1 VAMI 20 - IBIBILIA INDAKATIFU MU LUTIRICHI LWITAKHO NENDE LWISUKHA

Beni-hadadi Yakwana Litaala lia Samaria

¹ Mwami Beni-hadadi wa Siria yalaanga halala vasikali veve voosi. Yali halala na vamihi makhomi kavaka na vavili, ni tsifarasi nende makaare kiliihe. Yaroonjela natsia mu litaala lia Samaria, nalivotokhana khandi nalikwana.

² Yaruma varumwa mu litaala lienelo khu Mwami Ahabu wa Israeli, khumuvoolela, “Mwami Beni-hadadi avoolanga,

³ ‘Ifetsa yoyo nende itsahabu yoyo ni vianje; khandi vakhali vovo nende vaana vovo, va wayaanza ni vaanje.’ ”

⁴ Mwami Ahabu wa Israeli yachipa, “Vooleli mwami wanje, uli Mwami Beni-hadadi ndi mbuchilili; anyala khuvukula inzi nende vindu vianje viandi navio viosi khuva vievie.”

⁵ Matukhu mati nikakhavira, varumwa venavo vakalukha khu Mwami Ahabu, nivavoola, “Mwami Beni-hadadi avoolanga, ‘Ndumane umbe ifetsa nende itsahabu yoyo, vakhali vovo nende vaana vovo.’

⁶ Isaa khuli yinu mukamba nzitsanga khuruma varumishi vaanje, khurunishitsa mu inzu yoyo yu vwami nende mu tsinzu tsia varumishi vovo. Valiitsa khuvukula shia shindu shiosi shiulolanga khuva nu vukuuli vululu, khandi varuliho nashio.”

⁷ Nalwo lwa Mwami Ahabu yalaanga halala vimilili voosi vi shivala shienesho, navavoolela, “Lolikhu khuli mundu woyo akhavanga khukhulerela vutiinyu! Lwa yarumana yenyanga vakhali vaanje nende vaana vaanje, ifetsa nende itsahabu yanje, shinali namwambakhanila tawe.”

⁸ Vimilili voosi nende vandu voosi vamuvoolela, “Uvuli khuhulishitsakhu makhuva keke inoho khukhola ka yenyanga ukhole.”

⁹ Mwami Ahabu yavoolela varumwa va Beni-hadadi, “Voolela mwami wanje, nali Mwami Beni-hadadi ndi nahuchila khukhola koosi, ka yali niyareeva khole lukhuraanga; navutswa shinyala khuhuchilila khukhola kareevanga mukholele khandi tawe.” Varumwa venavo varulaho nivatsia, khandi nivakalukha ni likhuva lindi

¹⁰ khurula khu Mwami Beni-hadadi, “Nzitsanga khulera vandu vanyishi khwitsa khumulula litaala liolio yili nu khuchinga lukuushi mu makhono kavo. Nzikombanga ndi vanyasaye vanziiri niiva nyala khuvula khukhola ndio!”

¹¹ Mwami Ahabu wa Israeli yachipa, “Vooleli Mwami Beni-hadadi ndi musikali watoto yichinjililanga namali khukwana liihe, navutswa nashili khukwana tawe.”

¹² Mwami Beni-hadadi yahulila lichipu lia Ahabu, lwa ye nende vami vamukhonyanga, vamihi vandi, vali nivang'wetsanga mu maheemo kavo. Beni-hadadi yahaana lilako khu vasikali veve, virecheshe khutsia khukwana litaala lienelo. Virechekha nivalikwana.

¹³ Navutswa muprofeti yasimukha natsia khu Mwami Ahabu wa Israeli, namuvoolela, “Mwami Nyasaye avoolanga, ‘Unyala khuva ulolikhu mukaanda kwa vasikali vanyishi yavo? Lola, nzitsanga khukhuha nunundi tsingulu tsiu khukuura vasikali venavo, khu umanye ndi ninzi Mwami Nyasaye.’ ”

¹⁴ Mwami Ahabu yamureeva, “Ni viina ukhola kenako?” Muprofeti mwenoyo yamuchipa, “Mwami Nyasaye avoolanga ndi vasikali vavukha, va vagavana vi tsisomo vasinjililanga, navo vakhola kenako.” Mwami Ahabu yareeva, “Ni viina uranjitsa liihe?” Muprofeti mwenoyo yamuchipa, “Nivi uranjitsa.”

