2 SAMWELI 12 - IBIBILIA INDAKATIFU MU LUTIRICHI LWITAKHO NENDE LWISUKHA

Natsani Yakondeshela Daudi

¹ Mwami Nyasaye yaruma Natsani khu Daudi. Lwa Natsani yatukha khuye, yamuvoolela, “Khwali na vandu vasatsa vavili, vamenyanga mu litaala lilala vutswa, mulala khuvo yali muhinda, na wundi nava mumanani.

² Muhinda yali ni tsing'ombe tsinyishi nende makondi manyishi,

³ nikhali mumanani yali ni likondi lilala lionyene, lia yali niyakula. Yaliayitsanga, nilihindila nende vaana veve hango hehe. Yaliheetsanga shiukhulia shieshie mwene, khandi liang'welanga mu shikombe shieshie mwene, nu khulikumila mu makhono keke. Likondi lienelo liali khuli mwana wewe wi shikhana.

⁴ Litukhu lindi, mundu mucheni yatukha hango wu muhinda mwenoyo. Muhinda yambakhana khusinza khali muruku mulala khu miruku chiechie khumulombela shiukhulia shialia; nikhali, yavukula likondi liu mumanani, nalombela mucheni wewe shiukhulia shialia.”

⁵ Daudi yalolela vurima muhinda navoola, “Nzisuhanga khuvirila khu Nyasaye uli mwoyo ndi mundu ukholi kenako khutukha yiirwi!

⁶ Arunji hali khane vukuli vwali vwi likondi lienelo, shichila yakhola shikholwa khuli shienesho, navula khumulolelakhu tsimbavasi.”

⁷ Natsani yavoolela Daudi, “Nivi mundu mwenoyo! Mwami Nyasaye, uli Nyasaye wa Israeli avoolanga, ‘Ninzi wakhuvekha makura khuva Mwami wa Israeli, nikhuhavina khurula khu Saulu.

⁸ Ninzi wakhuha vwami vwevwe nende vakhali veve. Ninzi wakhukhola khuva Mwami wa Israeli nende Yuda. Niiva vindu vienevo viosi vinyala khuva ni viakhucheha, nakhakhumeeti vindu vindi hali khanyishi muno.

⁹ Shichila shina nuchaya khulonda malako kaanje? Shichila shina nukhola shindu shitamanu khuli shienesho? Nivi uchili Uria, Muhitse niyiirwa mu liihe. Nivi uchili Vaamoni nivamwiira, khandi nuvukula mukhali wewe!

¹⁰ Khulwa yako, shiraano shilatsililila khuva mu vandu vi inzu yoyo khumatukhu koosi, shichila wanjaya khandi nuvukula mukhali wa Uria, khuva mukhali wowo.

¹¹ Khwisuuhitsanga ndi niitsa khukhola mulala khu vandu vi inzu yoyo mwene khukhunyashitsa. Uliitsa khukalola mwene ni tsimoni tsiotsio, nikakholekhanga lwa niitsa khuvukula vakhali vovo, nu khuha mundu wundi. Mundu mwenoyo aliitsa khukona navo mbasu nu kwakhanga.

¹² Ukholi vwoni mu vwivisi, navutswa niitsa khukakhola havulavu, mbasu nu kwakhanga khu Vaisraeli voosi vakalole.’ ”

¹³ Nalwo lwa Daudi yavoolela Natsani, “Mali khukhola vwoni imbeli wu Mwami Nyasaye.” Natsani yachipa, “Ni kilikali, navutswa Mwami Nyasaye akhusemehi; shiutsitsanga khukhutsa, shichila vwoni vwovwo tawe.

¹⁴ Navutswa shichila umali khuchaya Mwami Nyasaye lwa ukholi kenako, mwana wowo mutoro atsitsanga khukhutsa.”

¹⁵ Natsani yasimukha natsia ingo. Mwami Nyasaye yachila mwana mutoro wa mukhali wa Uria, yali niyivuli khu Daudi khuva mulwale muno.

Mwana wa Daudi Yakhutsa

¹⁶ Daudi yasaala khu Nyasaye, khu mwana mutoro mwenoyo ahone. Daudi yambakhana khulia shiukhulia shiosi, khandi shia vutukhu vwosi yinjilanga isiisi wewe, wa yakonanga makona hasi hele vutukhu vwenovo.

