Zabuli 37 - Luganuzi Luswanu Kuli Wanhu Wose 2002

Ndumilizo ye wabi ne waswanu

(Zabuli ya Dawudi)

¹ Wulece kwigaza ku soko ye wanhu wabi, wulece kuwawonela wivu i wetuma zimbi.

² Hambi wene nha wokwajilila musunho nhe mahanze, wonyala nhe vilimwa videce.

³ Wumwitumbilaje Muwaha Mulungu, witume ziswanu, holeka kokwikala wupolile mononze.

⁴ Wuyilondolaje nyemo yako kulawa kuli Muwaha Mulungu, nayo kokupela vyose vyono wukusaka mu nhumbula yako.

⁵ Wumulecelaje Muwaha Mulungu mikalile yako yose, wumwitumbilaje, nayo kokutaza.

⁶ Nayo kowunoza wuswanu wako wung'alale wuwe winha wuzelu, ne ling'ani yako yiwe yinha lizuwa lya mu misi mugati.

⁷ Ale, wutule hali Muwaha Mulungu, wumulindilaje ko wukangalizi, hamba wulece kwigaza na awalya wono wakumota muli vyawo, hamba kuli walya wono wakwitujila vinhu mu zinzila zimbi.

⁸ Wulecele lukulu kukolwa ne likuwo, hamba kwihangavya, hambi mu wunoza nha vivyo, nha muletaga wugazice du.

⁹ Ne wanhu wose i wetuma zimbi, nha wokongomezwa, langa wono wamwitumbiyo Muwaha Mulungu, wo wohala yisi.

¹⁰ Hambi nha cikali cidaha cidodo du, nayo mubi kowa yajililila lukulu, nagwe komulondola hanhu hono yali yekaye, hamba si kohawona kanyhi.

¹¹ Ninga i wapolo wo wohala yisi, kanyhi wo wowusecelela mulamu we mbeka.

¹² U munhu mubi, kamwihwesezaga, i zimbi du u munhu we ling'ani, no kumwikang'anhilila meno ko lusulo.

¹³ Ninga mwene Muwaha Mulungu, kamusekaga u mubi, hambi nha yamanyile du vyono u mudumo wakwe weza wuli behi.

¹⁴ I wanhu wabi, wakwegaga mimaje yawo, wakukunga no wupinde wawo, ho wawawulaje waciwa na wono wasina cinji, no kuwacinja wanhu we ling'ani.

¹⁵ Ninga mimaje yawo yiyo, yowacinya weneco mu zinhumbula zawo, no wupinde wawo wobenanjizwa-benanjizwa.

¹⁶ Isawo ndodo yo munhu we ling'ani yili ciba, si nhe sawo nyinji yono wena nayo i wanhu wabi.

¹⁷ Hambi u Muwaha Mulungu, nha kovibenanjiza i vilungo vye wanhu wabi. Langa wanhu we ling'ani, Muwaha Mulungu kawakamisaga muno.

¹⁸ Muwaha Mulungu kawakamisaga wanhu wehuwilwa, no wuhazi wawo wokwikala cibitilila.

¹⁹ Hamba vize vilo vibi, wene si wogazika yaye, hambi nha wowa wena ndigwa nyinji mu vilo vye lizala.

²⁰ Ninga i wanhu wabi, wokongomela wose, ne walugu wo Muwaha Mulungu, wonyala nhe maluwa ga mu mbago, na mbeka, wokwajililila lukulu nha lyosi.

²¹ U munhu mubi, kakopaga hamba si kalipaga yaye, ninga munhu we ling'ani, kanozaga du lihewa no kulavya bwete.

²² Wono wakondya kulugutizwa no Muwaha Mulungu, wawo wo wohala yisi. Ninga wono wakondya kulijitwa no Muwaha Mulungu, wawo wowinjilwa kutali.

²³ U Muwaha Mulungu, yo katongaga zinghanzo zo munhu, nayo kamudimaga munhu mono yakwendezwa nayo,

²⁴ na hamba yagwe hasi, si kogwila lukulu yekalilile baho hasi, vyono Muwaha Mulungu yo yamwibatilize.

²⁵ Ane lu, nakombipa, no wikale wangu weza wa myaka minji muno, ninga nghali hamba sininawona munhu, we ling'ani Mulungu yamulece, hamba ne wanagwe, wawe wakwilombeleza ndigwa, aa ng'o.

²⁶ Langa mwene kalavyaga du bwete madaha gose, na wanji yakuwakopesha, ne wanagwe wakuwa wulugutwe.

²⁷ Wuwuce mu wubi, witume ziswanu, holeka nagwe kokwikala mu'si cibitilila.

²⁸ Hambi Muwaha Mulungu nha yendile wiling'ano, hamba si kawalekaga wehuwilwa wakwe. Mwene kawadimaga wawo cibitilila, ninga zindelo ze wabi, wokongomezwa.

²⁹ We ling'ani, wohala yisi, nawo wokwikala mumo cibitilila.

³⁰ U munhu we ling'ani, kalongaga nghani ze mahala. Kanyhi kalongaga ze ling'ani no lulimi lwakwe.

³¹ Kawibataga wulajilize wo Mulungu mu nhumbula yakwe, si kawulekaga yaye hamba hadodo.

³² U munhu mubi, kamusepaga u munhu muswanu, no kujela kumuwulaga,

³³ ninga Muwaha Mulungu sikomuleka, u munhu muswanu mu vilungo vyo mulugu, hamba si komuleka yaling'anizwe, hono yasitakwe.

³⁴ Wumwitumbilaje Muwaha Mulungu, kanyhi wukamise no wutonji wakwe, nayo kokupela yisi, nagwe kowawona i wabi vyono wakongomezwa.

³⁵ Nimuwona u mubi yakalipe muno muno, yetandaze nhe libici lyo muhagata lya Lebanoni.

³⁶ Ninga ha nyuma nali neza kukola baho, nghamwagana yeza yali hasina, nghamulondola, ninga hamba siyejela yaye.

³⁷ Ninga lanje ta, u munhu muswanu munhu we ling'ani, u munhu mono yendile mulamu, yo kapegwaga lulelo.

³⁸ Ninga wanyo wubi wose, wokongomezezwa lukulu, sunga no lulelo lwawo, nalo lopatilwa lukulu.

³⁹ U Muwaha Mulungu kawaponyaga we ling'ani, no kuwadima mwipango lyo wugaye.

⁴⁰ U Muwaha Mulungu kawatazaga no kuwaponya, kawaponyaga mu wanhu wabi, vyono nawo wamwitumbiye mwene.