Zabuli 32 - Luganuzi Luswanu Kuli Wanhu Wose 2002

Wunene no wunenelwe

(Zabuli ya Dawudi)

¹ Mumoti munhu mono yaneneywe lisutya lyakwe, munhu mono wubi wakwe wapatilwa lukulu.

² Yo mumoti munhu mono u Muwaha Mulungu si yakumuwalila, hamba kugakumbucila masutya gakwe, u munhu mono yasina wukonji wo wose mu nhumbula yakwe.

³ Lono nali nghali si nanena wubi wangu, mbeka, nali soceye so wulila misi yose.

⁴ Wali kundipiciza ku misi na ku cilo, sunga ne vilungo vyangu vikawa kuwuka muli'ne, nane nghawa kunyala nha vyono muhangha wunyalaga mu cibahu, lono mvula yawuka.

⁵ Nghawa kuwuvumila wubi wangu hali'gwe, hamba sinawuhundika wavu wangu. Nghawona viswanu, mvumile wubi wangu hali'gwe go Muwaha Mulungu, nagwe wukawa kunenela wubi wangu wose.

⁶ Holeka yimunojeye munhu wo wose mono yakogopile, yakulombe mwi'daha lyo wugaye, hamba gaze magaziko menji, ninga si gomuficila yaye.

⁷ Agwe yo gwegwe go wutizizo wangu, kunghamisaga mu wugaye wangu. Nina wusangalale wuwaha vyono wakondya kumhonya.

⁸ Mulungu yakutya, “Nokulajila nzila yono kokola, na kanyhi, nokwijiza no kukutonga.

⁹ Wulece kuwa mulele nha vyono yinha fwalasi hamba nyumbu, yono yiwopelezwaga matandiko ne mikowa mu mulomo, hono wulece kuyinoza nhavivyo, si yokusejelela yaye.”

¹⁰ Nawo i wanhu wabi, wotuga magayo menji, ninga wono wamwitumbiye Muwaha Mulungu, awo wakudimwa ko lusungu lwakwe.

¹¹ Nanye mo wanhu we ling'ani, musecelele, no kusangalalila i metumo gono yetumile u Muwaha Mulungu, anye nanye mo wenenenyhezi, mutowe nyhenze za nyemo.