Zabuli 19 - Luganuzi Luswanu Kuli Wanhu Wose 2002

Lukumyo lwo Mulungu kuli viwumbwa

(Kuli mwimbizi: Zabuli ya Dawudi)

¹ Wulanga wukulajila lukumyo lwo Mulungu, no wulanga nawo wukwanza i milimo ye miwoko yakwe.

² Misi nayo yikuyilonjela i misi ye mitondo, cilo cikucimanyiza cilo cono cikutyatya,

³ Ninga hasina wulonje hamba nghani zono zikwitumamilwa, hamba lizi lyono likuhulikwa.

⁴ Hamba nhavivyo, lizi lyazo litandaye mononze mose, ne zinghani zayo zificile sunga ko ku mhelo ye yinze. U Mulungu yaliwiciye lizuwa wikalo walyo mu mwanya,

⁵ nalyo lilawilaga kunze lihwanile bwana halusi, lihwanile i citung'ati mono yewikanize ku wisumanize.

⁶ Nalyo lisosomocelaga lubavu lumonga, no kupilima sunga ku lubavu luyagwe, na hasina cono cosuma kwicita ne livuce lyayo.

Lilajilizo lyo Mulungu

⁷ I lilajilizo lyo Muwaha Mulungu likwilaniciye, nalyo limupelaga munhu vilungo. Nago malajilizo go Muwaha Mulungu gakamile, gawapelaga mahala i wenenenyhezi.

⁸ U wutonji wo Muwaha Mulungu, wo wulunji, wusangalazaga nhumbula, lilajilizo lyo Muwaha Mulungu, lyo lye ling'ani, limwijizaga munhu.

⁹ U wogopo Muwaha Mulungu, yo nghani yono yelile, cogopo co kumogopa Muwaha Mulungu cikalaga cibitilila, ne malajilizo go Muwaha Mulungu, go go wulunji, gose gali ling'ani.

¹⁰ Maswanu muno si nha zahabu, gali muzinzi si nho wuci muswanu muno muno.

¹¹ Gakunyijiza ane no mwitumami wako, vyono, hono nghugatyatya, gakundetela wuhumbilizwe wuwaha.

¹² Ninga 'lu nani 'mbi, mono kewonaga i masutya gakwe mweneco? Gwe go Muwaha Mulungu, wumhonye ne masutya gono sinigamanyile.

¹³ Wunyhitilaje no mwitumami wako, kuli masutya go kusutya ne nyono, wulecele lukulu kuvumila gago gateme muli'ne. Na baho ho nowela nghwilaniciye, hamba si nowa no wusutye wuwaha yaye.

¹⁴ Gwe go Muwaha Mulungu, nghukulomba zinghani zangu, hamonga ne mahweso gangu, vikwendeze gwegwe, mono wuli 'talawe lyo wutizizo wangu, kanyhi go Mukombozi wangu!