Zefaniya 1 - Luganuzi Luswanu Kuli Wanhu Wose 2002

¹ Ayi yo nghani yono Muwaha Mulungu yamupela Zefaniya, u mwana wa Kushi, mwana wa Gedaliya, mwana wa Amaliya, mwana wa Hezekiya, mu vilo vya Yosiya Mwana wa Amoni mutemi wa Yuda.

Lizuwa lyo Muwaha Mulungu lyo wuling'anize

² Muwaha Mulungu yakatya, “Ane novihodanga vinhu vyose vyono vili mono'nze,

³ nowongomeza wanhu wose hamonga ne zinimu, ne zindeje ne zisomba. Ne wabi nowongomezeza lukulu. Kanyhi nowongomeza wanhu wose, hamba hasina cinhu cumi co cose cono colosigala. Ane no Muwaha Mulungu vyo nghutya.

⁴ Nowalipiciza wanhu wa Yelusalemi, sunga na wose wono wali mu yisi ya Yuda. Nowuhodanga wityatye wono wupulute wo kuhemba Baali, hamba hasina yunji kanyhi, mono kolowakumbucila wakohani wa Baali wono wamwitumamilaga.

⁵ Kanyhi nomuwusiza lukulu munhu wo wose, mono kabitaga mwi'tembe mucanyha, kawa kuvihemba lizuwa no mwezi sunga ne zinyelezi. Kanyhi nowawusiza lukulu wose wono wahembaga nene, no kwilahiza vyono wena cihuliko kuli'ne, na kuno kanyhi, ho wakwilahiza kuli mulungu Moleki.

⁶ Kanyhi nowawusiza lukulu na wawo wono wawuya ne nyuma hamba si wakunhyatya'ne kanyhi. Wawo wono si wakuza kuli'ne hamba si wendile kuwulondola wutonji wangu niwatonje.”

⁷ Lizuwa lyo Muwaha Mulungu lili behi, lizuwa lyono Mulungu kolokwikala no kulavya wuling'anize. Holeka wikalaje wutule hali Muwaha Mulungu. Hambi Muwaha Mulungu, nha yakwiwikaniza yawalavye yikumbiko wanhu wakwe, nayo yakondya kuwahagula wono yawalalice.

⁸ Na mwi'zuwa lilyo lyo wuwulagwe, nolowalipiciza i wawaha we lilumbo, hamonga ne wana we watemi, sunga na wose wono wakwibata myoto ye cijenzi.

⁹ Kanyhi nolowalipiciza wose wono wakuhemba nhe wanhu wono si wamumanyile Mulungu, hamonga na wono wahizaga no kuwulaga, ho wazimemye ngaluzi zinyumba ze wawaha wawo.

¹⁰ Mwi'zuwa lilyo yakutya Muwaha Mulungu, “Molohulika mazi ge cililo mu Yelusalemi, ha Mulango we Somba. Kanyhi molohulika cililo ciwaha mwi'tumbi lye kejete lye likaya, hamonga ne lizozo yiwaha mu matunda.”

¹¹ Mulile mwikunguze kolo mukuzihulika zizi, anye mono mwikaye mu mhelo ye likaya, hambi wasuluza wose nha wowa wakondya kufwa!

¹² “Mu cipango cico nolosola tala niyimulice Yelusalemi, niyiwone vyono yinha. Kanyhi nolowapezya iwanhu wewoni, wono weyitumbilaga weneco, wono wakwiyitya, ‘U Muwaha Mulungu, si konoza ziswanu hamba si konoza zimbi.’

¹³ U wugoli wawo wolosolwa, ne zikaya zawo zolohodangwa. Hamba si wolosumila lukulu kanyhi, kwikala mu zikaya zawo zono wakuzenga, hamba kung'wa divayi mu wulawa mu migunda yawo ye zabibu yono walimile.”

¹⁴ Lizuwa liwaha lyo Muwaha Mulungu, lili behi kuza, likuza mbela mbela! Ne lizuwa lilyo lyolowa yizuwa lyo wusungu, hamba ne wasilikale we vilungo wololila so wuwula witumbilo!

¹⁵ Lyolowa yizuwa lyo wutamiswe, yizuwa lyo wugaye no wambuce, yizuwa lyo wongomezwe, yizuwa lye citi na lye nghungulyosi, wutitu ne mavunde,

¹⁶ lizuwa lyono limemile mazi ge zindulele zo wulugu, ne cililo co wihome we wasilikale, wakwinjila mu makaya na mu minala mitali muno.

¹⁷ Muwaha Mulungu yakutya, “Ane noleta wugaye muli wanhu, ne wanhu wose wowa kujenda nha wali cibofu. Hambi nha wose wasutizye kuli'ne. Holeka sakami yawo yokwitika nha malenga, ne mivimba ye miwili yawo yolowa minji mu'si.”

¹⁸ Na mwi'zuwa lyono Muwaha Mulungu kololajila likuwo lyakwe, fweza ne zahabu zawo zose, hamba si zolowaponya yaye, hambi i yinze yose, nha yolowa yakondya kutakamizwa no moto we likuwo lyakwe. Hambi nha kolowadumya wanhu wose wono wekaye mono'nze, ko mudumyo wo wogofye wuwaha.