Zimbazi 2 - Luganuzi Luswanu Kuli Wanhu Wose 2002

Cambuzi ce Mahala

¹ Gwe mwanangu, wiyijizaje zono nghukulonjela, kanyhi wulece kuzisemwa zono nghulonjela witume.

² Hulicize kuli ze mahala, wuzimanye.

³ Heya, wulombe wutuje wumanye, no kuwucemeleza wizuce.

⁴ Wulondole wuhidimbaye, nha vyono wali wuyilondole fweza, hamba sawo yono hundikwe.

⁵ Na hono wulondole wuhidimbaye, kosuma kuyimanya nhunizo ye cogopo co Muwaha Mulungu, nagwe baho, ho kosuma kuzimanya za kuli Mulungu.

⁶ Hambi nha yo Muwaha Mulungu du, mono kawapelaga wanhu mahala, na muli mwene, mo vilawaga wumanye wose no wizuce.

⁷ Kanyhi mwene, yo kalavyaga wutazi no wucitilwe, kuli wose we ling'ani, ne wanhu wehuwilwa.

⁸ Kanyhi, yo mweneco du mono kawacitilaga wose, wono wawatendelaga wayawo ko wukali, no kuwadima wose wono welavizye kuli mwene.

⁹ Holeka, hono wuhulicize 'ne, baho ho komanyila zono zili mugoloka, na ze ling'ani, kanyhi swanu. Kanyhi kosuma kuzimanya zono zikunojeye witume.

¹⁰ Kowa wina mahala, no wizuce wako wokupela wusangalale mu mutima wako.

¹¹ Wizuce wako no wumanye wako, vyokukamisa

¹² no kukwimila, ho wulece kwituma zimbi yaye. Navyo vyokutemanula ne wanhu wono wendile makani-kani, kuli zono walongaga

¹³ i wanhu wono wakondya kuyileka mikalile ye ling'ani, no kwikala mu citi co wubi,

¹⁴ wanhu wono wendezwaga mu wituma zimbi, wono wasangalilaga mu zimbi,

¹⁵ wanhu wono wayisina mbeka, wono si wosuma hamba kwitumbilwa yaye.

¹⁶ Kosuma kumwilega mucekulu musenyha, mono yakujela kukupepeleza kwe zinghani zakwe ndece,

¹⁷ mono si mwihuwilwa na kuli mulume wakwe mwenco, mono kanyhi, yakusemwa no wilahize wakwe.

¹⁸ Na hono wubite ku kaya yakwe, ale, wumanye nha vyono, wutyatizye nzila ye lifwa. Na hono wubite, nha cinji, wukuyisejelela yisi ye wafu.

¹⁹ Hambi nha hasina munhu mono yabita kumulamusa, mono kanyhi yawuya. Hambi nha si kowuyajila kanyhi mu nzila yo wumi.

²⁰ Holeka agwe, yikunojeye wutyatye musambo we wanhu waswanu, wono wekaye mu mikalile ye ling'ani.

²¹ Hambi i wanhu we ling'ani, kanyhi wono wakwilaniciye, nha wokwikala mu yisi yetu yiyi.

²² Langa i wabi, Mulungu kolowawusiza lukulu mu yisi, yawakulanje i wanyo wubi, nha vyono wavikulaga vilimwa mu muhangha.