2 SAMWELI 21 - IBIBILIA INDAKATIFU MU LUTIRICHI LWITAKHO NENDE LWISUKHA

Vitsukhulu va Saulu Viirwa

¹ Mumatukhu ka Daudi yamihanga, khwaliho ni inzala indulu muno, yavukula mihika chivaka. Mwami Daudi yareeva Mwami Nyasaye khulondokhana khuyo, ma Mwami Nyasaye namuvoolela, “Inzala iliho shichila Saulu nende vandu vi inzu yeye, navo viira vandu vi litaala lia Gibioni.”

² (Vandu vi litaala lia Gibioni, shivavetsanga valala khu Vaisraeli tawe; navutswa vali valala khu Vaamori, vali nivarikala nivashili mwoyo. Vaisraeli vali vayisuuha vavuli khwiira, navutswa Saulu yachelitsa nu mwoyo kwosi khuvamulula, khuyaanzitsa vandu va Israeli nende Yuda.)

³ Daudi yareeva vandu vi litaala lia Gibioni, “Ni shina shianyala khumukholela munyi? Nyenyanga khumukholela malahi khu vutamanu vwa mwakholelwa, khu Mwami Nyasaye alikasitsa khandi vandu veve.”

⁴ Vandu vi litaala lia Gibioni vamuvoolela, “Khuvula vunyali vu khureeva ifetsa inoho itsahabu khurula khu Saulu inoho khu vandu vi inzu yeye. Khuvula khandi vunyali vu khwenya khuvanzila Vaisraeli vutamanu khu vutamanu, vwa vali nivakhola.” Daudi yavareeva, “Ni shina shia mwenyanga inzi mukholele? Mboleli, ninzi niitsa khumukholela.”

⁵ Vamuchipa, “Saulu neye wenyanga khutivitsa khutsi, khwenya khuvuli khurikalakhu nu mundu ushili mwoyo, shia havundu hosi mu shivala shia Israeli.

⁶ Khulwa yako, khuhe vasatsa saba khurula mu vitsukhulu va Saulu, khu khutsi khwiirila vandu venavo imbeli wu Mwami Nyasaye, mu litaala lia Gibeha, khu shikulu shiu Mwami Nyasaye, shichila Saulu neye wali niyavekhwa makura khuva mwami.” Nalwo lwa Mwami Daudi yahuchilila, navaha.

⁷ Navutswa Mwami Daudi yalekha khwiira Mefiposhetsi, wali mwana wa Jonatsani mwana wa Saulu, shichila Daudi nende Yonatsani vali vayisuuhitsana.

⁸ Navutswa Mwami Daudi yavukula vaana vavili va Resipa wali mwana wi shikhana wa Ahiya, va yali niyivula khu Saulu nivali Arumoni nende Mefiboshetsi. Yavukula khandi vaana varanu vi shiyayi vu mwana wi shikhana wa Saulu walaangwangwa Merabu, yali niyivula khu Adirieli mwana wa Barazilai, warulanga mu vandu vuluhia lwa Vamehola.

⁹ Daudi yavukula voosi naha vandu vi litaala lia Gibioni, niviirilwa khu shikulu imbeli wu Mwami Nyasaye. Voosi saba vakhutsila khulala, mumatukhu ku khuraanga kukhuchesa ishayiri.

¹⁰ Nalwo lwa mukhali mumenyinywa wa Saulu walaangwangwa Resipa, wali mwana wi shikhana wa Ahiya, yarumishila tsinguvu tsia makunia khulomba litiili lielie mwene khu lwanda ha mivili chienecho chiali ni chilaakalalekhu, khandi namenyayo khuraanjila mumatukhu ki lichesa khutukha mumatukhu ki imbula yu khuraanga ikhuvanga. Yakhunganga manyonyi mbasu khuvula khuvootsa mivili chienecho; khandi akhunga tsinyama tsiumbulimu khulekha khuchilia mu vutukhu.

¹¹ Lwa Daudi yavoolelwa ka Resipa, wali mukhali mumenyinywa wa Saulu yali nakholi,

¹² yasimukha natsia khuvukula vikuumba via Saulu nende viu mwaana wewe Yonatsani, khurula mu vandu vu lusomo lwa Gileadi. (Vali nivahuuvi vikuumba vienevo muvwivisi, khurula havundu ha vandu vahulushilanga mu litaala lia Betsi Shani, ha Vafilisti viirila vandu venavo, khulitukhu lia viira Saulu khu Shikulu shia Giliboha.)

¹³ Daudi yavukula vikuumba via Saulu nende Yonatsani khurulayo, khandi navunjelitsa khandi vikuumba via vasatsa saba vali ni viirwa.

¹⁴ Vayeveela vikuumba via Saulu nende Yonatsani mu shilindwa shia Kishi, wali tata wa Saulu. Vaviyeveela mu shilindwa shiali nishili mu litaala lia Zela, lili mu lusomo lwa Benyamini; khandi nivakhola shia shindu shiosi, shiu Mwami Daudi yali navoolele vakhole. Nivamali khukhola kenako, Nyasaye yachipa lisaala liavo, shichila shivala shiavo.

Daudi Yakwana na Vafilisti Mahe

¹⁵ Khwali ni liihe lindi hakari ha Vafilisti nende Israeli. Daudi yakholomokha nende vasikali veve, khutsia khukwana Vafilisti; nikhali Daudi yavwa tsingulu.

¹⁶ Kundu kuraambi kukali kwene kwalaangwangwa Ishibibenobu, kwali nu kuli ni lirimu lialombwa khu mukasa liali nu vulitoho himbi tsikilo tsivaka 3.5 khandi kwali nu kwiyavaale shivavi shiyia, kwakanakana kunyala khwiira Daudi.

¹⁷ Navutswa Abishai mwana wa Zeruya, yitsa nakhonya Daudi. Yakwana Mufilisti mwenoyo, namwiira. Nalwo lwa vandu va Daudi, vavoolela Daudi, “Shiuliitsa khutsiakhu khukwana khandi muliihe tawe! Khwambakhane khukoritsakhu itaaha yu vwami vwa Israeli.”

¹⁸ Matukhu mati nikamali khuvira, khwali ni liihe lindi na Vafilisti mu litaala lia Gobu. Mumatukhu kenako, mundu walaangwangwa Sibekai, wi litaala lia Husha yiira kundu kuraambi kukali kwene kwalaangwangwa Safu.

¹⁹ Khwali ni liihe lindi na Vafilisti mu litaala lia Gobu. Elihanani mwana wa Yahiri wi litaala lia Betselehemu yiira Goliati, wi litaala lia Gatsi. Goliati yali ni lirimu lili nu mulondi, khuli ku mwiraanyi wi vivia.

²⁰ Khwali ni liihe lindi mu litaala lia Gatsi, ha khwali nu kundu kukali kwene, kwali nu kwayaanza khukwana. Kwali ni vitere sita khu shia mukhono kwakwo nende vitere sita khu shia shilenje shiakwo.

²¹ Kwachaya Vaisraeli, ma Yonatsani, mwana wa amwavo Daudi walaangwangwa Shama, nakwiira.

²² Mindu mikali chine chienecho, nachio chiali vitsukhulu vi mindu mikali chiamenyanga mu litaala lia Gatsi; ma Daudi nende vasikali veve, nivachiira.