2 SAMWELI 20 - IBIBILIA INDAKATIFU MU LUTIRICHI LWITAKHO NENDE LWISUKHA

Sheba Yahinjitsa Daudi

¹ Khwaliho nu mundu mutamanu mu litaala lia Gilugali walaangwangwa Sheba mwana wa Bikiri, khurula mu vandu vuluhia lwa Benyamini. Yakhuva shisiliva, nalaanjilila, “Munyi Vaisraeli, Daudi avuli khukhwamiha! Khuvula shia khunyola khurula khu mwana wa Yese! Chendi khutsi ingo!”

² Nalwo lwa vandu voosi va Israeli vilukha Daudi, nivalonda Sheba mwana wa Bikiri; navutswa vandu va Yuda vatsililila khuva vasuuvilwa, nivalonda Mwami Daudi, khuraanjila khu Muchela kwa Yorodani khutukha Yerusalemu.

³ Lwa Daudi yakalukha mu inzu yu vwami mu Yerusalemi, yavukula vakhali vamenyinywa likhomi, va yali niyalekha valindi vulahi inzu yu vwami, navavikha munzu khulindwa. Yavaha shia venyanga shiosi; navutswa yambakhana khukona navo. Vali valindwa khuli vavohe khumatukhu koosi ka vali nivashili mwoyo, nivamenyanga khuli vakhutsakhali.

⁴ Nalwo lwa Mwami Daudi yavoolela Amasa, “Laanga vandu va Yuda, khwitsa khwinzi matukhu kavaka nikashili khuvwa; khandi yivi mwene uveho.”

⁵ Navutswa lwa Amasa yasimukha natsia khulaanga vandu va Yuda, shiyakalukha mumatukhu kavaka ku Mwami Daudi, yali namuvoolele akalushilimu tawe.

⁶ Mwami Daudi yavoolela Abishai, “Sheba atsitsanga khukhulerela vutiinyu vunyishi, khuvira vwa Abisolomu yakhulerela. Khola vwangu, uvukule vasikali vaanje khumuhitsanyinya. Nukhakholi ndio, anyala khuvukula mataala malala ki tsimbinga, nu khwilukha khutsia khumenyamu.”

⁷ Vasikali va Yohabu, nivali valindi valindanga inzu yu vwami nende vasikali vandi voosi, varula Yerusalemu, nivatsia na Abishai khuhitsanyinya Sheba.

⁸ Lwa vali nivakhatukha khu lwanda lukali, luli mu litaala lia Gibioni, Amasa yakana navo. Yohabu yali niyifwali tsingulu tsiliihe. Yali ni shivavi mushiula shieshie, nishivoheelwi khu lukhanda lu mu shisiindi mwemwe. Lwa yisuundakhu imbeli, shivavi shienesho shiaroonya hasi.

⁹ Yohabu yavoolela Amasa, “Mulina wanje, unyala khuva mulamu?” Yohabu yamukumila nu mukhono kwekwe musatsa matelu niyenyanga khumukhumbelela.

¹⁰ Amasa shiyalolakhu shivavi shia Yohabu yali nakumile mu mukhono kwekwe kundi tawe. Yohabu yamurootsa munda, maala keke nikasuundukha hasi. Yakhutsa isaa yeneyo, ma Yohabu nende amwavo wewe Abishai, nivatsia khuhitsanyinya Sheba.

¹¹ Mulala khu vasikali va Amasa, yasinjila himbi khu mmbili kwa Amasa nalaanjilila navoola, “Shia mundu wosi uli khuluveka lwa Yohabu nende Daudi alonde Yohabu!”

¹² Mmbili kwa Amasa kwali nu kuli hakari mu muhaanda, nu kulaakalale mu masahi. Lwa mulala khu vasikali va Yohabu yalola ndi vandu voosi vasinjilaho; yavukula mmbili kwenoko khurula mu muhaanda, nakuhila mushikuri khandi nakhunikhakhu mulinjeti.

