Zabuli 89 - Luganuzi Luswanu Kuli Wanhu Wose 2002

Lwimbo lwa mwidaha lyo wugazice we likungugo

¹ Gwe go Muwaha Mulungu, ane nokwimba zo lusungu lwako cibitilila, nane nozanziza zindelo zose zo wihuwilwa wako.

² Manyile nha vyono lusungu lwako, lwikalaga cibitilila, no wihuwilwa wako, wukamile kotya wulanga.

³ Wukawa kutya, “Ane noza cilagane no muhagulwa wangu, nimwilahila mwitumami wangu Dawudi.

⁴ Nane nomuwika wa mu lulelo lwako yawe mutemi vilo vyose, kanyhi nowukangaza wutemi wako cibitilila.”

⁵ Gwe go Muwaha Mulungu, wulanga wokumya ze mapoto gako, hamonga no wihuwilwa wako mu mhuga ya wono welile.

⁶ Alo nani 'mbi ku wulanga, mono kokwihwananizwa no Muwaha Mulungu? Hasina hamba monga mu viwumbwa vyose, vya ku wulanga, mono kokwihwananizwa nagwe!

⁷ Agwe wogopwe mu wihangulize wa wono welile, na wose wono wakupilime, wakukupela lilumbo, kanyhi wakogopile.

⁸ Gwe go Muwaha Mulungu go Mulungu we mihanga, Alo nani mbi mono yena vilungo, nha gwegwe go Muwaha Mulungu? Agwe mono wuli mwihuwilwa muli zose.

⁹ Agwe wutemile vilungo vye lilenga, no kugatuza mawingo galyo kolo gakwinuka.

¹⁰ Agwe walipondanga lizoka Lahabu no kuliwulaga. Wukawasumila walugu wako mu vilungo vyako.

¹¹ Wulanga wo wako, kanyhi yisi yo yako, Agwe wayiwumba yinze, hamonga na vyose vyono vili mumo.

¹² Wawumba kusumuka na kutakama, ne matunda ge Taboli na Helimoni, gakusangalalila litagwa lyako.

¹³ U muwoko wako wuli vilungo, agwe wuli vilungo muno muno kuciza!

¹⁴ Hambi ze ling'ani no wuling'anizi, nha wo musinji wo wutemi wako, hambi lusungu no wihuwilwa wako, nha vijeye mu witume wako.

¹⁵ Gwe go Muwaha Mulungu, wo wamoti wanhu, wono wakukuhemba gwegwe no kukwimbila, wono wekaye mu wuzelu wo lusungu lwako.

¹⁶ Wena nyemo misi yose ku soko yako, kanyhi wakukukumya ku soko ye ling'ani yako.

¹⁷ Hambi nha yo gwegwe nhojo ne vilungo vyawo, na ko lusungu lwako wukucipela wusume.

¹⁸ Gwe go Muwaha Mulungu, hambi u mudimi wetu nha muhagulwe na gwegwe, agwe mono welile wa Isilayeli, yo gwegwe mono wucipelile mutemi wetu.

Wihuwizo wo Mulungu kuli Dawudi

¹⁹ Katali wawalonjelela mu wugubulilwe, wono welile wako, wukatya, “Nimupela wutazi yunji mono yali vilungo, nimutemya yunji mono nimuhaguye muli wanhu.

²⁰ Nimuhagula Dawudi u mwitumami wangu, niwa kumwitila ne mafuta gangu gono gelile.

²¹ U muwoko wangu we vilungo, wowa wuli hamonga nayo vilo vyose. Ne vilungo vyangu no mweneco, vyomusikamya.

²² Hamba ne walugu wakwe si womusumila lukulu, ne wabi nawo, hamba si womugaza yaye.

²³ Nane nowatijinha walugu wakwe, nowongomezeza lukulu wose wono wamusulile.

²⁴ Nowa mwihuwilwa kuli mwene, kanyhi nomuwonela lusungu, nayo kotujila wusume mwi'tagwa lyangu.

²⁵ Nane nowutandaza wutemi wakwe, wufice sunga ko kwi'lenga lya Meditelaneya, nayo kotema sunga ko kwi'kolongo, lya Efulata na Tigili.

