Zabuli 55 - Luganuzi Luswanu Kuli Wanhu Wose 2002

Wulombe wo munhu mono yakwiwonelwa

¹ Gwe go Mulungu, wuhulicize wulombe wangu, wulece kuwutumbila mugongo wulombe wangu.

² Nghukunena wuhulicize kanyhi wumvumile, nakondya kukatazwa no wugazice wangu.

³ Nane nogope muno so wulonje, wokogofya we walugu wangu, na ku soko yo wiwonelwa ne wanhu wabi. Wawo wanhu wabi wakungaza muno, wakumbonela likuwo kanyhi wasulile.

⁴ Ne nhumbula yangu yimemile woga, no wogofye we lifwa wundomile nene du.

⁵ Nane nghucicima so woga wuwaha, nenjililwa no wogofye wuwaha muno.

⁶ Yali yiwe yili ciba, hono nali niwe ne mabawa nha nziwa! Nali nguluce mbite kutali nghacehe kuko.

⁷ Heya, nali mbite kutali muno muno, nghacehe mu nyika.

⁸ Nali nhizize hanhu hono hapolile, niwe kutali muno ne libeho lyo mukukunzo.

⁹ Gwe go Muwaha Mulungu, wuwatemanulaje milonjele yawo, hambi nha nghuwona kowuli, wuwulaji no wugombe kuko kwi'kaya,

¹⁰ vilipilime likaya misi ne cilo, no kuliletela likaya wuwulaji wuwaha,

¹¹ Wuhodanji watandala mwi'kaya lyose, hamonga no wisuzi no wiwonelwe hanhu hose.

¹² Hono mulugu wangu yali yasimanje lunji, nali sume kuzikangalila zizo, na hono mono yasulile yali yambedegale, nali sume kwihundika niwe kutali no mwene.

¹³ Kumbe lu, yo gwegwe go muyangu, yo gwegwe mwiyendi muyangu mono cizoweye muno!

¹⁴ Ase cali ciyizoweye, ciduwanaga nha munhu na mwiyendi muyagwe, kanyhi cali cihembanaga, hamonga mu Nyumba yo Mulungu.

¹⁵ Ale ciba walugu wangu wafwe i vilo lono vikali, wabite ku yisi ye wafu lono wakali womi, hambi wubi nha wuwamemile twaa, sunga mo mugati mu zinhumbula zawo.

¹⁶ Ninga ane nghumulilila Mulungu, nayo Muwaha Mulungu komhonya.

¹⁷ Ane nikalaga du nghulila ko wukalale, cinyamihe, hakali mitondo, na mu misi mugati, ninga mwene kolihulika lizi lyangu du.

¹⁸ Mwene komhonya no kumbika mholile, mu wulugu wono cidomile nawo, hambi walugu wangu nha wenji muno.

¹⁹ U Mulungu mono yatemile ku wulawa cibitilila, mwene kotega likutu lyakwe, kowasuma, hambi wene nha si wawukamisaga wulajilize, hamba kumogopo Mulungu kose.

²⁰ U muyangu yakondya kuwatowanga i weyendi wayagwe, yakondya kubena ne vilagane vyakwe.

²¹ Ne zinghani zakwe zitelemeye, si nhe tilazi, ninga nhumbula yakwe, ayo yisulumilaga wulugu du. Nghani zakwe zili telele zinha mafuta, ninga, zitemaga kotya mumaje mukali.

²² Mulecelaje Muwaha Mulungu, wugazice wako wose, nayo kokucitila muli zose, hambi mwene nha si kamulekaga munhu, wakwe we ling'ani yasumwe.

²³ Ninga i wanhu wawulaji, hamonga ne wanhu wabi, u Mulungu kowategula mu vitenjelo vyawo, lono wakali hamba si wanaficila nusu, ye vilo vyo wikale wawo mono'nze. Ninga ane nokwitumbila gwegwe du go Mulungu.