1 TIMOTEO 2 - IBIBILIA INDAKATIFU MU LUTIRICHI LWITAKHO NENDE LWISUKHA

Lisaala mu Likanisa

¹ Lukhuraanga lwene, musayanga numuyaanza ndi lisaala liu khwenyela vandi khukhonywa, khusaalilana vene khuvene, nu khusanditsa Nyasaye likholwi, khulu khukhonya vandu voosi;

² khulu khukhonya vami nende yavo voosi vali mu vwimilili, khu khumenye limenya li milembe, liu vuhonjelu, liu vutakatifu khandi liu khuha Nyasaye luyali.

³ Makhuva yaka ni malahi, khandi ka yaanzitsanga Nyasaye, uli Muhonyinyi weru,

⁴ wenyanga vandu voosi vahonyinywi, nu khunyola vucheli khulondokhana khu katoto.

⁵ Khuliho na Nyasaye mulala; khandi khuliho na woyo mulala uleranga halala Nyasaye nende vandu, mundu Yesu Kristo,

⁶ wihaana mwene khuvoholola vandu voosi mu shivala khurula muvuvohe. Nashio shiali shimanyilu mumatukhu katushili ndi Nyasaye yenyanga vandu voosi khuhonyinywa;

⁷ khandi nashio shivune shiachila nindovolwa khuva mwilwatsi, murumwa khandi mwechitsi khu vandu vi tsimbia tsindi, khulu khwenya khuvilwatsila makhuva khulondokhana khu lisuuvila nende katoto. Shingatanga tawe; mbolanga katoto!

⁸ Havundu hosi ha muliitsa khuva numuli vandu valiitsa khusaala, nivachinji makhono kavo lwa vasaalanga, vuchila khuva nu vurima inoho khulembana.

⁹ Khumeeta khu kenako, nakhayaanzi vandu vakhali vifwale tsinguvu munjila indahi, khandi vakanakane vene khulondokhana khu tsinguvu tsiavo; ma vifwale tsinguvu tsienetso munjila itushili. Valeshe khushiuka maswi kavo mu tsinjila lukanu na lukanu inoho khwifwala vindu vialombwa khu itsahabu inoho machina ku vukuuli vululu inoho tsinguvu tsiu vukuuli vululu;

¹⁰ navutswa vamanyinyi vikholwa vilahi, vikholwa via vakhali vivukulanga vasaala khu Nyasaye vakholanga.

¹¹ Mukhali yeche khuvirila mulihonjela nende vwichehitsi.

¹² Shinyala khuva mbuchililanga mukhali khwechitsa inoho ave nu vunyali khu musatsa wewe tawe; khutukha mukhali ahonjele vutswa.

¹³ Adamu neye waraanga khuloongwa, ma Hawa nalondakhu.

¹⁴ Shikanyala khuva Adamu neye wakaatwa tawe; mukhali neye wakaatwa, nakhola vwoni.

¹⁵ Navutswa mukhali aliitsa khuhonyinywa, lwa yivulanga vaana, niiva anyala khwikhutsila mu lisuuvila, mu vuyaanzi, mu vutakatifu, ma yifwale tsinguvu tsietsie munjila indahi.