1 TIMOTEO 5 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Khunyala Khukholela Vandi

¹ Ukhakondeshela musakhulu tawe; navutswa ulomolome khuye munjila indahi, khuli ulomolomanga khu tata wowo. Vukula vasatsa vashili vavukha khuli ni vamwavo vovo;

² vashele khuli ni vamama vovo, khandi vakhana vavukha khuli ni vambotso vovo, khurulana khu mwoyo mulahi.

³ Wenyekhanga uhaane luyali khu vakhutsakhali vatoto, vamenyanga vonyene vuchila mundu unyala khuvakhonya mu limenya liavo.

⁴ Navutswa niiva mukhutsakhali ali na vaana inoho vakoko, lukhuraanga lwene, vatukhananga veche khuvikha mu vikholwa mechitso khulondokhana khuli idini yavo yenyanga valinde vandu vi inzu yavo vene; khandi vave varunganga likoovi khu vivuli vavo nende vakoko vavo munjila yeneyo, shichila nako kayaanzitsanga Nyasaye.

⁵ Mukhutsakhali uvula mundu unyala khumukhonya, khandi warikala amenyanga wonyene, avikhanga lisuuvilitswa lielie mu Nyasaye; khandi atsilililanga mbasu nu vutukhu khusaala khu Nyasaye, namureevanga amukhonye.

⁶ Navutswa mukhutsakhali wakorela mu limenya liu khwiyaanzitsa mwene, ali khuli mundu wakhutsa khale, khali niiva ashili mwoyo amenyanga.

⁷ Yechitsa vakhutsakhali mivaalo yaka, khwenya mundu khuvula khuvalola vakholi shindu shitamanu.

⁸ Navutswa niiva mundu shianyala khuvula khuha viikho veve vindu via venyanga vaheelwi, khushila muno vandu vi inzu yeye mwene, mundu khuli mwenoyo wayambakhana lisuuvila, khandi nu mundu mutamanu khuvira mundu wambakhana khusuuvila.

⁹ Mukhutsakhali yenyekhanga avuli khuhandikwakhu lira lielie mu shitabu shia mira ka vakhutsakhali vahandikwamu, nashili khutukha mihika makhomi sita. Khumeeta khu kenako, yenyekhanga ave niyali musuuvilwa khu musatsa wewe

¹⁰ khandi ave ni yamanyikhana vulahi, shichila vikholwa vievie vilahi: vikholwa viu khutushitsa vaana veve munjila indahi, khwinjilitsa vacheni hango hehe, khukholela Vakristayo veshie mihinzilu munjila yu khwichehitsa, khukhonya vandu mu vutiinyu vwavo, khandi khwirulitsa nu mwoyo kwosi khukhola kali malahi.

¹¹ Navutswa lekha khuhandikakhu mira ka vakhutsakhali vashili vavukha mu shitabu shia mira ka vakhutsakhali venavo vahandikwamu; shichila lwa vavetsanga ni vali ni likomba liu khwenya khutsia lukhali, vambakhananga khurumishila Kristo;

¹² khandi valola khuli vakholi shindu shitamanu shiu khuvula khuva vasuuvilwa khu lilaaka lia vali nivalomba khuye.

¹³ Khumeeta khu kenako, vavetsanga nu mwiima ku khuva vakaara, vuchila khukholakhu muhinzilu kwosi, khandi vava nu mwiima kukhuhuya huya mu inzu indala nu khutsia mu inzu yindi. Shikali khuva nu vukaara, vuchila khukholakhu muhinzilu khwonyene tawe; navutswa nivamoonyi, khandi vinjililanga mu makhuva ka vandu vandi, nivalomoloma vindu via venyekhanga vavuli khulomolomakhu.

¹⁴ Khulwa yako, nakhayaanzi vakhutsakhali vashili vavukha vatsi mu tsikhali, nu khwivula vaana, khandi vimilili vulahi tsingo tsiavo, khulu khuvula khuha mutsiku weru vwiyangu vu khulomoloma vindu vitamanu khulondokhana khu khutsi.

¹⁵ Valala khu vakhutsakhali venavo, vayambakhana lisuuvila liavo, khulu khwenya khulonda Shetani.

¹⁶ Niiva mukhali wasuuvila, ali na vakhutsakhali mu vandu vi inzu yeye, khutukha avakhonye; khandi avuli khulekha likanisa khutiukhwa musiko mulitoho ku khuvakhonya, khu live nu vwiyangu vu khukhonya vakhutsakhali vamanani vavula mundu unyala khuvakhonya.

¹⁷ Vimilili vi likanisa vakholanga mihinzilu milahi muno khuli vimilili vatushili khurungwa hali khavili, khushila muno yavo vakholanga mihinzilu chiavo ni tsingulu khwilwatsa nu khwechitsa.

¹⁸ Mahandiko Matakatifu kavoolanga, “Muvuli khuvohakhu ihili munwa khuchikalila khulia, lwa muchirumishilanga khuhula imu” khandi “Muhinzili khutukha aheelwi murungu kwekwe.”

¹⁹ Ukhahulishitsakhu shiyaalo shiosi khulondokhana khu musakhulu uyaalwangwa, vandu vavili inoho vanyishi nivakhahaani vushiahidi tawe.

²⁰ Kondeshela havulavu vandu voosi nivalolanga, yavo voosi vatsilililanga khukhola vwoni, khulu khwenya vandi yavo khuria khukhola vwoni.

²¹ Muvoolelanga imbeli wa Nyasaye, khandi imbeli wa Yesu Kristo nende tsinjelosi tsindakatifu, mulonde mivaalo yaka vuchila khulekhakhu shindu shiosi, khandi muleshe khwihonela vandi.

²² Ukhayuyukhana khuvikha makhono koko khu mundu khumutakasa, khulu khukhola muhinzilu ku Mwami tawe. Ukhakholakhu vwoni vwa vandi vakholanga tawe. Tsililila mwene khuva munihu.

²³ Lekha khung'wa matsi konyene. Rumishilakhu idivai indititi ikhonyane khutuvula viukhulia via uliitsanga, shichila wamenya nu walwala.

²⁴ Vwoni vwa vandu valala vakholanga vwamanyikhana havulavu; khandi vwatukha khale havundu ha valiitsa khukhalachilwa, nivashili khutukhaho; navutswa vwoni vwa vandi vuvalondanga inyuma wavo.

²⁵ Munjila indala yeneyo, vikholwa vilahi viamanyikhana havulavu; khali yevo viakhamanyikhana havulavu, shivinyala khuviswa tawe.