Zabuli 62 - Luganuzi Luswanu Kuli Wanhu Wose 2002

U Mulungu yo mudimi wangu

¹ Ane nimulindiye Mulungu du, hambi i mhonelo yangu, nha yilawaga kuli mwene.

² Mwene, yo mudimi wangu mono yakumhonya. Mwene wo wihundiko wangu, muli mwene nikaye mholile.

³ Alu mojendelela kulewana no munhu sunga nili, mono yenha lijinji lyono liname, lyono lili behi no kumwaguka?

⁴ Heya, anye langa mukuhila mungwise du, ku wulawa mwi'lumbo lyangu. Ne nyemo yenyu 'nye, yili ku wulonga, zo wulambi du. Anye mulugutaga du ko wulonje, ninga mu zinhumbula zenyu, mukulijitiza.

⁵ Ane nimulindiye Mulungu du, no witumbilo wangu wuli muli mwene.

⁶ Nayo yo mweneco du, mono kandimaga, no kumhonya, mwene yo mudimi wangu. Holeka hamba sinosinjisika yaye.

⁷ I mhonelo no lukumyo lwangu, vyose vikulawa kuli Mulungu, hambi Mulungu nha wo wutizizo wangu, kanyhi mwene yo mutazi wangu.

⁸ Nye nyo wanhu, mumwitumbile Mulungu nhondo zose, kanyhi mumulonjele ne visakwa vyenyu. Hambi Mulungu nha wo wutizizo wetu.

⁹ Wanhu wose nha wehwanile muhe wo wehele, wawaha ne wadodo, wose yo nghani ya bwete du, na hono wuwapime, si waficile hamba kilo, wose wapelupelu muno si nho muhe wo wehele.

¹⁰ Mulecele lukulu kwitumbila wuhizi, hamba kwikumizya sawo yo wuhizi, kanyhi mulece kuzitumbila zisawo hamba ziwe zonjezece muno.

¹¹ Mulungu kalonga nghanghulo monga, nane hulika nghanghulo nyinji, vyono wuwaha wose, yo sawo yo Mulungu,

¹² heya, u lusungu nha lwakwe Muwaha Mulungu, hambi agwe nha kumupelaga munhu wo wose, mu nghango ye metumo gakwe.