Zakaliya 1 - Luganuzi Luswanu Kuli Wanhu Wose 2002

Muwaha Mulungu yakuwacema wanhu wakwe wamuwuyile

¹ Mu mwezi wo munana wo mwaka we kejete lono mutemi Daliyo yali yatemile Pelisiya. Muwaha Mulungu yakamulonjela muwizi Zekaliya, u mwana we cilume wa Belekiya kanyhi u mwizukulu kwa Ido yabite yakawalonjele wanhu yatye,

² “Ane no Muwaha Mulungu wenyu, nali niwakoleywe yikuwo yiwaha muno i wasogo zenyu.

³ Ninga 'lu nghumutyenyi, mbuyilenyi, nane nomuwuyilenyi nye.”

⁴ Mulece kwihwana nhe wasogo zenyu wono katali i wawizi wawapela zinghani zangu ho wagalece metumo gawo mabi, hamonga no wubi wawo. Ninga wene siwahulika, hamba kumvumila 'ne yaye.

⁵ Alu i wasogo zenyu, hamonga ne wawizi wawalya wose, wakondya kufwa.

⁶ Nane nghawapela i wasogo zenyu suguzi hamonga no wulajiize, mu nzila ye wetumami wangu wawizi. Ninga wene wakalema kuzityatya, hodu nane nghawa kuwaleka, wakatuga wugaye wuwaha. Ninga kanyhi wakanena no kumanya vyono, Ane no Muwaha Mulungu, we Mihanga, nakondya kuwalipiciza nha vyono yiwanojeye, nha vyono nali nalamula niwatendela.

Wulajilwe wulongozi: Fwalasi

⁷ Ale, mu mwaka we kejete, wa mu wuteme wakwe mutemi Daliyo. Mwi'zuwa lye makumi mejete na yine, lya mu mwezi we likumi na monga ne cilo, (Mwezi wono wacemwaga Shebati) Muwaha yakangubulila.

⁸ Nghamuwona malayika wo Muwaha Mulungu, yali yali mucanyha ye fwalasi ndunghu, yali yemile behi ne mibici ye mihadasi mwi'lolo. Mu nyuma yakwe hali hozili fwalasi zinji ze liwala lidunghu, na ze liwala lye 'hali ne zinzelu.

⁹ Nghamuwuza nghatya, “Gwe Muwaha wangu, zifwalasi azi zikulajila nghanici?

¹⁰ Muwaha Mulungu kawatuma awa, ho waze wayilanje yinze.”

¹¹ Nawo wakamulonjela malayika wakatya, “Cayipilima yinze yose, kanyhi cawona vyono yinze yose yitulile kanyhi yisina wutazi.”

¹² Hobaho malayika yulya yakatya, “Gwe Muwaha Mulungu we Mihanga, wayikolelwa yikuwo Yelusalemi ne matumbi gose ga Yuda, sunga alu yafika myaka makumi mupunghati. Alu ho kojendelela sunga nili kuwawonela yikuwo, ho wuze wuwalajile lihewa lyako?”

¹³ Nayo Muwaha Mulungu yakamupitula malayika mu zinghani zono zina wutuzwe.

¹⁴ Hanyuma malayika yakanonjela niwalonjele wanhu vyono azi zo Muwaha Mulungu we Mihanga yakutya, “Nghuyiwonela lusungu no wendo Yelusalemi, likaya lyangu lyono lyelile.

¹⁵ Kanyhi nghuziwonela yikuwo zinghungugo zono zicehile kanyhi zina mulamu. Ku soko lono likuwo lyangu lyali lyapola so wanhu wangu, zinghungugo zizo, ho zikacila muno kuwagaza wanhu wangu no kuwetumya vibi.

¹⁶ Alu nawuya kanyhi ha Yelusalemi, ho ndajile zo lusungu lwangu mwi 'kaya. Ne Nyumba yangu yonozelezwa, ne likaya nalyo, lyozengwa kanyhi.”

¹⁷ Kanyhi malayika yakanonjela yakatya, nyanze nitye, “Muwaha Mulungu we Mihanga yakutya, makaya gakwe gose, gotuga wulugutwe, kowuyajila kanyhi kuyitaza Yelusalemi, no kuyiwala vyono lyo likaya lyakwe.”

Wulajilwe we kejete: Mahembe

¹⁸ Na mu wulajilwe we kejete, nghawona mahembe mane ga nghongolo.

¹⁹ Nghamuwuza kanyhi Malayika yu yulya mono calonganaga nayo nghamutya, “Mahembe gaga nhunizo yayo nyhici.” Yakamhitula yakanyitya, “Aga gemile gakulajila i vilungo vye yinze, vyono vyaweyagaza wanhu wa ku Yuda, na Isilayeli, na Yelusalemi.”

²⁰ Hanyuma Muwaha Mulungu yakandajila wetumami wane, wono wali webate ne zinyondo zawo.

²¹ Nghamuwuza kanyhi nghatya, “Alo wanhu awano, waza kunozaci?” Yakamhitula yakanyitya, “Waza ho wazitajile woga no kuzigwisa zinghugugo zono zayikandamiza yisi ya Yuda, sunga zikaweyagaziza wanhu wose wa Yuda ako na ako.”