2 SAMWELI 15 - IBIBILIA INDAKATIFU MU LUTIRICHI LWITAKHO NENDE LWISUKHA

Abisolomu Yiyamihitsa Mwene

¹ Matukhu mati nikakhavira, Abisolomu yanyola mwene likaare liliihe nende tsifarasi nende vasikali makhomi karanu vu khumwimilila.

² Abisolomu yali wamenya niyavukha mu tsindolo nu kushili mu mavwevwe, masinjila khundulu khu muhaanda kuli himbi khu shilivwa shi litaala. Lwa mundu yitsaho ni likhuva limunyashitsanga lia yenyanga Mwami Daudi amukhonye khuviritsa, Abisolomu yamulaanga havundu ha yali nali, mareeva amuvoolele litaala liarulamu. Mundu mwenoyo niyakhamuvoolela litaala liarulamu mu vandu vi tsimbia tsia Israeli,

³ Abisolomu yamuvoolelanga, “Lola, malako kali khuluveka lwolwo, kakhukhonye, navutswa mundu avulakhuho wu Mwami Daudi yarovola unyala khuhulishitsa makhuva koko.”

⁴ Abisolomu yameeta khuvoola, “Vwakhavele vulahi nimbele mukhalachi mu shivala shinu! Nalwo lwa mundu uli ni likhuva limunyashitsanga inoho likhuva liu khukhonywa yakhitsi khwinzi, ninzi murweshitsile katoto, ka yenyanga khukholwa.”

⁵ Khali ndio, lwa mundu yitsanga khulola Abisolomu khumwinamila, Abisolomu yinjilanga amukumila, nu khumukhumbelela.

⁶ Nindi Abisolomu yali wamenya nakholanga Vaisraeli voosi, valerelanga Mwami Daudi makhuva ka vanyashitsanga avakhonye khuviritsa. Vaisraeli voosi vamusuuvilila muno, khuvira khuli vali nivasuuvilila Daudi.

⁷ Lwa mihika chine chiali nichiakhavwa, Abisolomu yavoolela Mwami Daudi, “Yivi mwami, lekha nzi mu litaala lia Heburoni, khurweshitsa lilaaka lia nisuuha khu Mwami Nyasaye.

⁸ Lwa inzi murumishi wowo, nali nimenyanga mu litaala lia Geshuri lili mu shivala shia Siria, nalaaka Mwami Nyasaye ndi niiva aliitsa khungalushitsa Yerusalemi, ni kilikali niitsa khusaalanga khuye mu litaala lia Heburoni.”

⁹ Mwami Daudi yamuvoolela, “Simukha utsi mu milembe.” Nalwo lwa Abisolomu yasimukha, natsia mu litaala lia Heburoni.

¹⁰ Navutswa Abisolomu yaruma vandu khutsia mu vandu vi tsimbia tsia Israeli tsiosi khuvoola, “Lwa muliitsa khuhulila mihumu chi visiliva, laanjilili numuvoola, ‘Abisolomu ukwili mwami mu litaala lia Heburoni.’ ”

¹¹ Vandu tsimia tsivili khurula Yerusalemu, vali nivalondi Abisolomu. Vali valaanjilwi khuva vacheni khandi vali vatsiliyo vutswa, vuchila khumanyakhu kakholekhanga.

¹² Lwa Abisolomu yali nakholanga misango, yarumana likhuva yenyanga khulola Ahitsofeli wali Mugiloni; nali mundu wakhonyanga Daudi inganakani, khurula mu litaala lia Gilo. Nalwo lwa vikhalila khukwishitsa vwami vu Mwami Daudi, ma valondi va Abisolomu nivatsililila khuva vanyishi.

Daudi Yilukha mu Yerusalemu

¹³ Murumwa yitsa khulola Daudi, navoola, “Vaisraeli voosi vamali khuviritsa vali khuluveka lwa Abisolomu!”

¹⁴ Nalwo lwa Daudi yavoolela varumishi veve, va yali nali navo Yerusalemu, “Kholi vwangu! Leshi khwilushi khurula hanu, niiva khwenyanga Abisolomu khuvula khukhwiira! Niiva khulakhaywa khukhola ndio, anyala khwitsa hanu khukhukwana, nu khwiira shia mundu wosi mu litaala likali linu!”

¹⁵ Varumishi vu Mwami Daudi vavoolela Mwami Daudi, “Lola! Khutsi varumishi vovo khwirecheshe khukhola, ka wenyanga khukhole.”

¹⁶ Nalwo lwa Mwami Daudi yasimukha narulamu, halala na vandu vi inzu yeye voosi nende vimilili va vandu veve; navutswa yalekhamu vakhali veve vamenyinywa likhomi, khulinda vulahi inzu yu vwami.

¹⁷ Lwa Mwami Daudi nende vandu veve voosi, vali nivarulanga mu litaala likali lienelo, vasinjila ha inzu yali yu khumalilikha.

¹⁸ Varumishi veve voosi vamuvirakhu, halala na valindi veve. Vandu vi litaala lia Gatsi varoonjela, nivava hambeli wu Mwami Daudi.

