1 PETRO 3 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Vakhali nende Vasatsa Vavo Vamenya

¹ Munjila indala yeneyo, munyi vakhali, muve vichehitsi khu vasatsa venyu, khu khali niiva mulala khuvo avula lisuuvila mu likhuva lia Nyasaye, mwiima kwenyu kunyala khumukhola asuuvili. Muvula shia muvoola khulondokhana khu kenako,

² shichila valalola khuli muli vanihu, khandi khuli mumanyinyanga mwiima mulahi.

³ Muvuli khurumishilakhu vindu vinyishi lukanu khwilomba vene, khulu khwenya khuva ni likoondo lilahi liene, khuli khushiuka liswi lienyu inoho khwifwala viuma vialombwa khu itsahabu, inoho khwifwala tsinguvu tsienyu tsindahi tsiene.

⁴ Navutswa likoondo lienyu lilahi, lienyekhanga live khuli lwa muli mu mioyo chienyu, likoondo linyala khuvula khuvwa, lirulanga khu mwoyo ku vuhoma khandi muhonjelu, kuli nu vukuuli vululu imbeli wa Nyasaye.

⁵ Vakhali vatakatifu vamenyanga khale, vali nivavikha lisuuvilitswa liavo mu Nyasaye, vachelitsa khwilomba vene khuva ni likoondo lilahi liene, lwa vali vichehitsi khu vasatsa vavo.

⁶ Sara yakhola ndio. Ye mwene yali mwichehitsi khu Aburahamu, khandi namulaanga muruchi wewe. Munyi navo vaana veve nunundi, niiva mulakhola malahi, khandi muvuli khutechelitswa ni shindu shiosi.

⁷ Munjila indala yeneyo, munyi vasatsa mumenye munjila indahi, halala na vakhali venyu, numumanyi ndi shivali ni tsingulu khuli tsia vasatsa vali natsio tawe. Muvavukuli nu luyali, shichila khali vo, halala na munyi valiitsa khunyola shihanwa shiu vulamu, shia Nyasaye amuheetsanga. Mukhole kenako koosi, khu shindu shiosi shivuli khukoyanyinya lisaala lienyu.

Linyakhana Shichila Khukhola ku Vulunji

⁸ Lukhumalilikha, munyi voosi muve nu mwoyo mulala, khandi inganakani indala. Muyaanzane vene khuvene khuli vasuuvili; khandi muve vandu vi mioyo milahi khandi vichehitsi.

⁹ Muvuli khuvanzila vutamanu khu vutamanu, inoho linyeko khu linyeko; navutswa muvakasitsi, shichila Nyasaye wamulaanga, khu munyole tsikhaavi.

¹⁰ Khuli Mahandiko Matakatifu kavoolanga, “Mundu wenyanga khumenya mu vuyaanzi mu limenya, khandi ave ni limenya lilahi aleshe khulomoloma vindu vitamanu aleshe khuvoola vuvehi.

¹¹ Alekhane ni vindu vitamanu makhole malahi; achelitsi khukhava milembe matsililile munjila yeneyo.

¹² Mwami alindanga munjila indahi vandu vi likhola liu vulunji, nu khuhulishitsa lisaala liavo; navutswa ahinganyinyanga yavo vakholanga vindu vitamanu.”

¹³ Ni viina unyala khumusalilitsa, niiva mwikombanga nu mwoyo kwosi khukhola malahi?

¹⁴ Navutswa khali niiva mulanyashitswa, shichila mukholanga ku vulunji, mwakasitswa muno! Muvuli khuriakhu mundu inoho khuheenda mwoyo kwosi.

¹⁵ Navutswa muhaane vukhumi khu Kristo mu mioyo chienyu; khandi mumuhe luyali khuli lwa ali Mwami. Mwirecheshe shia khase khosi khwishinga khurula khu shia mundu wosi, unyala khumureeva makhuva khulondokhana khu lisuuvilitswa lia muli nalio;

¹⁶ navutswa mukhole ndio, khuvirila mu mwoyo ku vuhoma khandi ku luyali. Mutsililile khuva ni tsinganakani tsienyu tsiu mukari tsindahi, khu lwa munyekwa na yavo valomolomanga vindu vitamanu khulondokhana khu mwiima kwenyu mulahi khuli valondi va Kristo, valole tsisoni shichila ka vavoolanga.

¹⁷ Nu vulahi, niiva ni lienya lia Nyasaye khunyakhana shichila khukhola malahi, khuvira khukhola vindu vitamanu.

¹⁸ Kristo yakhutsila vwoni vweru lulala lwonyene; mundu mulahi khukhutsila vandu vooni, khulu khumulera khu Nyasaye. Yiirwa mu mmbili, navutswa yakholwa khuva mwoyo khuvirila mu roho,

¹⁹ khandi khuvirila mu roho, yatsia maniyilwatsa khu miroho chiali nichiavohwa, chia vandu vali nivakhutsa;

²⁰ miroho chienecho, nachio chia vandu vambakhana khusuuvila Nyasaye, lwa yalindilila muvwikhutsili mumatukhu ka Nuhu yumbakhanga liaro lielie. Isavu indititi ya vandu, navo vali mu liaro -- voosi vandu munane—navo vahonyinywa khuvirila khu matsi;

²¹ shiali khuli shimanyilu shiamanyinyanga libatiswa, limuhonyinyanga nunundi. Shikanyala khuva nu khwisinga khurulitsaho mamisu khu mmbili tawe; navutswa lilaaka lialombwa khu Nyasaye khurula khu tsinganakani tsiu mukari tsindahi, nalio limuhonyinyanga khuvirila mu lisimushitswa khurula mu likhutsa lia Yesu Kristo,

²² watsia mwikulu khandi uli khuluveka lu mukhono musatsa kwa Nyasaye, wamihanga tsinjelosi tsiosi nende vu vunyali nende vi tsingulu tsiu mwikulu.