2 SAMWELI 1 - IBIBILIA INDAKATIFU MU LUTIRICHI LWITAKHO NENDE LWISUKHA

Daudi Yavoolelwa Saulu Umali Khukhutsa

¹ Lwa Saulu yali niyakhutsa, Daudi yakalukha narula mu liihe, namali khukuura Vaamaleki, natsililila khumenya khumatukhu kavili mu litaala lia Zikulagi.

² Khulitukhu lia khavaka, mundu musatsa yatukhaho narula mu mukaanda kwa Saulu. Yali wifwali tsinguvu tsiarandukha khandi wiveshe matohi khu murwi kwekwe khumanyinya ndi yikhulanga. Yarulaho natsia khu Daudi, namwinamila khumuha luyali.

³ Daudi yareeva mundu mwenoyo, “Urula hena?” Yamuchipa, “Nzilushi khurula mu mukaanda kwa vasikali va Israeli.”

⁴ Daudi yamureeva, “Mbolela kikholekhayo.” Yamuvoolela, “Vasikali veru vilukha mu liihe. Vandu vanyishi mu vasikali veru viirwa. Saulu nende mwana wewe Yonatsani, vamali khandi khwiirwa.”

⁵ Nalwo lwa Daudi yareeva musatsa muvukha mwenoyo, “Umanyi ndina Saulu nende mwana wewe Yonatsani, vamali khukhutsa?”

⁶ Musatsa muvukha mwenoyo yamuvoolela, “Nali nindi khu Shikulu shia Giliboha. Nalola Saulu niyitiili khu lirimu lielie, khandi vasikali va makaare kiliihe nende vasikali vi tsifarasi, nivali himbi khutukha khuye.

⁷ Lwa yishevukha inyuma nalola inzi, yanaanga. Namuvoolela, ‘Ndi hanu.’

⁸ Yandeva, ‘Uli viina?’ Namuvoolela, ‘Ndi Mumaleki.’

⁹ Nalwo lwa Saulu yambolela, ‘Hamba hanu unziiri! Vasalilitsi vululu muno, khandi ndi himbi khukhutsa.’

¹⁰ Nasimukha ninzia himbi khuye nimwiira, shichila nali manyi ndi shianyala khutsililila khuva mwoyo, namali khukwa tawe. Namufwalula itaachi khu murwi kwekwe nende viuma, via yali niyifwala khu makhono keke, khandi mali khukhulerela yivi mwami wanje.”

¹¹ Nalwo lwa Daudi nende vandu voosi, va yali nali navo vakumila tsinguvu tsiavo, nivarandula.

¹² Vavelela mu mwoyo, nivikhula khandi nivahonga vuchila khuliakhu khutukha halukolovo, shichila Saulu nende Yonatsani, khandi shichila Vaisraeli, nivali vu Mwami Nyasaye, lwa vandu vanyishi khuvo vali niviirwa mu liihe.

¹³ Daudi yareeva musatsa muvukha, wali namuvoolele makhuva kenako, “Ni hena wa urulanga?” Yamuvoolela, “Ndi Mumaleki, navutswa menyanga mu shivala shienyu.”

¹⁴ Daudi yamureeva, “Shichila shina nuvula khuria khwiira mwami wu Mwami Nyasaye, yali niyavekha makura?”

¹⁵ Nalwo lwa Daudi yalaanga mulala khu vandu veve, namuvoolela, “Yiira mundu uyu.” Mundu mwenoyo yarumula Mumaleki, khutukha lwa yakhutsa.

¹⁶ Daudi yamuvoolela, “Yivi mwene wilerele likhutsa. Wikhalachili mwene likhutsa, lwa uvooli havulavu ndi nivi wiira mwami, wu Mwami Nyasaye yali niyavekha makura.”

Daudi Yikhula Shichila Saulu nende Yonatsani

¹⁷ Daudi yimba lwimbo yulu, lu khwikhula Saulu nende mwana wewe Yonatsani;

¹⁸ nahaana lilako ndi vandu va Yuda khwechitswa lwimbo lu khwikhula lwenolo. (Lwahandikwa mu Shitabu shia Yashari.)

¹⁹ “Yivi Israeli, vimilili veru vu vukhumi vamali khukhutsila khu vikulu viovio! Vasikali veru vi tsingulu vamali khwiirwa!

²⁰ Lekha khuvoolelakhu mundu mu litaala lia Gatsi, inoho khulanditsakhu mu tsinjila tsi litaala lia Ashikeloni. Nikakhavele kario, vakhali Vafilisti vanyala khwikhoya; vaana vi shikhana va vandu vasoleli valiitsa khuva nu vuyaanzi.

²¹ “Munyi vikulu via Giliboha, nzikombanga ndi imbula inoho liime vivuli khuroonyakhu khu vikulu vienyu; milimi chili mu vikulu vienevo chivuli khwamakhu shindu shiosi; shichila tsingavo tsia vasikali vi tsingulu tsia yononyilwayo; ingavo ya Saulu ishili khuvekhwa makura.

²² Vura vwa Yonatsani vwiira vandu, shivavi shia Saulu shiakhola muhinzilu vuchila tsimbavasi, shiatonyanyinya vasikali vi tsingulu, ni kilikali, shiira vanyishi.

²³ Saulu nende Yonatsani vali vandu vu khuchenyinya khandi vali vayaanzwa; vali halala mu limenya khandi mu likhutsa liavo; vali vaangu muno khuvira shilitsa, ni tsingulu khuvira tsisimba.

²⁴ “Munyi vakhali Vaisraeli, mwikhule Saulu! Neye wamufwala tsinguvu tsimuuchi muno namusiaya ni tsinguvu tsialombwa khu itsahabu.

²⁵ “Vasikali vi tsingulu vakhutsila muliihe ni vakwananga, Yonatsani umali khulaakalala mu vikulu, umali khwiirwa.

²⁶ “Amwiru wanje Yonatsani, ndi nu vuveleli mu mwoyo shichila yivi; wali wanyanzitsa muno! Vuyaanzi vwovwo khwinzi vwali vu khuchenyinya khuvira vwa vandu vakhali.

²⁷ Vasikali vi tsingulu vamali khukhutsa, viuchi viliihe vivula muhinzilu kwosi.”