Zabuli 29 - Luganuzi Luswanu Kuli Wanhu Wose 2002

I lizi lyo Mulungu mu mbeho yo mukukunzo

(Zabuli ya Dawudi)

¹ Mulavizyenyi lukumyo Muwaha Mulungu, anye mo viwumbwa vyose vyono vili ku wulanga. Heya, mumukumyaje no kuwuvumila wuwaha wakwe.

² Likumyenyi litagwa lyo Muwaha Mulungu, mumuhembe Muwaha Mulungu lono yakwilajila.

³ Lizi lyo Muwaha Mulungu likuhulikwa mu malenga, u Mulungu wo lukumyo yakulavya mabalalusi, ne lizi lyo Muwaha Mulungu, likuhulikwa mwi'lenga mucanyha!

⁴ Lizi lyo Muwaha Mulungu lili vilungo, lizi lyo Muwaha Mulungu limemile wuwaha.

⁵ Lizi lyo Muwaha Mulungu, libenanjizaga i mibici ye mihagata, heya, sunga ne mihagata ya ku Lebanoni.

⁶ Liganozaga i matunda ga Lebanoni gazumhe-zumhe, kotya nyehe ya ng'ombe, ne matunda ga Helimoni, nago kotya nyana ye mbogo.

⁷ Lizi lyo Muwaha Mulungu lilavyaga malambi go moto.

⁸ Lizi lyo Muwaha Mulungu lisinjisaga nyika, u Muwaha Mulungu yakulisinjisa linyika lya Kadeshi.

⁹ Lizi lyo Muwaha Mulungu, liyisinjisaga mikambala, nalyo likung'unhaga mahamha ge mabici mu mbago, na wono wali mu Nyumba yakwe wakutya, “Lukumyo lweze kuli Mulungu!”

¹⁰ U Muwaha Mulungu yo yatemile lihwazi lye malenga Muwaha Mulungu yo mutemi, yatemile cibitilila.

¹¹ U Muwaha Mulungu kowapela wanhu wakwe vilungo, kowalugutiza wanhu wakwe ko mulamu.