1 YOHANA 5 - IBIBILIA INDAKATIFU MU LUTIRICHI LWITAKHO NENDE LWISUKHA

Lisuuvila mu Mwana wa Nyasaye

¹ Shia mundu wosi usuuvilanga ndi Yesu ni Masiha, neye mwana wa Nyasaye; khandi mundu wayaanza mwivuli, ayaanzanga mwana wu mwivuli mweneyo.

² Nindi khwamanya khwayaanza vaana va Nyasaye: khuyaanze Nyasaye khandi khulonde malako keke.

³ Nindi khuli khumanyinyanga khwayaanza Nyasaye: khulonde malako keke, khandi malako keke, shikanya khuva malitoho tawe;

⁴ shichila shia mwana wa Nyasaye wosi, ali nu vunyali vu khukuura vindu viu mu shivala. Khulwa yako, khuvirila mu lisuuvila lieru, khukuuranga vindu viu mu shivala.

⁵ Ni viina unyala khukuura vindu viu mu shivala? Nu mundu usuuvilanga ndi Yesu neye Mwana wa Nyasaye.

Vushiahidi khu Yesu Kristo

⁶ Yesu Kristo neye witsa na matsi ki libatiswa lielie nende masahi ki likhutsa lielie. Shikanyala khuva yitsa na matsi konyene tawe, navutswa na matsi nende masahi. Roho mwene ahaananga vushiahidi ndi ni katoto, shichila Roho avoolanga katoto.

⁷ Khuliho na vashiahidi vavaka:

⁸ Roho, matsi nende masahi; khandi viosi vivaka, vihaananga vushiahidi shilala.

⁹ Niiva khunyala khusuuvila mu vushiahidi vwa vandu vahaananga; vushiahidi vurulanga khu Nyasaye vuli ni tsingulu tsinyishi khuvira vwa vandu. Navwo vushiahidi vwa Nyasaye yahaana khulondokhana khu Mwana wewe.

¹⁰ Khulwa yako, mundu usuuvilanga mu Mwana wa Nyasaye, ali na makhuva mu mwoyo kwekwe khulondokhana khu vushiahidi vwenevo; navutswa mundu wambakhananga khusuuvila mu Nyasaye, wakhola Nyasaye khuva muvehi, shichila wayambakhana khusuuvila mu vushiahidi vwa Nyasaye yahaana khulondokhana khu Mwana wewe.

¹¹ Makhuva khulondokhana khu vushiahidi vuliho kali ndi Nyasaye wakhuha vulamu vwi mihika ni mihika; khandi vulamu vwenovo vuli mu Mwana wewe.

¹² Mundu uli nu Mwana muye ali nu vulamu; khandi mundu uvula Mwana wa Nyasaye, avula vulamu muye.

Vulamu vwi Mihika ni Mihika

¹³ Muhandichilanga munyi vamusuuvilanga mu lira liu Mwana wa Nyasaye, khu mumanye ndi muli nu vulamu vwi mihika ni mihika.

¹⁴ Khuli ni lisuuvilitsa imbeli wa Nyasaye, shichila khwamanya ndi lwa khumureevanga shia shindu shiosi khulondokhana khu lienya lielie, akhuhulishitsanga.

¹⁵ Lwa khwamanya ndi akhuhulishitsanga mu shia shindu shiosi shia khureevanga, nalwo lwa khumanyanga ndi akhuheetsanga shia shindu shiosi shia khuvetsanga nu khureevi.

¹⁶ Niiva mundu aliitsa khulola amwavo wewe nakholanga vwoni vunyala khuvula khumulerela likhutsa, khutukha asaale khu Nyasaye, khu Nyasaye mwenoyo amuhe vulamu. Yaka kaliitsa khwikholekha khu yavo vakholanga vwoni vunyala khuvula khuvalerela likhutsa. Navutswa khuliho nu vwoni vunyala khulerela mundu likhutsa, khandi shikanyala khuva mbolanga mundu asaale khu Nyasaye, shichila vwoni vwenovo tawe.

¹⁷ Shia shikholwa shitamanu shiosi, navwo vwoni; navutswa khuliho nu vwoni vunyala khuvula khulerela mundu likhutsa.

¹⁸ Khwamanya ndi mundu uli mwana wa Nyasaye, shianyala khutsililila khukhola vwoni tawe, shichila Mwana wa Nyasaye amulindanga vulahi vwene; khandi Mutamanu Woyo shianyala khumusalilitsa tawe.

¹⁹ Khwamanya ndi khuli vaana va Nyasaye, khali niiva Mutamanu Woyo yamihanga vandu voosi mu shivala.

²⁰ Khwamanya ndi Mwana wa Nyasaye wayitsa, khandi wakhuha limanya, khu khumanye Nyasaye watoto. Khuli mu vulala na Nyasaye uli watoto, khali mu Mwana wewe Yesu Kristo. Ye mwene neye Nyasaye watoto, khandi vulamu vwi mihika ni mihika.

²¹ Munyi vaana vaanje, mutsililile khwilinda vene khurula khu misambwa.