Zabuli 16 - Luganuzi Luswanu Kuli Wanhu Wose 2002

Wulombe wo witumbilo

(Zabuli ya Dawudi)

¹ Wunghamisaje 'gwe go Muwaha Mulungu, nghwihundika muli gwegwe.

² Nimulonjela u Muwaha Mulungu, “Agwe yo gwegwe go Muwaha Mulungu wangu, sina cinji ciswanu, langa hono si gwegwe du.”

³ Kuli ze milungu yo wulambi yono yili mononze, ane nehwesaga vyono yili vilungo!

⁴ Ninga wono wakuyihemba milungu yinji, wakwiyiletela weneco wugaye wuwaha. Nane sinokwiyinjiziza lukulu mu makumbiko gawo. Hamba ne milomo yangu siyotambulila lukulu, matagwa ge milungu yiyo.

⁵ Gwe go Muwaha Mulungu, ane nghuhaguye gwegwe du, yo gwegwe du mono kumhelaga visakwa vyangu vyose, no wumi wangu wuli mu miwoko yako.

⁶ Wumhelile ciwagwa ciswanu muno muno, heya, na vyose vyono kumhelaga nha viswanu vicizize.

⁷ Nane nghumukumya u Muwaha Mulungu, mono kanhongaga sunga na mu cilo, ciselinji cangu cikuwa kunyijiza.

⁸ Holeka nane nghumuwika Muwaha Mulungu, hamwande yangu nhondo zose, nayo vyono yali hamonga nane, holeka hamba sinosinjisika yaye.

⁹ Holeka nosangalala no kusecelela, kwe nhumbula yangu yose. Nane nokwikala mholile muno.

¹⁰ Hambi nha wunyhitiye ne vilungo vye lifwa, hamba sikomuleka mono yelile wako yawolele mu citenjelo.

¹¹ Agwe kondajila nzila yono yibitile ku wumi, hali'gwe yimemile nyemo, na mu muwoko wako mo mozili ziswanu ze cibitilila.