Zabuli 27 - Luganuzi Luswanu Kuli Wanhu Wose 2002

Wulombe wo lukumyo

(Zabuli ya Dawudi)

¹ U Muwaha Mulungu wo wuzelu wangu, kanyhi yo mhonelo yangu, alu kanyhi nimogope nani lo? U Muwaha Mulungu yo mudimi wangu alu nimogope nani 'mbi?

² I wanhu wabi hono wasace kuhungucila ho wambulaje, weneco du, wo wokwikobala no kugwa hasi.

³ Holeka hamba mhilimwe, ne lipuga yiwaha, ane sinokogopa yaye, hamba wulugu wunyizize, nojendelela kumwitumbila du Mulungu.

⁴ Hoyili nghani monga du yono nimulombile Muwaha Mulungu, nghani monga du yono nghuyilondola, nayo yoyi, “Nikale mu nyumba yo Muwaha Mulungu, vilo vyose vyo wikale wangu, niwuwone wuswanu wo Muwaha Mulungu, no kuwulondola wutonji wakwe mu Nyumba yakwe.”

⁵ Na mwi'zuwa lyo wugaye, mwene kohundika 'ne mu wikalo wakwe, kanyhi kombika mholile mwi'talawe mucanyha.

⁶ Nane nowasumiliza i walugu wangu wose wono wamhilime, nane nomulavizya makumbiko sangalaye mu nyumba yakwe, nokwimba hamonga no kumusangalalila Muwaha Mulungu.

⁷ Wuhulice go Muwaha Mulungu lono nghukulilila, wumbonele lusungu, wumhitule.

⁸ Nghwihwesa zono walonga wukatya, “Wuze kuli'ne!” Nane nghukuziza, gwe go Muwaha Mulungu.

⁹ Wulece kwihundika hali'ne. Hamba wulece kunemela mwi'kuwo ane no mwitumami wako, agwe nhondo zose, yo gwegwe mono wuli mutazi wangu holeka wulece kunhaga, hamba kundeka gwe go Muwaha Mulungu go Muponyi wangu.

¹⁰ Wa baba na yaya hamba wandece, Muwaha Mulungu kojendelela kundima.

¹¹ Gwe go Muwaha Mulungu, wunyijize ze nzila yako, wunghoze mu nzila yono yigoloce, hambi walugu wangu nha wenji muno muno.

¹² Holeka wulece kundeka, i walugu wangu, wanhendele nha vyono wendile, hambi i wahomelezi wo wulambi, nha wananjile ko wogofye wuwaha.

¹³ Nane nihuwiye vyono nowuwona wuswanu wo Muwaha Mulungu, mu wikalo we womi.

¹⁴ Wumwitumbile Muwaha Mulungu! Wuwe ne vilungo, ne nhumbula ye citung'ati! Heya, wumwitumbile Muwaha Mulungu!