¹⁵ Nalwo lwa Mwami Ahabu yalaanga halala vasikali vavukha, va vimilili vi tsisomo vimililanga; voosi vali tsimia tsivili makhomi kavaka na vavili. Yalaanga halala mukaanda kwa vasikali va Vaisraeli, voosi nivali vandu tsiheelefu saba.

¹⁶ Liihe liaraanga tsisaa sita mbasu, lwa Beni-hadadi nende vami makhomi kavaka na vavili, vali nivamukhonyanga liihe vali nivatandilanga mu maheemo kavo.

¹⁷ Vasikali vavukha, navo vali vu khuraanga khuroonjela khutsia khukwana. Vasikahuti vu Mwami Beni-hadadi yali niyaruma, vamuvoolela ndi shituma shia vasikali shirulanga mu litaala lia Samaria.

¹⁸ Mwami Beni-hadadi yahaana lilako navoola, “Vakumili nivashili mwoyo, khali kave vitsanga khukwana inoho vitsanga khureeva milembe.”

¹⁹ Vasikali vavukha, navo varoonjela nivatsia khukwana; vasikali va Vaisraeli vavalondanga inyuma,

²⁰ khandi shia mulala khuvo yiira shia mundu musatsa wosi wa yakwananga naye. Vasikali va Siria vilukha, vasikali va Israeli ni vavahitsanyinya; navutswa Mwami Beni-hadadi yilukha nanini khu farasi, halala na vasikali valala vi tsifarasi.

²¹ Mwami Ahabu wa Israeli yavalondelela, nakumila tsifarasi nende makaare kiliihe kavo, khandi niyiira vasikali vanyishi va Siria.

²² Nalwo lwa muprofeti mwenoyo yasimukha natsia khu Mwami Ahabu wa Israeli, namuvoolela, “Kalukha utsi khutinyilitsa vasikali vovo khuli vanyala khukwana, khandi uve mucheli khulondokhana khu kukholanga, shichila Mwami wa Siria aliitsa khukhukwana khandi mumatukhu kitsanga lwa imbula iva niyakhavwa.”

Vasikali va Siria Vakwana lwa Khavili

²³ Varumishi vu Mwami Beni-hadadi wa Siria vamuvoolela, “Vanyasaye va Israeli, ni vanyasaye vi vikulu. Nashio shivune shiachila Vaisraeli nivakhukuura. Navutswa khuliitsa khuvakuura, niiva khunyala khukwana navo mu lwomera.

²⁴ Rulitsa vamihi makhomi kavaka na vavili khurula mu vunyali vwavo, khandi urovole vimilili va vasikali vandi.

²⁵ Laanga vasikali vanyishi, khuli vasikali va khwilukha yavo, halala ni isavu indala yi tsifarasi nende makaare kiliihe. Khulakwana Vaisraeli mu lwomera; yulu nalwo lwa khuvakuura.” Mwami Beni-hadadi yahuchilila, nalonda inganakani yavo ya vamukhonya.

²⁶ Matukhu kalondakhu kandi ki kimbula yali nivula, Mwami Beni-hadadi yalaanga halala vasikali veve, nivaroonjela khutsia khukwana Vaisraeli mu litaala lia Afeki.

²⁷ Vaisraeli valaangwa, khandi nivaheelwa viuchi viu khukwanila. Varoonjela nivakavulana mu mikaanda chiliihe chivili, nivaheenzanga khuluveka lwa Vasiria. Vaisraeli valolekha khuli ni viayo vitititi vivili vi tsimbuli, nivasasanyinywi khu Vasiria, vali nivasalani shia havundu hosi mu shivala shienesho.

²⁸ Muprofeti yasimukha natsia khu Mwami Ahabu wa Israeli, namuvoolela, “Mwami Nyasaye avoolanga, ‘Nzitsanga khukhuha tsingulu tsiu khukuura vasikali vavo vanyishi, nikanyalikha umanye ndi ninzi Mwami Nyasaye, shichila Vasiria vavoolanga ndi ninzi nyasaye wi vikulu, navutswa shindi Nyasaye wu mu lwomera tawe.’ ”

²⁹ Vasikali va Vasiria nende va Vaisraeli, vasimiikha maheemo kavo ku khumenyamu khumatukhu saba, nivaheenzananga vene khuvene. Varanga khukwana khulitukhu lia saba; ma vasikali va Vaisraeli niviira Vasiria tsiheelefu imia indala.

³⁰ Valala khuvo vilukha nivatsia mu litaala lia Afeki, wa masisi ki litaala lienelo, kayongovela khu valala khuvo vali nivarikala tsiheelefu tsivili na saba. Beni-hadadi yilukha natsia mu litaala lienelo, natsia khwivisa mukari mwene mwi inzu.

