2 SAMWELI 23 - IBIBILIA INDAKATIFU MU LUTIRICHI LWITAKHO NENDE LWISUKHA

Ka Mwami Daudi Yavoola Kukhumalilikha

¹ Daudi mwana wa Yese, neye mundu wa Nyasaye yakhola khuva ni tsingulu tsinyishi. Nyasaye yamuvekha makura khuva mwami, khandi neye wraanjitsa khwimbila Vaisraeli tsinyimbo tsindahi tsiene. Yaka nako makhuva kukhumalilikha ku Mwami Daudi:

² “Roho wu Mwami Nyasaye, alomolomanga khuvirila khwinzi; ninzi mbolanga likhuva lielie.

³ Nyasaye wa Israeli umali khulomoloma; woyo uli khuli lwanda lulindanga Israeli yambolela, “Mwami wamihanga vandu khuvirila munjila yu vulunji, yamihanga khuha Nyasaye luyali.

⁴ Ali khuli liuva liakhanga vulavu mu mavwevwe, liuva lirulanga mu mavwevwe vuchila malesi khulolekha; toto, khuli imbula ikholanga vunyasi vumeela khurula mu malova.”

⁵ “Nindi Nyasaye akasitsa vitsukhulu vaanje, shichila neye wakhola ninzi lilakano li mihika ni mihika, lilakano liliitsa khurweshitswa khandi linyala khuvula khumenekwa. Nako koosi ka nzikombanga khukholelwa; natsio tsiliitsa khuva tsingulu tsianje tsiu khukuura, khandi ni kilikali Nyasaye neye uliitsa khukhonya.

⁶ Navutswa vandu vatamanu valiitsa khusiuvwa khuli mavwa; shichila shikanyala khuvunjelitswa na makhono tawe.

⁷ Mundu utiilanga khu mavwa khutukha yiyavaale shindu shialombwa khu shivia inoho mulondi kwi lirimu; khandi kaliitsa khulaalitswa nu mulilu.”

Mira ka Vasikali Vamanyikhana va Daudi

⁸ Yaka nako mira ka vasikali vali nivamanyikhana va Daudi: musikali wu khuraanga yali Yoshebu Basishebeti, warulanga mu vandu vuluhia lwa Vatachemona, wali mwimilili wa “Vavaka”. Yarumishila lirimu lielie khukwana vandu tsimia munane, khandi niyiira voosi khulitukhu lilala.

⁹ Musikali wa khavili wali niyamanyikhana mu vavaka venavo, yali Eliazari mwana wa Dodo, mwana wa Ahohi. Litukhu lindi, ye mwene nende Daudi varishitsa Vafilisti, vali nivakani halala khukwana. Vaisraeli vakalukha inyuma,

¹⁰ navutswa yatinya nakwana Vafilisti, khutukha lwi tsingulu tsiavwa mu mukhono kwekwe, khali natsililila khuhaanda khu shivavi shieshie. Mwami Nyasaye neye wamuha tsingulu tsiu khukuura liihe. Vasikali vakalukha khu Eliazari, khutsia khuyaaya vutswa vindu khurula khu Vafilisti vali niviirwa.

¹¹ Musikali wa khavaka wali niyamanyikhana mu vavaka venavo, yali Shama mwana wa Agehe, warulanga mu vandu vuluhia lwa Vaharari. Vafilisti vakanila halala mu litaala lia Lehi, ha mulimi kwa vali nivaraakamu tsingutsa tsi likhuvi kwavetsanga. Vasikali va Israeli vilukha khurula khu Vafilisti,

¹² navutswa Shama yatinya shisatsa mu mulimi kwenoko, khandi nakulinda vulahi. Yiira Vafilisti, khandi Mwami Nyasaye namuha tsingulu tsinyishi tsiu khukuura.

¹³ Lwa matukhu ki lichesa kali nikali himbi khuraanga, vasikali vavaka khurula “Mumakhomi kavaka” vakholomokha nivatsia muluhangaywa luli mu litaala lia Adulami, wa Daudi yali nali, navutswa mukaanda kwa vasikali va Vafilisti, kwali nu kusimiishi maheemo ku khumenyamu mu Luhoongo lwa Refahimu.

¹⁴ Mumatukhu kenako, Daudi yali nali mu imbinga; navutswa mukaanda kwa vasikali va Vafilisti, kwali nu kuli mu litaala lia Betselehemu.

¹⁵ Daudi yahulila vuluhu vu khung'wa matsi navoola, “Nakhikombi mundu anderelekhu matsi ku khung'wa khurula mushisima, shili himbi ha shilivwa shi litaala lia Betselehemu!”

