Zabuli 22 - Luganuzi Luswanu Kuli Wanhu Wose 2002

Cililo co wusungu no lwimbo lwo lukumyo

¹ Mulungu wangu, Mulungu wangu! So cici wukundeka? Nhawule wuli kutali ku wunhaze, wuli kutali ne zinghani ze cililo cangu?

² Mulungu wangu! Mu misi nghukulilila ninga hamba si wukuhuliciza, na ku cilo nako nhavivyo, ninga hamba singhutuga wucehe yaye.

³ Hamba nhavivyo, agwe welile; mono wanhu wa Isilayeli wakukukumya.

⁴ Ne walezi wetu wali wakwitumbiye gwegwe, wali wakwitumbiye, nagwe wukawaponya.

⁵ Wakulilila lono wali wali mu zimbali, wakaponywa, wakwitumbila, hamba si wawona cevu.

⁶ Ninga ane nili ng'onyo du, hamba si nili munhu yaye, nghubedegalwa no kuhoswa ne wanhu wose.

⁷ Wose wono wakumbona, wakunzwajiza du, wakufyonza no kusinjisa mitwe yawo,

⁸ Wakutya, “Alu, si wali wumwitumbiye Muwaha Mulungu, Nhawule lu si yakukuponya? Hono Mulungu yawe yendezwe nagwe, ale yakuponye!”

⁹ Ninga agwe go Muwaha Mulungu, yo gwegwe mono wandavyaniza mu'nda ya yaya, no kundima lono nali nghali kongha.

¹⁰ Nghwitumbiye gwegwe ku wulawa wulelwe wangu, ku wulawilila lono nalelelwa, gwegwe du yo wuli Mulungu wangu.

¹¹ Wulece kuwa wuli kutali nane, hambi wugaye nha wasejelela, holeka weze wuli behi, hambi nha sina mono konhaza.

¹² Walugu wenji wamhilime, wenha zinghambaku, wambaninyhize, wenha zinghambaku zinghali za Bashani!

¹³ Wakwahama i milomo yawo nha simba, wewikanize ho wanhowanje caka caka, no kundemulanga.

¹⁴ Ane namalika nhe malenga gono gamwajice, ne mafupa gangu gose gatenguka, ne nhumbula yangu yeza nha kotya nha yono yenjeduce.

¹⁵ Mumelo wangu wanyala nhe lizaye, no lulimilwangu lukwinamatila mu zinzagasa zangu, wandeka fwiye mu manghundi.

¹⁶ Wihangulize wa wetuma zo wavu, wumhilime, wamhilime kose kose kotya litewa lya mabwa, wanhobola miwoko ne magulu.

¹⁷ Alu nasigala mafupa gose du, ne walugu wangu wananjile akuno wakusimanga.

¹⁸ Wakugawana vivwalo vyangu mu nzila yo ko kutowa kula.

¹⁹ Gwe go Muwaha Mulungu, wulece kuwa kutali nane. Agwe go mutazi wangu, wiyohaje wunhaze.

²⁰ Wumhonye no mumaje! Wumhonye wumi wangu ku wulawa mu mabwa gaga!

²¹ Wumhonye mwi'lomo lye simba, wumhonye ku wulawa mu mahembe ge mbogo.

²² Nane nowanziza wandugu zangu ze metumo gako, nokulumbila muciligati co wihangulize wawo.

²³ “Ale, mumupelaje lukumyo, anye mo wetumami wo Muwaha Mulungu! Nanye mo lulelo lwa Yakobo, mumutogozaje Mulungu, nanye mo wanhu wose wa Isilayeli, mumuhembaje.

²⁴ Hambi mwene nha si kawabedegalaga waciwa mu wusocele wawo, hamba sikagabedegalaga i magazo gawo, si kalemaga kuwahuliciza yaye, langa kawapitulaga lono wakumulomba wutazi.”

²⁵ Gwe go Mulungu, kumhelaga wusume wo kukukumya, hagati yo wihangulize wuwaha we wanhu, nane nofisiliza wilahize wangu hali wono wakogopile.

²⁶ I waciwa wolya sunga wegute, nawo wono wakumulondola u Muwaha Mulungu, womukumya. Ale, wamoteswe cibitilila!

²⁷ Ne yinze yose yokumbucila, no kumuwuyila Muwaha Mulungu, ne zimhuga zose ze makungugo, zomuhemba.

²⁸ Hambi u Muwaha Mulungu nha Mutemi, nayo yagatemile makungugo gose.

²⁹ Ne wanhu wedunhumuzi wose, womuhemba mweneco du, na wose wono si wakusuma kwiwumifya, hamba wahwele, womuhemba mweneco du.

³⁰ Ne zindelo zono zikuza, zomwitumamila, ne wanhu nawo, woziganula zinghani zo Muwaha Mulungu, kuli zindelo zono zikuza,

³¹ Sunga ne wanhu wono wakali nalelwa, nawo wolololonjelwa nhavi, “U Muwaha Mulungu yo yawaponya wanhu wakwe!”