³¹ Varumishi veve vamuvoolela, “Lola, khwahulila ndi vami va Vaisraeli, vali ni tsimbavasi. Nuyaanza khuhuchilile khutsi khu Mwami wa Israeli nukhwifwali tsinguvu tsia makunia mu visiindi vieru nende mikoye mwing'ori mweru; haundi, anyala khuvula khwiira yivi.”

³² Varumishi venavo vifwala tsinguvu tsia makunia mu visiindi viavo nende mikoye mwing'ori mwavo, nivatsia khu Mwami Ahabu, nivavoola, “Murumishi wowo Beni-hadadi avoolanga, ‘Nuyaanza lekha mbe mwoyo.’ ” Mwami Ahabu yavachipa, “Anyala khuva ashili mwoyo? Neye amwavo wanje!”

³³ Vandu venavo vaheenzelelanga khulola shimanyilu shilahi, nivahulila vwangu ka yali navooli. Vavoola, “Toto, Beni-hadadi ni amwavo wowo.” Mwami Ahabu yavoola, “Ruli mutsi khumulera khwinzi.” Lwa Beni-hadadi yatukhaho, Ahabu yamulaanga yinjili mu likaare lia ye mwene yali nalimu.

³⁴ Beni-hadadi yavoolela Mwami Ahabu, “Nzitsanga khukhukalushitsila mataala ka tata wanje yavukula khurula khu tata wowo; khandi unyala khumbakha isokoni yoyo mwene mu litaala lia Damasika, khuli tata wanje yakhola mu litaala lia Samaria.” Mwami Ahabu yamuchipa, “Nzitsanga khukhuhuchilila khutsililila na kenako khulondokhana khu lilakano yili.” Nalwo lwa yakhola lilakano naye, namuseevula khutsia.

Muprofeti Yakhalachila Ahabu Likhutsa

³⁵ Muprofeti mulala khurula mu shituma shia vaprofeti yavoolela weshie, khurulana khu lilako liu Mwami Nyasaye, “Ndumula.” Navutswa muprofeti mwenoyo yambakhana.

³⁶ Nalwo lwa yamuvoolela, “Isimba itsitsanga khukhwiira vwangu nu wakhanzivala, shichila wambakhane khulonda lilako liu Mwami Nyasaye.” Lwa yali niyakharulaho vwangu, isimba yalolekhaho nimwiira.

³⁷ Muprofeti mwenoyo yasimukha natsia khu mundu wundi, namuvoolela, “Nuyaanza ndumula.” Mundu mwenoyo yamurumula, namusalilitsa.

³⁸ Muprofeti mwenoyo yasimukha natsia khusinjila khundulu khu muhaanda, nalindanga khulola Mwami wa Israeli. Muprofeti mwenoyo yali wimwaminyi mwene, niyivohi shindu mu vweni vwevwe.

³⁹ Lwa Mwami Ahabu yali naviraho, muprofeti mwenoyo yamulaanga, navoola, “Yivi mwami, nali ningwananga mu liihe, lwa musikali yanderela mutsiku wa yali nakumile ni tsingulu, navoola, ‘Linda mundu uyu; niiva anyala khwilukha khuvirila munjila yosi, utsitsanga khwiirwa havukono hehe, inoho unyala khuvasitswa ifetsa vitonye tsiheelefu tsivaka.’

⁴⁰ Navutswa natsililila khukhalavana iyi neyo, mundu mwenoyo niyilukha.” Mwami Ahabu yamuchipa, “Umali khwikhalachila mwene likhutsa, khandi utsitsanga khurunga shivaso.”

⁴¹ Nalwo lwa muprofeti mwenoyo yarandula vwangu shilaka, shia yali niyivohi mu vweni vwevwe; ma Mwami Ahabu wa Israeli namumanyishitsa khuva mulala khu vaprofeti.

⁴² Muprofeti mwenoyo yavoolela Mwami Ahabu, “Mwami Nyasaye avoolanga, ‘Umali khuvoholola mundu wa nali nimbiritsi yiirwi. Khulwa yako, utsitsanga khwiirwa shichila wambakhana khumwiira; khandi vandu vovo vatsitsanga khwiirwa, shichila vambakhana khwiira vandu veve.’ ”

⁴³ Mwami Ahabu yakalukha ingo wewe mu litaala lia Samaria, natuunyi khandi nali nu vurima.