1 TIMOTEO 6 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Yavo vali khuli varukwa, vatushili khuhaana luyali khu varuchi vavo, khu khuvuli khuvakhuho nu mundu unyala khulomoloma shindu shitamanu khulondokhana khu lira lia Nyasaye nende mechitso keru.

² Varukwa va varuchi vavo vasuuvila, valeshe khulechelitsakhu varuchi vavo venavo, shichila ni vasuuvili khuli vo vali. Nikhali, venyekhanga khuvarumishila munjila indahi yene, shichila yavo vanyolanga vukhala khurula khu muhinzilu kwavo ni vasuuvili, khandi va vayaanza. Wenyekhanga wechitsi khandi wilwatse khulondokhana khu vindu yivi.

Mechitso ku Vuvehi khandi Vuhinda Vwatoto

³ Niiva mundu alikhuho wechitsanga liechitso lindi lukanu, khandi likhali khulondokhana na makhuva katoto ku Mwami weru Yesu Kristo, khandi khulondokhana khu mechitso ki idini yeru

⁴ mundu mwenoyo, anyala khuva wayichinjilila muno khandi shindu shivulakhuho shia yamanya. Nu mundu wayaanza mahangali khandi khulembana mutsimbakha tsia vutswa; tsichilanga nu khuva ni imbotokha, mahingani, manyeko khandi khwihaya hayitsa khutamanu,

⁵ khandi mahingani ka shia khase khosi karulanga khu vandu vi tsinganakani tsionekha, khandi vashili khumanyakhu shindu shiosi khulondokhana khu katoto. Vali ninganakani ndi idini ninjila indala inyala khuvakhola khuva vahinda.

⁶ Nu vulahi, idini ilombanga mundu khuva muhinda, niiva mundu mwenoyo wayikura vindu viali navio.

⁷ Shindu shivulakhuho shia khwalera mu shivala shinu. Shindu shivulakhuho shia khunyala khuvukula mu shivala shinu.

⁸ Navutswa niiva khuli ni shiukhulia nende tsinguvu, navio vikhutushi mu limenya lieru.

⁹ Navutswa yavo venyanga khuva vahinda, vakwitsanga mu machelitso; khandi vanyolekhanga mu mureeko kwi likomba liu vusilo khandi linyala khuvasalilitsa, linyala khuvononyinya nu khuvativitsa.

¹⁰ Khuyaanzilila tsisenti, nashio shirula shiu khukhola vindu vitamanu viosi. Vandu valala, shichila vali ni likomba liu khuyaanzilila tsisenti, vahaya haya mu lisuuvila khandi vayilerela vuveleli vunyishi mu mioyo chiavo.

Mivaalo ka Paulu khu Timoteo

¹¹ Navutswa yivi, uli mundu wa Nyasaye, cheliha ulekhane ni vindu yivi viosi. Chelitsa khuli unyala khuva wi likhola liu vulunji mu likhola, ulonde idini, uve ni lisuuvila, uve nu vuyaanzi, uve ni likhutsila khandi muhoma.

¹² Kwana liihe lilahi lilondokhananga ni lisuuvila. Haanda ni tsingulu tsiosi khu vulamu vwi mihika ni mihika, vwachila nulaangwa lwa wiyema havulavu vwoni vwovwo munjila indahi imbeli wa vashiahidi vanyishi.

¹³ Khuvoolelanga imbeli wa Nyasaye, uchilanga shia shindu shiosi nishiva mwoyo, khandi imbeli wa Yesu Kristo wiyema havulavu lisuuvila lielie imbeli wa Pontio Pilato,

¹⁴ ulonde malako yaka munjila inunji, khandi utsililile khukalonda mu vusuuvilwa khutukha Khulitukhu liu Mwami weru Yesu Kristo aliitsa khukalukha.

¹⁵ Khukalukha khwekhwe, khuliitsa khulerwa mumatukhu ka Nyasaye, wakasitswa khandi Mwamihi wonyene, Mwamihi wa vami khandi Mwami wa vami yaviritsa kaliitsa khwikholekha.

¹⁶ Ye neye wonyene unyala khuvula khukhutsa; ali mwoyo mu vulavu vu mundu anyala khuvula khwisuunda yatukhakhu. Mundu avulakhuho wamulolakhu inoho unyala khumulola. Aheelwi luyali nende tsingulu mihika ni mihika! Amina.

¹⁷ Voolela yavo vali vahinda mu vindu viu mu shivala shinu, valeshe khwichinjilila, navutswa vare lisuuvilitswa liavo, shikanyala khuva mu miandu chinyala khuvula khutsililila khuvaho tawe; navutswa vare lisuuvilitswa liavo mu Nyasaye, ukhuheetsanga nu mwoyo kwosi shia shindu shiosi, khulu khwenya khumenye limenya liu vuyaanzi.

¹⁸ Vavoolele vakhole kali malahi, vave nu vuhinda mu likhola mihinzilu milahi, vave nu mwoyo mulala ku khuhaana, khandi vave nu mwoyo kukhukavana via vali navio na vandi.

¹⁹ Munjila iyi, valiitsa khwilombela vene livishilu liliitsa khuva khuli musinji kwi tsingulu khumatukhu kaliitsa khuvaho; khulu khunyola vulamu, vuliitsa khuva vulamu vwatoto.

²⁰ Yivi Timoteo, linda vulahi vwene shia waheelwa khulinda. Lekhana na makhuva matamanu ku mu shivala shinu, khandi mahingani ku vusilo ka vandu valala valaanganga “Vucheli.”

²¹ Vandu valala vikholanga vali navwo; khandi shichila kenako vahaya haya mu lisuuvila. Tsimbavasi tsia Nyasaye tsive na munyi voosi.