Zabuli 42 - Luganuzi Luswanu Kuli Wanhu Wose 2002

CITABU CE KEJETE (Zabuli 42–72 ) Wulombe wo munhu mono yawingwa kwawo

¹ Nha vyono nghambaku ya sicilo, yisulumilaga, malenga ga mu cikolongo, ale, nhavivyo nane vyo nghukaluciye, 'gwe go Mulungu wangu!

² Nimukaluciye Mulungu, heya, nina nyhilu yo Mulungu mumi. Alu, hamba nomuficila nili ho nimuwone?

³ Mahozi gaweza yo ndigwa yangu ku misi, na ku cilo, vilo vyose lono wakumbuza wakutya, “Yali hayi Mulungu wako?”

⁴ Nina wukalale wuwaha muno, kolo nghukumbucila zono zapuluta, vyono nali nilunzize na wanhu wenji muno, nghuwatonga cikubita ku Nyumba yo Mulungu, na vyono cali cisangalaye no kwimba zinyimbo zo wulumbe. Ne lipuga lye wanhu wakunoza sikukuu.

⁵ Alo nhawule nghalaye nhavivi mu nhumbula? Hamba nhawule nghugazika nhavivi? Alu hodu, nomwitumbilo Mulungu nomukumya, kanyhi Mulungu wangu no muponyi wangu.

⁶ Nina wukalale wuwaha mu nhumbula yangu, holeka nghukukumbucila muno gwegwe go Mulungu, nghukukumbucila ku wulawa mu yisi ya Yoludani, sunga ku Helimoni, na ku wulawa mwi'tunda lya Mizali.

⁷ Kandetela mawingo hamonga ne madudu go wusungu, mawingo hamonga no wuvulumuce wayo we malenga, vyakondya kungwila.

⁸ Muwaha Mulungu kamhelaga vye lihewa lyakwe ku misi, nane ne cilo nghumwimbila lwimbo lo lukumyo, nghumulomba mwene mono kamhelaga wumi.

⁹ Nane nghumulonjela Mulungu, umudimi wangu nghutya, “Alo nhawule wukusemwa? Alu nha vyo nili mu wukalale du, ku soko yo wubanwe ne walugu?”

¹⁰ Nakondya kutijinhwa ne matovulo gawo, lono nhondo zose wakumbuzanga wakutya, “Alu Mulungu wako yali hayi lo?”

¹¹ Alo so cici nghalaye nhavivi mu nhumbula? Hamba so cici nghugazika nhavivi? Alu hodu, nomwitumbila Mulungu, nomukumya, kanyhi, Mulungu wangu, no muponyi wangu.