1 TIMOTEO 4 - IBIBILIA INDAKATIFU MU LUTIRICHI LWITAKHO NENDE LWISUKHA

Vechitsi vu Vuvehi

¹ Roho avoolanga vulahi vwene ndi mumatukhu kukhumalilikha ndi vandu valala valiitsa khwambakhana khulonda lisuuvila liavo. Valiitsa khulonda miroho chiu vuvehi nende mechitso ka matimoni.

² Mechitso khuli kenako kalanditswangwa na vakaati vu vuvehi, vakhutsa tsinganakani tsiavo tsiu mukari, manya khuli tsiasambwa ni shivia shiakhanga mulilu mululu.

³ Vandu khuli venavo vakayanga vandu vasatsa nende vakhali khuvula khuhilana, khandi khulekhana ni viukhulia vilala, nivili via Nyasaye yalomba khuliilwa na yavo vasuuvila khandi vamanya katoto, nivamali khusanditsa mu lisaala.

⁴ Shia shindu shiosi shia Nyasaye yalomba ni shilahi; khandi shindu shivulakhuho shinyala khwambakhanwa numumali khushihuchilila khuvirila mu lisaala liu khusanditsa,

⁵ shichila likhuva lia Nyasaye nende lisaala navio vilombanga shindu shienesho khuhuchililwa.

Murumishi Mulahi wa Yesu Kristo

⁶ Niiva uliitsa khuvoolela vasuuvili vashieru mivaalo yaka, uliitsa khuva murumishi mulahi wa Yesu Kristo, watushila mu katoto karulanga khu lisuuvila nende mechitso malahi ka walonda.

⁷ Lekhana ni tsinganu tsia khale tsilondokhananga ni idini tsivula vukhala vwosi. Chelitsa khuli unyala uve mundu wayaanza Nyasaye.

⁸ Muvayo kwa mundu avayanga nu mulahi muno, shichila kukhonyanga mmbili, navutswa muvayo kulondokhananga khu idini kuli nu vukhonyi mu shia shindu shiosi, shichila kukhulaakanga vulamu vwa nunundi, khandi vwa matukhu kaliitsa khuvaho.

⁹ Livoola yili ni liatoto, khandi khutukha lihuchililwi nu khusuuvilwa.

¹⁰ Khukholanga muhinzilu ni tsingulu nu khuchemulila, shichila khwavikha lisuuvilitswa lieru mu Nyasaye uli mwoyo, uli Muhonyinyi wa vandu voosi, khandi khushila muno wa yavo vasuuvila.

¹¹ Wenyekhanga uvavoolele nu khuveechitsa mechitso yaka.

¹² Mundu yenyekhanga avuli khukhulechelitsa, shichila ushili muvukha; navutswa manyinyi mwiima mulahi khu vasuuvili mulilomoloma liolio, mu mwiima kwokwo mu limenya, mu vuyaanzi vwovwo, mu lisuuvila liolio, khandi mu vunihu vwovwo.

¹³ Vukula vwiyangu vwovwo vwosi khusoma havulavu Mahandiko Matakatifu, khwilwatsa nu khwechitsa vandu, khutukha lwa niitsa khwitsa.

¹⁴ Lekha khulechelitsakhu shihanwa shiuli nashio, shia wanyola lwa vaprofeti valomoloma, khandi lwa vasakhulu vakhuvikhakhu makhono kavo.

¹⁵ Vikha vindu yivi mu vikholwa; vikhole nu mwoyo kwosi, khulu khwenya vandu voosi valole khuli utsililanga mu limenya liolio.

¹⁶ Wiheenze vulahi mu limenya liolio, khandi khuli wechitsanga. Tsililila khukhola vindu yivi, shichila niiva unyala khutsililila khuvikhola, unyala khwihonyinya mwene khandi yavo vakhuhulilanga.