Zabuli 76 - Luganuzi Luswanu Kuli Wanhu Wose 2002

U Mulungu yo yali cisumisumi

¹ U Mulungu yo yamanyice mu yisi ya Yuda, ne litagwa lyakwe lye 'tambule mu Isilayeli.

² Ne lihema lyakwe lili ku Salemi, no wikalo wakwe wuli ku Sayuni

³ Kuko ko yabenanga zisonga ze walugu, yakabena ne ngula, no mumaje, heya, sunga ne vitwalo vyose.

⁴ Agwe wina nhojo, wulawiliciye, si nhe matunda ge cibitilila.

⁵ Na wono wena nhumbula ye vilungo, wabokwa mateka gawo, nalu wagonile zinhongo zawo zo mudumilizo, i vilungo hamonga no wunghula wawo wose, wuwa nghani ya bwete du.

⁶ Nagwe go Mulungu wa Yakobo, wali weza kuwakalipila du, hodu du, zifwalasi, hamonga na wono wali wali mucanyha ye zifwalasi, wose wakafwa yitenene.

⁷ Agwe go Mulungu, mbeka wuli wa kogofya muno, alu nani kanyhi 'mbi, mono kosuma kukangalila hono wuwe wakolwa likuwo?

⁸ Nagwe nha kuyilajila ning'aniza yako, vyono yinha, ku wulawa ku wulanga, nayo yinze yiwa kogopa no kunyamala twii,

⁹ lono wali weza kwinuka no kuling'aniza, kuwaponya wose wono wakwiwonelwa mono'nze.

¹⁰ Ne likuwo lye wanhu, likuletelaga lukumyo lono lucizize muno; nawo wono waponile ku wulugu, wowa kuzikumbucila zi sikukuu zako.

¹¹ Alenyi mumupelaje Muwaha Mulungu, u Mulungu wenyu, vyono mwehuwiza, nanye mono muli behi, mupelenyi vipegwa Mulungu, mono yanojeye wanhu wamogope.

¹² Mwene kawawusiza wumi i wawaha wedunhumuzi, kawogofyaga muno muno watemi we yinze.