Zabuli 33 - Luganuzi Luswanu Kuli Wanhu Wose 2002

Lwimbo lwo lukumyo

¹ Anye mo wanhu we ling'ani, musangalalilenyi Muwaha Mulungu, nanye mo wenenenyhezi, mukumyenyi Mulungu.

² Mukumyenyi Muwaha Mulungu ko wutowa ndonondo, mwimbilenyi ne lisumbi lye zinghunzi yikumi.

³ Mwimbilenyi lwimbo lupya, towenyi zing'oma viswanu, no wusangalale.

⁴ Inghani yo Muwaha Mulungu yo ye mbeka, ne nyituma yakwe yose, yo nyihuwilwa.

⁵ U Muwaha Mulungu, yendile wiling'ano hamonga no wuling'anizi, ne yinze yose yimemile lusungu lwakwe.

⁶ U Muwaha Mulungu, yawuwumba wulanga ko wulajilize wakwe, ne vinhu vyose vya ku wulanga, vyawumbilwa mu wahulile wakwe.

⁷ Yagakongholela hamonga, malenga ge lilenga ne visolo vye lilenga, yakavidindila mu nyumba yo wuwiko we viya.

⁸ Yinze yose yimogope Muwaha Mulungu! Nanye mo wanhu wose wa mononze, mumupelaje Muwaha Mulungu lilumbo lyakwe!

⁹ Hambi mwene nha yalonga du, ne yinze yikawa kuwumbwa, mwene yalajiliza du, na vyose vikawa kwijela.

¹⁰ U Muwaha Mulungu kawuwembulaga wuhile we makungugo, no kugapata i mahweso gawo.

¹¹ Wuhile wo Muwaha Mulungu, wikalaga cibitilila, no wudumule wakwe we zinghani wikalaga ko ku zindelo zose.

¹² Na mbeka, limotile likungugo lyono Mulungu wayo, yo yuyu u Muwaha Mulungu! Wamoti wono Mulungu yawahaguye wawe wanhu wakwe!

¹³ U Muwaha Mulungu kasunjililaga, kono hasi ku wulawa ku wulanga, no kuwawona wanhu wose.

¹⁴ Nayo, ku wulawilila mwigoda lyakwe lyo wuwaha, yakuwalanga no kuwawona wanhu wose wono wekaye mononze.

¹⁵ Mwene Mulungu yo muwumbi we zinhumbula ze wanhu wose, holeka mwene yazimanyile zose zono wakwituma.

¹⁶ Hasina mutemi mono kekalaga yapolile, ku soko yo winji we mapuga ge wasilikale wakwe, wo wulugu gono yena nago, hamba citung'ati, si kawasumizaga wayagwe, ku soko ye vilungo vyakwe mweneco.

¹⁷ Hamba fwalasi mu wulugu, si yokwila yeneco kusuma ne vilungo vyayo viwaha, hamba si vyosuma kumuponya munhu.

¹⁸ U Muwaha Mulungu, kawalanjililaga wose wono wakumuhulika, wanhu wose wono wetumbiye lusungu lwakwe.

¹⁹ Mwene kawaponyaga mwi'fwa no kuwalisa mu nzala.

²⁰ Ase cimwitumbiye Muwaha Mulungu, mwene yo mukamisi wetu, kanyhi yo mutazi wetu.

²¹ Nase cisangalaye ku so mwene, kanyhi cilitumbiye litagwa lyakwe lyono lyelile.

²² Lusungu lwako luweze muli'se 'gwe go Muwaha Mulungu, nha vyono nase cikwitumbiye gwegwe.