¹³ Lwa yali niyakharulitsa mmbili kwa Amasa khu muhaanda, vasikali voosi valonda Yohabu, khutsia khuhitsanyinya Sheba.

¹⁴ Sheba yakhalakanyila mu lusomo lwa vandu vi tsimbia tsiosi tsia Israeli, natukha mu litaala lia Abeli Betsi Maaka. Vandu vu lwivulu lwa Bikiri vakanila halala, nivamulonda mu litaala lienelo.

¹⁵ Vasikali va Yohabu vahulila ndi Sheba ali mu litaala lienelo. Vasimukha nivatsia, nivavotokhana litaala lienelo. Vumbakha tsinjinga tsia malova ilwanyi wi lisisi, nivaraanga khandi khuyeeva hasi hi lisisi khulilomba liyongovele.

¹⁶ Mundu mukhali wali nali nu vusitsa yali mu litaala lienelo. Yalaanjilila khuvirila mu lisisi navoola, “Hulishitsi! Hulishitsi! Vooleli Yohabu ave niyitsanga hanu, nomolome naye.”

¹⁷ Yohabu yasimukha natsia ha mukhali mwenoyo yali nali. Mukhali mwenoyo yamureeva, “Nivi Yohabu?” Yohabu yamuchipa, “Ninzi.” Mukhali mwenoyo yamuvoolela, “Mbulishitsa inzi murumishi wowo.” Yohabu yamuchipa, “Mbulishitsanga.”

¹⁸ Mukhali mwenoyo yamuvoolela, “Mumatukhu kakhale, vali vamenya nivavoola, ‘Simukha utsi khunyola lichipu liolio mu litaala lia Abeli’ -- nivakhola vutswa ndio.

¹⁹ Litaala lieru ni likali, nilili lilala khu mataala ki milembe khandi malahi kene mu Israeli. Shichila shina uchelitsanga khwenya khulitivitsa? Wenyanga khwononyinya litaala likali liu Mwami Nyasaye?”

²⁰ Yohabu yamuchipa, “Shikali kario tawe! Shinzitsanga khwononyinya inoho khutivitsa litaala likali lienyu tawe!

²¹ Shikali nako ka khwenyanga khukhole tawe. Mundu ulaangwangwa Sheba mwana wa Bikiri, khurula mu shivala shi vikulu shia Efurahimu uranjitsi liihe nu Mwami Daudi. Numumbele mundu mwenoyo, niitsa khurula mu litaala likali lienyu.” Nalwo lwa mukhali mwenoyo yamuvoolela, “Khuliitsa khumusiuvila murwi kwekwe, khuvirila mu lisisi ikulu.”

²² Mukhali mwenoyo yasimukha natsia khu vandu voosi vi litaala liavo, ninganakani yeye yu vusitsa, nivakutuula murwi kwa Sheba mwana wa Bikiri khandi nivasiuvila Yohabu. Yohabu yakhuva shisiliva shieshie; vasikali veve nivasalana khurula mu litaala lienelo, shia musikali nakalukha ingo wewe wa yarulanga. Yohabu yakalukha Yerusalemu khulola Mwami Daudi.

Vandu Vakhonyanga Daudi

²³ Yohabu yarovolwa, khandi nava mwimilili wu mukaanda kwa vasikali va Israeli. Benaya mwana wa Yehohada, neye wasinjililanga vasikali valindanga Mwami Daudi.

²⁴ Adoniramu, neye wasinjililanga muhinzilu kukhunikwa khukhola ni tsingulu. Yehoshafati mwana wa Ahiludi, neye wasinjililanga vukarani.

²⁵ Sheva neye wali mukarani wu mushiina. Zadoko nende Abiatsari, navo vali vasalisi;

²⁶ khandi Ira wi litaala lia Yahiru, nava mulala khu vasalisi vu Mwami Daudi.