¹⁷ Vimilili va vandu vi inzu yeye vasimukha, nivatsia khuye, nivachelitsa khumusinjilitsa khurula hasi, navutswa yambakhana, navula khulia navo.

¹⁸ Mwana mutoro mwenoyo, yakhutsa khulitukhu lia saba. Vimilili va vandu va Daudi varia khumuvoolela mwana umali khukhutsa; shichila vakanakana, “Lwa mwana yali nashili mwoyo, khwalomoloma khu Daudi, navutswa yambakhana khuhulishitsa. Khunyala khumuvoolela munjila shina mwana mutoro umali khukhutsa? Anyala khwikhola shindu shitamanu.”

¹⁹ Lwa Daudi yalola ndi vamoonyanaanga vene khuvene, nalwo lwa yamanya ndi mwana mutoro umali khukhutsa. Yavareeva, “Mwana mutoro anyala khuva ukhutsi?” Vamuchipa, “Umali khukhutsa.”

²⁰ Daudi yasinjila, niyisinga na matsi, nachenula liswi lielie, khandi nafwala tsinguvu tsindi. Yasimukha natsia khusaala munzu mu Mwami Nyasaye. Lwa yakalukha mu inzu yu vwami, yareeva shiukhulia nalia vwangu, lwa vali nivakhamuha.

²¹ Varumishi veve vamureeva, “Shichila shina uli nu mwiima khuli yuku? Lwa mwana yali nashili mwoyo, wahonganga vuchila khulia ma ulila; navutswa lu mwana amali khukhutsa nunundi, wusinjile khurula hasi ma ulalia shiukhulia!”

²² Daudi yachipa, “Lwa mwana mutoro yali nashili mwoyo, nahonganga vuchila khulia, nikhali nalilanga. Nakanakana mu mwoyo, Mwami Nyasaye anyala khulolela inzi tsimbavasi, khandi aleshe mwana mutoro atsililile khuva mwoyo.

²³ Navutswa lwa amali khukhutsa nunundi, shichila shina mbonje vuchila khulia? Nyala khwisimushitsa mwana mwenoyo khurula mu likhutsa? Litukhu lilala, niitsa khutsia khuye, navutswa shialiitsa khukalukha khwinzi tawe.”

Solomoni Yivulwa

²⁴ Daudi yaleminya mwoyo mukhali wewe Betsisheba. Yakona naye, niyivula mwana wi shiyayi, wa Daudi yakulikha lira Solomoni. Mwami Nyasaye yali wayaanza mwana wi shiyayi mwenoyo;

²⁵ navoolela Muprofeti Natsani atsi khukulikha mwana mwenoyo lira Yedidia, shichila Mwami Nyasaye yali wamuyaanza.

Daudi yavukula Litaala lia Raba

²⁶ Navutswa Yohabu yatsililila khukwana litaala lia Raba, litaala likali lia Amoni, nava himbi khulivukula ni tsingulu.

²⁷ Yohabu yaruma varumwa khu Daudi khuvoola, “Mali khukwana litaala lia Raba, khandi mali khuvukula tsisieveye tsiavo tsia matsi.

²⁸ Laanga halala vasikali vandi vovo, ukwane litaala lienelo nu khulivukula. Nyenyanga vandu vavuli khunzitsominya, shichila nalivukula ni tsingulu.”

²⁹ Nalwo lwa Daudi yalaanga halala vandu veve voosi, nasimukha natsia mu litaala lia Raama; yakwana litaala lienelo, nalivukula ni tsingulu.

³⁰ Daudi yanavula khurula khu murwi kwi shifwanani shia nyasaye Moleki wa Vaamoni, ikofia yalombwa khu itsahabu yu vulitoho tsikilo makhomi kavaka na tsiranu, halala ni lichina liu vukuuli vululu liali muyo. Daudi yavukula lichina liu vukuuli vululu lienelo, navikha muikofia yeye mwene. Yayaaya khandi vindu vinyishi khurula mu litaala lienelo,

³¹ nakhola vandu vamenyanga mulio khukhola mihinzilu ni misumeno, machembe ki vivia kukhulimila na makhono, nende tsihaywa tsi vivia, navanika khukhola mihinzilu khulomba matofari. Yakhola vandu vandi, vamenyanga mu mataala kandi ka Vaamoni malala mele. Ye mwene nende vasikali veve, vakalukha Yerusalemi.