¹⁶ Nalwo lwa vasikali vavaka vali nivamanyikhana venavo, vatsia ni tsingulu khuvirila mu maheemo ka Vafilisti vamenyamu, nivateeha matsi mushisima, khandi nivalerela Daudi. Navutswa Daudi yambakhana khung'wa matsi kenako; nikhali yakasuundula hasi khuva khuli shihanwa khu Mwami Nyasaye.

¹⁷ Daudi yavoola, “Mwami Nyasaye, mbulakhu vunyali vu khung'wa matsi yaka! Kakhavele vutswa khuli ng'welenje masahi, ka vandu vihonolokha khukhutsa yava!” Khulwa yako, yambakhana khung'wa matsi kenako. Yevo navio viali vikholwa viu vucheli, via vasikali vavaka vali nivamanyikhana vakholanga.

¹⁸ Amwavo wa Yohabu walaangwangwa Abishai (mama wavo yali Zeruya) neye yali mwimilili wa “Vasikali vali nivamanyikhana makhomi kavaka.” Yarumishila lirimu lielie, khukwana vandu tsimia tsivaka naviira, khandi yali wamanyikhana muno mu “Vasikali vali nivamanyikhana makhomi kavaka.”

¹⁹ Yali musikali wamanyikhana muno, mu “Vasikali makhomi kavaka” nava mwimilili wavo, navutswa shiyali wamanyikhana muno, khuli “Vavaka yavo” tawe.

²⁰ Benaya mwana wa Yehohada, wi litaala lia Kabuzeheli, nali musikali wamanyikhana muno, yakhola vikholwa viu khuchenyinya vinyishi. Neye wiira vasikali vavili vi tsingulu va Vamoabu. Litukhu lindi, yinjila mu vwina khulitukhu liu vushindu niyiira isimba.

²¹ Yiira khandi Mumisri, mundu wali niyaraambiha muno niyiyavaale lirimu lielie mwene. Benaya yamukwana ni shikong'o shieshie, nanuula Mumisri mwenoyo lirimu lielie, khandi narumishila lirimu lienelo khumwiira.

²² Yivi navio vikholwa viali viu khuchenyinya, vi Benaya mwana wa Yehohada yali niyakhola. Khali ye yali wamanyikhana muno khuli “Vasikali makhomi kavaka.”

²³ Yali waheelwa luyali lunyishi, khuvira khali mulala khu “Vasikali makhomi kavaka” venavo. Navutswa shiyavalitswa mu “Vasikali vavaka” venavo tawe. Daudi yamurovola khuva mwimilili unyala khusinjilila vasikali veve vu khumulinda.

²⁴ Yava navo vali mu “Vasikali makhomi kavaka”. Amwavo wa Yohabu walaangwangwa Asaheli, mwana wa Dodoma walaangwangwa Elihanani, khurula mu litaala lia Betselehemu,

²⁵ Shama nende Elika varulanga Harodi,

²⁶ Helezi wi litaala lia Peleti, mwana wa Ikeshi walaangwangwa Ira, khurula mu litaala lia Tekoha.

²⁷ Abiazari wi litaala lia Anatsotsi, Mebunai wi litaala lia Husha,

²⁸ Zalumoni khurula mu vandu vuluhia lwa Vahohi, Maharai wi litaala lia Netofa,

²⁹ Mwana wa Bahana walaangwangwa Helebu wi litaala lia Netofa, Itahi mwana wa Ribahi wi litaala lia Gibeha, lili mu lusomo lwa Benyamini,

³⁰ Benaya wi litaala lia Piratsoni, Hidahi warulanga mu michela chia Gahashi,

³¹ Abialiboni warulanga mu vandu vuluhia lwa Vabiratsi, Azimavetsi wi litaala lia Bahurimu;

³² Eliahuba wi litaala lia Shaliboni; vaana vayayi va Yasheni, Yonatsani

³³ mwana wa Shama wi litaala lia Harari; Ahihamu mwana wa Sharari, warulanga mu vandu vuluhia lwa Vaharari;

³⁴ Elifeleti mwana wa Ahasibai wi litaala lia Maaka; mwana wa Ahitsofeli walaangwangwa Eliamu wi litaala lia Gilo;

³⁵ Heziro wi litaala lia Karameli; Paharai warulanga mu vandu vuluhia lwa Varabi;

³⁶ mwana wa Natsani walaangwangwa Igali wi litaala lia Zoba; Bani warulanga mu vandu vuluhia lwa Gadi.

³⁷ Zeleki wali Muamoni; Naharai khurula mu litaala lia Beherotsi, wachinjilanga Yohabu viuchi;

³⁸ Ira nende Garebu varulanga mu litaala lia Yatiri;

³⁹ nende Uria, wali Muhitse. Voosi vali makhomi kavaka na saba.