²⁶ Nayo kononjela yawe kutya, ‘Agwe yo gwegwe Baba, kanyhi yo gwegwe go Mulungu wangu, kanyhi yo gwegwe mono wuli mudimi wangu, ne mhonelo yangu.’

²⁷ Nomunoza yawe mwanangu mulelwa wangu mulongozi, kanyhi kowa muwaha yacizize watemi wose wa mono'nze.

²⁸ No lusungu lwangu lwa kuli mwene, nolukamisa cibitilila, ne cilagane cangu ca kuli mwene, cokwikala cibitilila.

²⁹ No lulelo lwakwe lwe citemi-temi, lojendelela kutema cibitilila, ne ligoda lyakwe lyo wutemi lyojendelela du, nha vyono winha wulanga.”

³⁰ “Ninga langa u lulelo lwakwe, hono lulece kugebata i malajilizo gangu, hono walece kuwa ne mikalile, yono yiling'aniye ne malajilizo gangu,

³¹ na hono wawubene wulajilize wangu, walece kuwa ne cihuliko kuli zo wutonji wangu,

³² baho langa ho nowatowela, ku soko ye masutya gawo, kanyhi nowalipiciza ku soko yo wubi wawo.

³³ Ninga hamba nhavivyo, nojendelela du kumwenda Dawudi, hamba si nowulecela lukulu, u wihuwizo wangu kuli mwene.

³⁴ Sinocibena cilagane cangu ca kuli mwene, hamba sinoyipitulilila lukulu, nghani yono namwihuwiza.”

³⁵ “Nane ko wele wangu, nilahiza kamonga du, na mbeka, hamba sinomukonga Dawudi yaye.

³⁶ Lulelo lwakwe lokwikala cibitilila, no wutemi wakwe wowa nhe lizuwa.

³⁷ Kokwikala cibitilila nha vyono winha mwezi, nha muhomelezi mwihuwilwa mu mwanya.”

Wukalale ku so wusumwe wo mutemi

³⁸ Ninga lu 'gwe go Mulungu, wumukoleywe likuwo muno, u mutemi muhagulwa wako, kanyhi wakondya kumutaga.

³⁹ Waciwusa cilagane cono wacinoza, no mwitumami wako, wukawa kuwutaga mu nhope mukumbo wakwe wo wutemi.

⁴⁰ Wagakumulanga majinji ge likaya lyakwe, wukagabenanjiza ne magomawakali gakwe.

⁴¹ Alu wose wono wakukolela baho, wakuyihiza sawo yakwe. Ne wekalani wayagwe nawo, wose wakumusekanga.

⁴² Wawapela walugu wakwe cisumisumi, kuwasangalaza walugu wakwe wose.

⁴³ Kuvidujiza vitwalo vyakwe, kumuleka yasumwe ne walugu wakwe mu wulugu.

⁴⁴ Kumuwusiza wulajilize wakwe, wo wutemi, kuwugwisa wutemi, wakwe.

⁴⁵ Kumucepulila vilo vyakwe vyo wuzelelo, wamupela cevu ciwaha.

Kulomba wukombozwe

⁴⁶ Gwe go Muwaha Mulungu, alo kokwihundika sunga cibitilila? Alo likuwo lyako lyokwaka sunga nili?

⁴⁷ Ninga weze kukumbucila, vyono nina vilo vicefu vyo wikale wangu, go Muwaha Mulungu! Nha yo gwegwe mono waciwumba, kanyhi ho cifwe mwizuwa linji!

⁴⁸ Alo nani 'mbi mono kokwikala yalece kufwa? Hamba nani mwene mono kosuma kumuponya munhu ne lifwa?

⁴⁹ Gwe go Muwaha Mulungu, alu lusungu lwako luli hayi? Hamba wihuwizo wako wono wamwihuwiziza Dawudi, ko wihuwilwa wako, alu luli hayi lo?

⁵⁰ Gwe go Muwaha Mulungu, wukumbucile ta, vyono wanhovulanga ane no mwitumami wako, na vyono nghugakangalila maligo, ga wono si wakumanyile gwegwe.

⁵¹ Gwe go Muwaha Mulungu, walugu wako wakumusekanga mutemi wako, muhagulwa wako. Wakumuliganga ko kose kono yakubita.

⁵² Muwaha Mulungu yalumbwe cibitilila! Heya! Heya!