uliitsa khukholela ka nyenyanga ukhole: ‘Ukhitsa khundolakhu vuchila khunderela mwana wi shikhana wa Saulu ulaangwangwa Mikali tawe.’ ”

¹⁴ Daudi yaruma khandi vandu khu Ishibosheti, khumuvoolela, “Ngalushitsila mukhali wanje Mikali, wa narunga vikhanda imia indala vi mivili chia Vafilisti; nimuhila khuva mukhali wanje.”

¹⁵ Ishibosheti yamurulitsa mulukhali khu musatsa, wa yali niyatsiakhu walaangwangwa Palatieli, wali mwana wa Lahishi.

¹⁶ Palatieli yamulonda, nalilanga khali khutsia khutukha mu litaala lia Bahurimu. Navutswa lwa Abuneri yamuvoolela, “Kalukha ingo,” nalwo lwa yakalukha.

¹⁷ Abuneri yasimukha natsia khu vimilili va Israeli, navavoolela, “Mwikombanga khumatukhu manyishi Daudi, khumwamiha khuli mwami wenyu.

¹⁸ Yuvu navwo vwiyangu vwenyu nunundi; shichila Mwami Nyasaye yali walaaka Daudi, ‘Niitsa khurumishila murumishi wanje Daudi, khuhonyinya vandu vaanje Israeli khurula khu Vafilisti, khandi khurula khu vatsiku vavo voosi.’ ”

¹⁹ Abuneri yalomoloma khandi khu vandu vuluhia lwa Benyamini. Yarulaho natsia mu litaala lia Heburoni, khuvoolela Daudi ka vandu vuluhia lwa Benyamini nende Vaisraeli voosi, vali ni vahuchilitsane khukhola.

²⁰ Lwa Abuneri yatukha khu Daudi, halala na vandu va yali nali navo, Daudi yavalombela mulukha kwi lilia.

²¹ Nalwo lwa Abuneri yavoolela Daudi, “Yivi mwami wanje, natsia nunundi khukhulerela vandu vu lusomo lwa Israeli khuluveka lwolwo. Valiitsa khukhuhuchilila khuva mwami wavo, ukhole lilakano navo, nu khwamiha shivala shienesho shiosi, khuli wikombanga mu mwoyo kwokwo.” Daudi yaseevula Abuneri, natsia mu milembe.

Abuneri Yiirwa

²² Matukhu mati nikamali khuvira, varumishi va Daudi, halala na Yohabu vakalukha nivarula ha vali nivatsili khuseera; varulayo ni vindu vinyishi, via vali nivayaayi. Navutswa Abuneri, shiyali nali na Daudi mu litaala lia Heburoni tawe, shichila Daudi yamuseevula narulaho, khandi yali utsili mu milembe.

²³ Lwa Yohabu nende vasikali veve voosi, va yali nali navo vatukhaho, yavoolelwa ndi Abuneri wali mwana wa Neri yitsa khu Mwami Daudi, navutswa yamuseevula natsia mu milembe.

²⁴ Nalwo lwa Yohabu yasimukha natsia khu Mwami Daudi, namuvoolela, “Ni shina shia ukholi? Lola, Abuneri yitsa khukhulola yivi! Shichila shina numulekha natsia, khali umali khutsia!

²⁵ Wamanya ndi Abuneri, mwana wa Neri yitsa khukhukaata yivi, khandi khwitsa khulola mwiima kwokwo khandi shia shindu shiosi, shia wu kholanga.”

²⁶ Lwa Yohabu yarula imbeli wa Daudi, yaruma vandu khutsia khulaanga Abuneri.Valera Abuneri, khurula mu shisima shia Sira; navutswa Daudi yakorwa shindu shiosi khulondokhana khu kenako.

²⁷ Lwa Abuneri yakalukha mu litaala lia Heburoni, Yohabu yamusuunda haluveka ha shilivwa, khuli yenyanga khulomoloma naye muvwivisi. Nalwo lwa yamulivira munda, khali nakhutsa. Abuneri yiirwa shichila neye yiira Asaheli, wali nali amwavo Yohabu.

²⁸ Lwa Daudi yahulila makhuva kenako, yavoola, “Inzi nende vwami vwanje khuvulakhu vutamanu vwosi imbeli wu Mwami Nyasaye, khulondokhana khu likhutsa lia Abuneri, mwana wa Neri.

²⁹ Khutukha Yohabu nende vandu vi inzu yeye vasalilitswi! Nzikombanga ndi shia likhula mu makhula koosi ka vandu vu lwivulu lwavo, mundu alinyolekhamu walwala shisununu inoho vuchele inoho utushili vutswa khukhola muhinzilu ku mundu mukhali inoho uliitsa khwiirwa nali mu liihe inoho uliitsa khuvula shiukhulia!”

³⁰ Yohabu nende amwavo wewe Abishai, vavanzila khwiira Abuneri, shichila neye wiira amwavo wavo Asaheli mu litaala lia Gibioni.

Mmbili kwa Abuneri Kwayeveelwa mu Shilindwa

³¹ Nalwo lwa Daudi yavoolela Yohabu nende vandu voosi, va yali nali navo varandule tsinguvu tsiavo, vifwale tsinguvu tsia makunia, nu khwikhula Abuneri. Mwami Daudi yachenda inyuma wi lisanduku liu mukhutsu khulitukhu lia maliika.

³² Vayeveela mmbili kwa Abuneri mu shilindwa mu litaala lia Heburoni, ma Mwami Daudi nalila tsikhwili tsingali ha shilindwa shia Abuneri. Vandu voosi valila khandi tsikhwili.

³³ Daudi yimba lwimbo lu khwikhula Abuneri yulu, navoola, “Toto, Abuneri yali wakhutsa khuli mundu muyiingwa?

³⁴ Makhono keke kali nikashili khuvohwa, khandi vilenje vievie viali nivishili khurelwakhu masili. Umali khukhutsa khuli mundu wa vandu vatamanu viira!” Ma vandu voosi nivamwikhula khandi.

³⁵ Vandu vachelitsa khuvoolela Daudi, nayaanza aliikhu shiukhulia mbasu kwosi, navutswa Daudi yisuuha navoola, “Khutukha Nyasaye anziiri, niiva niitsa khuliakhu shiukhulia shiosi nuvushili khwila!”

³⁶ Valola ka yali nakholi kenako, nivayaanza. Ni kilikali, shia shindu shiosi, shiu Mwami Daudi yakhola shiayaanzitsa vandu.

³⁷ Vandu va Daudi nende Vaisraeli voosi vali vamanyi ndi Mwami Daudi, yali navula lienya liu khwiira Abuneri khulitukhu lienelo.

³⁸ Mwami Daudi yavoolela varumishi veve, “Mushili khumanyakhu ndi mulala khu vimilili vi tsingulu, umali khukhutsa khulitukhu linu mu Israeli?

³⁹ Khali niiva ndi mwami wavekhwa makura, ndi muteteshele khulitukhu linu. Vaana va Zeruya yava vangura ni tsingulu. Mwami Nyasaye asalilitse vandu vatamanu venavo, khurulana khu vutamanu vwavo!”