¹⁹ Mwami Daudi yavoolela Itahi wali Mugiti, “Shichila shina ukhulondanga? Kalukha utsi khumenya nu Mwami Abisolomu. Uli mundu mucheni, wilukha khurula mu shivala shieshie.

²⁰ Ushili khumenyakhu ninzi khumatukhu manyishi. Shichila shina utsililile khuchenda chenda na khutsi shia havundu hosi, lwa nakorwa havundu ha nzitsanga? Kalukha ingo, halala na vasikali vovo. Mwami Nyasaye akhukholele malahi khandi katoto.”

²¹ Navutswa Itahi yachipa Mwami Daudi, “Yivi mwami, nzisuuhanga khu yivi khuvirila mu lira liu Mwami Nyasaye ndi shia havundu hosi ha uliitsa khutsia, shia khase khosi naho ha niitsa khutsitsanga nivi, khali niiva nu khukhutsa inoho khutsililila khuva mwoyo.”

²² Mwami Daudi yavoolela Itahi, “Nu vulahi. Roonjela imbeli.” Itahi yasimukha, natsia na vandu veve voosi nende vandu vi tsinzu tsiavo.

²³ Vandu valila tsikhwili tsinyishi muno, lwa valondi va Daudi varula nivatsia. Mwami Daudi yambukha Luhoongo lwa Kiduroni, vandu veve nivamulondanga, ma voosi nivatsia mwichendanyama.

²⁴ Musalisi Zadoko yaliho, nende vandu vu lwivulu lwa Levi, vali nivachinji Lisanduku li Lilakano lia Nyasaye. Valivikha hasi khutukha lwa vandu voosi vavira, nivarula mu litaala likali lia Yerusalemi. Khali musalisi Abiatsari yaliho.

²⁵ Nalwo lwa Mwami Daudi yavoolela musalisi Zadoko, “Kalushitsa Lisanduku li Lilakano lia Nyasaye mu litaala likali. Niiva Mwami Nyasaye anyala khuyaanzitswa ninzi, litukhu lilala aliitsa khumba vwiyangu vu khukalukha khulilola, khandi ndole havundu halivikhwangwa.

²⁶ Navutswa niiva aliitsa khuvula khuyaanzitswa ninzi -- nu vulahi, lekha akhole shia yenyanga khukhola.”

²⁷ Mwami Daudi yatsililila khuvoolela musalisi Zadoko, “Lola, vukula mwana wowo Ahimaazi nende mwana wi shiyayi wa Abiatsari ulaangwangwa Yonatsani, mukalushi mu litaala likali mu milembe.

²⁸ Nikhali, nzitsanga khulindila havundu ha michela chiakanilanga mwichendanyama, khutukha lwa uliitsa khunderela makhuva khurulayo.”

²⁹ Musalisi Zadoko nende musalisi Abiatsari vakalushitsa Lisanduku li Lilakano lia Nyasaye mu Yerusalemi, nivamenyayo.

³⁰ Navutswa Mwami Daudi yatikulukha khu Shikulu shia Misayituni nalilanga. Yali vilenje viele khandi niyifwali shindu khu murwi kwekwe, khuli shimanyilu ndi ali nu vuveleli mu mwoyo. Vandu voosi vamulondanga vakhunikha mirwi chiavo, lwa valilanga khandi.

³¹ Lwa Daudi yavoolelwa ndi Ahitsofeli umali khwinjila mu mahingani ka Abisolomu, yasaala, “Yivi Mwami Nyasaye, nuyaanza kalukhanyinya inganakani ya Ahitsofeli, khuva yu vuyiingwa!”

³² Lwa Daudi yali niyakhatukha ha vutoonje vwi shikulu, havundu ha vandu vasaalanga khu Nyasaye, mulina wewe musuuvilwa walaangwangwa Hushai, warulanga mu vandu vuluhia lwa Varuki yamwakanila. Hushai yali wifwali tsinguvu tsiarandukha, khandi yali wiveshi matohi khu murwi kwekwe.

³³ Daudi yavoolela Hushai, “Niiva uliitsa khunonda, utsitsanga khuva musiko mulitoho khwinzi.

³⁴ Navutswa niiva uliitsa khukalukha mu litaala likali, uvoolele Abisolomu ndi utsitsanga khumurumishila mu vusuuvilwa khuli warumishilanga tata wewe, nu vulahi khulekha khulonda inganakani yosi, ya Ahitsofeli akhuvoolela ulonde.

³⁵ Vasalisi Zadoko nende Abiatsari valiitsa khuvayo. Uliitsa khuvavoolela shia shindu shiosi, shia uliitsa khuhulila nivavoolanga mu inzu yu vwami yu Mwami Daudi.

³⁶ Vaana vavo vavili valiyo na vasalisi venavo. Vaana venavo ni Ahimaazi mwana wa Zadoko nende Yonatsani mwana wa Abiatsari. Unyala khuvaruma khwinzi ni likhuva liosi, lia uliitsa khuva nuhuliliyo.”

³⁷ Mulina wa Daudi walaangwangwa Hushai yatukha Yerusalemi, lwa Abisolomu yali niyinjilamu.